1, 2. ¿Kenijkatsa kiitaj toTeotsij sekij maseualmej?

MIAKEJ moiljuiaj toTeotsij amo kitekipachoua tlen tijchiuaj yon tlen techpano. Ipan noviembre, 2013, se chikauak ajakatl kintlasojsoljuilik tlauel miakej ipan islas Filipinas. Teipa, katli tekichiua ipan se altepetl kiijtok toTeotsij uelis kichiuayaya seyok tlamantli, yeka amo kinpaleuik.

² Sekinok moiljuiaj toTeotsij amo kiita tlen kichiuaj (Is. 26:10, 11; 3 Juan 11). Nopa apóstol Pablo kiijtok kema ya itstoya, moiljuiyayaj amo monekiyaya ma kinyakana toTeotsij. Yeka kichiuayayaj tlen amo kuali, tlen amo xitlauak uan san kinekiyayaj tlapijpiasej (Rom. 1:28, 29).

3. 1) ¿Tlake moneki ma timotlajtlanikaj? 2) ¿Tlake kiijtosneki kema Biblia kiijtoua toTeotsij “ima”?

³ Maske tijmatij Jehová kiita nochi tlen tijchiuaj, moneki ma timotlajtlanikaj: “¿Nijneltoka kitekipachoua toTeotsij tlen nechpano? ¿Nikita kenijkatsa nechpaleuijtok?”. Biblia kiijtoua Jehová kinpaleuia itekipanojkauaj ika “ima” (xijpoua Deuteronomio 26:8 *). (Xikita nopa recuadro “¿Tlake kiijtosneki?”.) Uan Jesús kiijtok sekij ‘kiitaskiaj’ toTeotsij o kimatiskiaj kenijkatsa kinpaleuia (Mat.  5:8). ¿Nojkia tijchiua nopa? ¿Tikita kenijkatsa mitspaleuia? Biblia kiijtoua sekij amo kiitakej toTeotsij “ima” uan sekinok kena. Ipan ni tlamachtili tikitasej ajkia inijuantij kej nopa kichijkej. Uan ipan nopa seyok, tikitasej tlaj titlaneltokasej ipan toTeotsij, techpaleuis tijmatisej kenijkatsa techpaleuijtok.

4. ¿Kenke israeleuanij ininkualankaitakauaj amo kineltokakej Jehová kinpaleuijtoya itekipanojkauaj?

⁴ Uejkajkia, miakej kiitakej kema Jehová kinpaleuik israeleuanij. Ya kichijki uejueyi tlamantli kema kinpaleuik ma kisakaj Egipto uan ma kintlanikaj ininkualankaitakauaj kema itstoyaj ipan nopa tlali tlen kiniljuijtoya kinmakas (Jos. 9:3, 9, 10). Maske miakej tlanauatianij kimatiyayaj tlen Jehová kichijtoya, mosentilijkej “para kiteuisej Josué uan nopa israelitajmej” (Jos. 9:1, 2). Kema kinteuijkej, nojkia kiitakej kenijkatsa toTeotsij kinpaleuiyaya itekipanojkauaj, kej kema kichijki ma moketsa Tonati uan metstli, uan kiampa “israelitajmej kintlankej ininkualankaitakauaj” (Jos. 10:13). Kintlankej pampa ‘motochonchijkej’ uan amo kema kinejkej kineltokasej Jehová kinpaleuiyaya itekipanojkauaj (Jos. 11:20).

5. ¿Tlake amo kinejki kineltokas nopa tlanauatijketl Acab?

⁵ Teipa Acab, katli eliyaya se amo kuali tlanauatijketl, miakpa kiitak toTeotsij kinpaleuik itekipanojkauaj. Elías kiiljuik ayokmo uetsiskia atl, uetsiskia san kema ya kiijtoskia (1 Rey. 17:1). Maske san toTeotsij ueliskia kichiuas Elías ma kiijto kema sampa uetsiskia atl, Acab amo kinejki kineltokas. Teipa, Elías kitlajtlanik Jehová ma kititlani tlitl tlen iluikak, uan ya kiampa kichijki. Elías nojkia kiiljuik Acab Jehová kichiuaskia ma uetsi miak atl, uan ya nopa panok (1 Rey. 18:22-45). Uan Acab amo kineltokak tlaj Jehová kichijtoya nopa. Tlen tikitakej ipan ni párrafo uan ipan párrafo naui, kinextia moneki kuali titlachixtosej tlaj tijnekij tikitasej kenijkatsa techpaleuia toTeotsij.

