1. 1) ¿Tlake kuali tlamantli tlen tlauel ipati kinextia toTeotsij? 2) ¿Kenijkatsa tijyolmatij pampa “toTeko yajaya teiknelijkayotl”?

BIBLIA kiijtoua “toTeko yajaya teiknelijkayotl” (1 Juan 4:8). ¿Tlake kiijtosneki nopa? Maske toTeotsij kinextia miak kuajkuali tlamantli, nopa tlaiknelili ya nopa tlen tlauel ipati. Ya amo san kinextia teiknelia, yaya teiknelijkayotl. Nochi kichiua pampa tlaiknelia. ¡Tlauel tijtlaskamatiliaj Jehová pampa teiknelia, uan yeka kichijchijki nochi tlen onka ipan Tlaltipaktli uan iluikaktli!

2. Pampa tijmatij Jehová techiknelia, ¿tlake temachtli tijmatij kichiuas? (Xikita nopa achtoui tlaixkopinkayotl.)

² Jehová tlauel kiiknelia nochi tlen kichijtok. Yeka temachtli tijmatij kichiuas nochi tlen kiijtojtok. Uan pampa techiknelia, toTeotsij “kitlalijtok se tonal [kema] kintlajtolsenkauas nochi tlakamej keja xitlauak ika se tlakatl, yajaya Jesús tlen kitlapejpenijtok” (Hech. 17:31). Tijmatij kema Jesús tetlajtolsenkauas kichiuas ika xitlaualistli. Uan maseualmej katli tlaneltokasej nochipa itstosej ika pakilistli.

3. ¿Tlake panoskia tlaj toTeotsij amo kinikneliskia maseualmej?

³ ¿Tlake panoskia tlaj toTeotsij amo kinikneliskia maseualmej? Satanás nojua kinyakanaskia uan inijuantij nojua kinekiskiaj monauatisej ininselti (2 Cor. 4:4; 1 Juan 5:19; xijpoua Apocalipsis [Revelación] 12:9 uan 12). ¡Tlauel amo kuali tiitstoskiaj tlaj Jehová amo techikneliskia!

4. ¿Kenke Jehová kikajki Satanás ma kiixpano?

⁴ Kema Satanás kiixpanok Jehová, nojkia kichijki Adán uan Eva ma kiixpanokaj. Kiijtok Jehová amo kinamikiyaya kinauatis nochi uan kiijtok yaya kena kuali tlanauatiskia (Gén. 3:1-5). Pampa Jehová tlauel tlalnamiki kikajki Satanás ma kinexti tlaj nelia tlen kiijtok. Uan ika nochi tlen panotok, nestok Satanás uan maseualmej amo kuali tlanauatiaj.

5. ¿Tlake kinextijtok nochi tlen kichijtokej maseualmej?

⁵ Ipan ni tonali nelia mochijtia miak tlamantli tlen amo kuali. Ipan 100 xiuitl tlen panotok mijkej ipan tlauilankayotl kipano 100 millones. Biblia kiijtoua ipan “itlamia tonali” maseualmej tlen “axkuajkualmej uan tlakamej tlen tlakajkayauaj noja kichiuasej achi más tlen fiero” (2 Tim. 3:1, 13). Uan nojkia kiijtoua: “NoTeko, na nijmati para se tlakatl axiaxka iyolis, niyon axyajaya tlen kinauatis tlen panos ipan iojui” (Jer. 10:23). Tlen kiijtoua ni texto nelia. Nochi tlen kichijtokej maseualmej kinextijtok tojuantij amo ueli timonauatiaj toselti pampa Jehová amo kej nopa techchijki.

6. ¿Kenke Jehová kinkajtok nojua ma itstokaj maseualmej katli amo kualmej?

⁶ ¿Kenke Jehová kinkajtok nojua ma itstokaj maseualmej katli amo kualmej? Pampa kiampa kinextijtok san ya kena kuali tlanauatia. Teipa toTeotsij kintsontlamiltis katli amo kualmej. Uan tlaj teipa se akajya kinekis kiixpanos, nima kitsontlamiltis. Ya amo kikauas sampa ma itstokaj maseualmej katli amo kualmej. Pampa ika nochi tlen maseualmej kichijtokej, nestok tlake pano kema se akajya tlaixpano uan yeka nima kintsontlamiltis.

7, 8. ¿Kenijkatsa kinextia Jehová techiknelia?

⁷ Jehová kinextia teiknelia ika miak tlamantli. Ma timoiljuikaj ipan nochi tlen onka ne iluikak, tlauel ueyi uan yejyektsi. Ipan iluikaktli onka tlauel miak planetas uan sitlalimej, kej Tonati. Tlaj Tonati amo eltoskia, amo onkaskia nemilistli ipan Tlaltipaktli. Kej kiijtoua Romanos 1:20, nochi tlen onka kinextia Jehová kichijchijtok, uan nojkia kinextia kipia miak chikaualistli, tlalnamikilistli uan tlaiknelili.

