Miakej moiljuiaj san tlapik timomaijtosej pampa amo aka techtlakakilia. Uan sekinok moiljuiaj amo kinnankilijtokej. Se tlen amo tlaneltoka ipan toTeotsij, moiljuik kenijkatsa eliyaya uan kema momaijtok, kiiljuik: “Xinechiljui se tlenijki”. Uan teipa kiijtok: “ToTeotsij amo kema nechnankilik”.

Maske sekij kiampa moiljuiaj, Biblia kiijtoua toTeotsij techtlakakilia. Biblia kiniljuia toTeotsij itekipanojkauaj: “Kema toTeko kikakis inkitsajtsilisej para ma inmechpaleui, inmechtlasojtlas miak uan nimantsi inmechnankilis” (Is. 30:19). Seyok texto kiijtoua: “Kimaka miak pakilistli kema momaijtouaj tlakamej tlen itstokej xitlauakej” (Prov. 15:8).

Biblia nojkia kiijtoua toTeotsij kintlakakilik sekinok. Se texto kiijtoua Jesús “kitlajtlanik toTeko tlen kinekiyaya [...]. Pampa san toTeko kipiayaya chikaualistli para kimakixtis tlen nepa kampa mikistli. Uan toTeko Dios kitlakakilik” (Heb. 5:7). Ipan Daniel 9:20, 21 uan 2 Crónicas 7:1 kiijtoua sekinok nojkia kintlakakilijkej.

¿Kenke sekij moiljuiaj toTeotsij amo kintlakakilia? Tlaj tijnekij ma techtlakakili Jehová, * moneki san yaya tijnojnotsasej. Amo kinamiki tikinnojnotsasej sekinok teotsitsij yon tochampoyouaj katli uejkajkia itstoyaj. ToTeotsij kineki ma tijtlajtlanikaj san “tlen kinamiki”. Kiampa ya ‘techtlakakilis’ (1 Juan 5:14). Uajka, tlaj tijnekij ma techtlakakili moneki tikixmatisej uan tijneltokasej.

Miakej kiijtouaj momaijtouaj pampa toTeotsij nelia kintlakakilia uan amo san pampa kiampa kichiuaj ipan ininreligión. Isaac, katli eua Kenia, kiijtoua: “Nikiljuik toTeotsij ma nechpaleui nijkuamachilis Biblia. Teipa, se akajya nechnechkauik uan nechpaleuik”. Hilda, katli eua Filipinas, ayokmo kinekiyaya tlachichinas. Miakpa kinejki kikauas uan amo uelki. Yeka iueue kiiljuik ma kiiljui toTeotsij ma kipaleui. Teipa kema ya momaijtojtoya, kiijtok: “Amo nijmati kenijkatsa nechpaleuik. Ayokmo nijnejki nitlachichinas uan teipa nijkajki”.

¿Timoiljuia mitspaleuis toTeotsij tlaj tijtlajtlanis tlen kinamiki?