6, 7. ¿Tlake kineltokakej nopa gabaóneuanij uan Rahab?

⁶ Katli itstoyaj ne altepetl Gabaón amo eliyayaj kej sekinok maseualmej, pampa inijuantij kikaktoyaj nochi tlen Jehová kichijtoya uan kineltokayayaj toTeotsij kinpaleuijtoya israeleuanij. Yeka, nopa gabaóneuanij amo kinteuijkej, san kitemolijkej kenijkatsa ueliskia itstosej ika tlayolseuilistli ininuaya (Jos. 9:3, 9, 10). Nelia kuali kichijkej kema kineltokakej Jehová kinpaleuiyaya itekipanojkauaj.

⁷ Rahab nojkia kineltokak Jehová kinpaleuiyaya itekipanojkauaj. Maske amo eliyaya israelejketl, kikaktoya kenijkatsa Jehová kinkixtik israeleuanij ne Egipto. Kema asitoj ichaj nopa omej tlakamej katli kintitlankej tlachiatij Canaán, ya kiniljuik kineltokayaya Jehová kinpaleuiskia ma moaxkatikaj nopa tlali. Maske kimajtoya ueliskia kimiktisej ya uan ichampoyouaj pampa kineltokayaya nopa, motemachiyaya toTeotsij kinmanauiskia (Jos. 2:9-13; 4:23, 24).

8. ¿Tlake kineltokakej se keskij israeleuanij?

⁸ Kema Acab kiitak uetsiyaya tlitl tlen iluikak, amo kinejki kineltokas toTeotsij kichijki nopa pampa Elías momaijtojtoya. Uan se keskij israeleuanij kena kineltokakej toTeotsij kichijtoya. Yeka chikauak kiijtojkej: “¡ToTeko yajaya Dios!” (1 Rey. 18:39).

9. ¿Kenijkatsa uelis tikitasej Jehová “ima” ipan ni tonali?

⁹ Tikitakej se keskij kena kineltokakej toTeotsij kinpaleuiyaya itekipanojkauaj uan sekinok amo. Nama nojkia itstokej miakej toTeotsij itekipanojkauaj katli kineltokaj techpaleuia. Tojuantij nojkia kiampa tijnekij tijchiuasej. ¿Kenijkatsa uelis tikitasej Jehová “ima” ipan ni  tonali? Uelis kejuak tikitasej ika ‘totlalnamikilis’ o ika toyolo (Efes. 1:18). (Xikita nopa recuadro “¿Tlake kiijtosneki?”.) Yeka, moneki kuali tikixmatisej Jehová uan nopa kuajkuali tlamantli tlen kinextia. Uan, ¿kenke tijmatij ipan ni tonali Jehová kinpaleuijtok katli kinekij kichiuasej tlen ya kipaktia?

10. ¿Kenke tijmatij Jehová nojua kinpaleuijtok katli kinekij kichiuasej tlen ya kipaktia? (Xikita nopa achtoui tlaixkopinkayotl.)

¹⁰ Miak tlamantli kinextia Jehová nojua kinpaleuijtok katli kinekij kichiuasej tlen ya kipaktia. Miakpa tijkaktokej Jehová kinpaleuijtok katli kiiljuijtokej ma kinpaleui (Sal. 53:2). Kema toikni Allan kinojnotsayaya se siuatl ne Filipinas, nopa siuatl pejki mochokilia. Allan kiijtoua ika ijnalok nopa siuatl kiiljuijtoya toTeotsij ma kipaxalokaj Jehová itlajtoltemakauaj. Kema eliyaya ichpokatl kimachtiyayaj ika Biblia. Teipa monamiktik, yajkej mochantitoj oksejko uan yeka ayokmo kimachtijkej. Ya tlauel kitlaskamatilik toTeotsij pampa nimantsi kinankilik kema momaijtok. Uan kema ayamo panoyaya se xiuitl, moatsonpoliuiltik.

11, 12. 1) ¿Kenijkatsa Jehová kinpaleuijtok itekipanojkauaj? 2) Xikijto kenijkatsa Jehová kipaleuik se tosiuaikni.

¹¹ Nama Jehová kinpaleuijtok miakej itekipanojkauaj. Sekij toikniuaj achtouia tlachichinayayaj, kitekiuiyayaj drogas o kiitayayaj pornografía. Miakej kiijtouaj maske kinekiyayaj kikauasej, amo ueliyayaj. Uan kema kiiljuijkej Jehová ma kinpaleui, ya kinmakak “ueyi chikaualistli”. Kiampa ayokmo kichijkej nopa amo kuali tlamantli (2 Cor. 4:7; Sal. 37:23, 24).

¹² Jehová nojkia kinpaleuijtok itekipanojkauaj kema kipiaj kuesoli. Ma tikitakaj tlen  kipanok toikni Amy. Ya kiiljuijkej ma yaui ipan se isla del Pacífico pampa kichiuaskiaj se kali kampa mosentiliaj uan se kali kampa itstoskiaj misioneros. Nopaya amo itstoyaj kej ya momajtoya. Miakpa amo kipiayaya atl yon tlauili, uan kemantika ipan ojtli tlatemiyaya ika atl. Mokauayaya ipan se amo ueyi cuarto ipan se hotel uan tlauel kinilnamikiyaya ichampoyouaj. Se tonali kikualankanojnotski se tosiuaikni kema tekitiyayaj sansejko. Kema yajki ichaj tlauel amo kuali kiyolmatiyaya. Uajka amo onkayaya tlauili, yeka itstoya kampa tlayoua. Ya momaijtok, uan kema sampa onkak tlauili, ipan pilamochtsi Tlen Tematiltia kiitak se tlamachtili kampa kiniljuiyaya misioneros kenijkatsa amo tlauel motekipachosej uan kuali mouikasej ininuaya katli euaj ipan sekinok altepemej. Amy kiyolmatki kejuak Jehová kinojnotstoya. Nopa kipaleuik nojua kuali ma tlatekipano (Sal. 44:25, 26; Is. 41:10, 13).

13. ¿Kenke tijmatij Jehová kinpaleuia itekipanojkauaj ma kinkauakaj tlajtolmoyauasej?

¹³ Jehová nojkia kinpaleuijtok itekipanojkauaj ma kinkauakaj tlajtolmoyauasej (Filip. 1:7). Kema sekij tekichiuanij amo techkajtokej ma titlajtolmoyauakaj, tikinteljuijtokej tekikalko. Kema tijchijtokej ni, ipan se 268 imiaka tlanauatianij kena techkajtokej ma titlajtolmoyauakaj. Uan ipan nopa 15 xiuitl tlen panotok, ipan Tribunal Europeo de Derechos Humanos, se 24 imiaka kena techkajtokej ma titlajtolmoyauakaj. Ni kinextia amo aka uelis kichiuas Jehová amo ma kinpaleui itekipanojkauaj (Is. 54:17; xijpoua Isaías 59:1).

14. ¿Tlake sekinok tlamantli kinextia Jehová techpaleuia?

¹⁴ Pampa tiuelij titlajtolmoyauaj ipan nochi Tlaltipaktli, kinextia Jehová techpaleuia (Mat. 24:14; Hech. 1:8). Nojkia techpaleuia pampa timosentikapaleuiaj maske amo tieuaj ipan sanse altepetl. ¡Amo itstokej sekinok katli nojkia mosentikapaleuiaj! Yeka, katli amo kitekipanouaj Jehová nojkia kiijtouaj: “ToTeko itstok inmouaya” (1 Cor. 14:25). ToTeotsij kinextia techpaleuia ika miak tlamantli (xijpoua Isaías 66:14). ¿Tikitstok kenijkatsa mitspaleuijtok Jehová?

15. ¿Kenke uelis amo tikitaj tlaj techpaleuijtok Jehová?

¹⁵ Kemantika pampa tlauel techtekipachojtok tlen techpano, uelis amo tikitaj uan amo tikilnamikij kenijkatsa Jehová nochipa techpaleuijtok. Ya nopa kipanok Elías. Maske amo majmauiyaya, kema kimatki Jezabel kinekiyaya kimiktis, kiilkajki kenijkatsa Jehová nochipa kipaleuijtoya. Uan pampa tlauel majmajki, Biblia kiijtoua kinekiyaya mikis (1 Rey. 19:1-4). Kema kiiljuik Jehová ma kipaleui, ya kiyolchikajki (1 Rey. 19:14-18).

16. ¿Tlake techpaleuis tikitasej tlaj Jehová techpaleuijtok kema tijpiasej kuesoli?

¹⁶ Job nojkia kipanok kej Elías. Pampa tlauel motekipachojtoya, amo kiitayaya nopa kuesoli  kej Jehová (Job 42:3-6). Kema tijpiasej kuesoli uelis nojkia timoiljuisej Jehová amo techpaleuia. Tlaj tijpouasej Biblia, timoyoliljuisej ipan sejse tlapoualistli uan tlen techtlajtolmakaj, tikitasej kenijkatsa techpaleuia. Kiampa tikitasej toTeotsij kejuak technojnotstok. Ni kichiuas tikitasej Jehová nelia itstok uan nojkia tikijtosej kej Job: “Ama nimitsitstok”.

17, 18. 1) ¿Kenijkatsa uelis techpaleuijtok Jehová? 2) ¿Kenijkatsa kinpaleuijtok Jehová se keski itekipanojkauaj?

¹⁷ ¿Tikitstok kenijkatsa mitspaleuijtok Jehová? Sekij kiijtouaj kinpaleuik kema kipantijkej nopa religión tlen melauak. Sekinok moiljuiaj kinpaleuik tlen se toikni kiijtok ipan tlanechikoli, o uelis kiijtouaj kinpaleuik kema momaijtojkej. Uelis sekinok kiijtouaj Jehová kinpaleuik ma uelikaj kichiuakaj tlen monekiyaya uan kiampa kitekipanoskiaj miak. Uan sekinok uelis kiijtouaj Jehová kinmakak tlen monekiyaya kema kikajkej ininteki, pampa kinekiyayaj uelisej monechikosej uan tlajtolmoyauasej (Heb. 13:5). Tlaj kuali timouampojchijtosej iuaya Jehová, tikitasej kenijkatsa techpaleuijtok ika tlauel miak tlamantli.

¹⁸ Sarah, katli eua Kenia kimachtiyaya ika Biblia se siuatl katli nesiyaya amo kipatiitayaya tlen kimachtiyaya. Kema momaijtok, kiiljuik Jehová tlaj ayokmo kinamikiyaya kimachtis. Kema tlanki momaijtoua, nopa siuatl kinojnotski uan kiiljuik tlaj ueliskia yas iuaya ipan tlanechikoli. ¡Tosiuaikni Sarah tlauel yolpajki! Tlaj tijnekisej tijmatisej tlen toTeotsij kichiua, tikitasej kenijkatsa techpaleuijtok Jehová. Rhonna, katli eua Asia kiijtoua uejkaua kema se kiyekoua kiitas kenijkatsa techpaleuia Jehová. Ya kiijtoua kiampa tijkuamachiliaj kenijkatsa tlauel kitekipachoua tlen techpano.

19. ¿Tlake nojua moneki tijchiuasej tlaj tijnekij tikitasej kenijkatsa techpaleuia toTeotsij?

¹⁹ Tlaj tijnekij tikitasej kenijkatsa techpaleuia toTeotsij, nojkia moneki tiitstosej ‘tiyoltlapajpaktikej’ (Mat. 5:8). Ni kiijtosneki moneki timoyoliljuisej san tlen kuali uan ayokmo tijchiuasej tlen amo kuali (xijpoua 2 Corintios 4:2). Ipan ni tlamachtili tikitakej tlaj kuali timouampojchiuasej iuaya Jehová tikitasej kenijkatsa techpaleuia. Ipan nopa seyok tikitasej kenijkatsa tlaj titlaneltokatosej nojkia techpaleuis tikitasej kenijkatsa techpaleuia Jehová.