⁸ Jehová kichijki Tlaltipaktli pampa kinejki nopaya ma itstokaj maseualmej uan tlapialmej. Kema kinchijki maseualmej kintlalik ipan se yejyektsi xochimili. Inijuantij kipixtoyaj kuali inintlalnamikilis, kuali inintlakayo uan amo kema mikiskiaj pampa amo eliyayaj tlajtlakolejkej (xijpoua Apocalipsis 4:11). Nojkia Salmo 136:25 kiijtoua Jehová “kinmaka tlakualistli nochi [...] tlen yoltokej pampa iteiknelijkayo axkema tlami”.

9. Maske toTeotsij teiknelia, ¿tlake kikualankaita?

⁹ Maske Jehová tlauel teiknelia, nojkia kikualankaita tlen amo kuali. Yeka Salmo 5:4-6 kiijtoua: “Ta titoTeko Dios tlen axmitspaktia tlen axkuali. [...] Axtijneki tikinitas nochi nopa tlakamej tlen kichiuaj tlen axkuali”. Uan Jehová nojkia kinkualankaita “tlakamej tlen istlakatij [...] uan temiktiaj”.

10, 11. 1) ¿Tlake kinpanos katli amo kualmej? 2) ¿Kenijkatsa itstosej teipa Jehová itekipanojkauaj?

¹⁰ Pampa Jehová tlauel teiknelia uan kikualankaita tlen amo kuali, kema asis nopa tonali tlen ya kitlalijtok, kitlamiltis nochi tlen amo kuali. ToTeotsij iTlajtol kiijtoua: “ToTeko kintsontlamiltis tlen mosisiniaj, pero tlen motemachiaj ipan ya kinteochiuas uan moaxkatisej  nopa tlali. Ayok uejkauas noja itstosej axkuajkualmej”. Nojkia “poliuisej ikualankaitakauaj toTeko [...] keja poktli tlen kisa uan ayok nesi” (Sal. 37:9, 10, 20).

¹¹ ¿Kenijkatsa Jehová kinteochiuas itekipanojkauaj? ToTeotsij techiljuia ipan iTlajtol: “Tlakamej tlen itstokej xitlauakej iixpa toTeko moaxkatisej nopa tlali [...] uan [nopaya] itstosej para nochipa” (Sal. 37:29). Maseualmej katli kineltokasej toTeotsij “tlauel pakisej” uan itstosej ika tlaseuilistli (Sal. 37:11). ¿Kenke? Pampa toTeotsij katli tlauel teiknelia nochipa kinmaka tlen kuali katli kitekipanouaj. Biblia techiljuia: “Uan toTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli” (Apoc. 21:4). ¡Tlauel kuali itstosej katli kipatiitaj itlaiknelijkayo toTeotsij!

12. ¿Tlake moneki tijchiuasej tlaj tijnekij ‘axaka ma techteljui’?

¹² Biblia techiljuia: “Xijtlachili keja monejnemiltia se tlakatl tlen itstok xitlauak iixpa toTeko, yajaya tlen axaka ueli kiteiljuis. Nopa tlakatl kipias tlaseuilistli uan [...] toTeko ika se uelta kintlamitsontlamiltis inijuantij tlen axkitlepanitaj” (Sal. 37:37, 38). Tlaj tijnekij ‘axaka ma techteljui’ moneki tikixmatisej Jehová uan iKone uan tijchiuasej nochi tlen Jehová technauatia (xijpoua Juan 17: 3). Moneki timotemachisej nelia kintsontlamiltisej katli amo kualmej pampa “panoti ni Tlaltipaktli”, uan katli ‘kichiuaj tlen toTeko kineki itstosej nochipa’ (1 Juan 2:17). Pampa nopa tonali monechkauijtiuala, tlauel moneki tijchiuasej kej kiijtoua Salmo 37:34: “Ximotemachi ipan toTeko uan xijchiua tlen yajaya kineki”.

13. ¿Kenijkatsa kinextik toTeotsij nelia tlauel techiknelia?

¹³ Tojuantij uelis tijneltokasej toTeotsij maske titlajtlakolejkej. Nojkia uelis kuali timouampojchiuasej iuaya pampa Jesús motemaktilik. Kema toTeotsij temaktilik iKone kinextik nelia tlauel techiknelia uan yeka kititlanki ipan Tlaltipaktli, kiampa ueliskia kinmakixtis maseualmej tlen tlajtlakoli uan mikilistli (xijpoua Romanos 5:12 uan 6:23). Kema ayamo ualayaya ipan Tlaltipaktli, Jesús nochipa kineltokak toTeotsij ne iluikak, yeka Jehová motemachik nojkia kineltokaskia kema ualaskia. Uan pampa tlauel kiikneliyaya iKone, tlauel kiyolkokok kema kiitak maseualmej kitlaijiyouiltijkej. Maske kiampa kipanok, Jesús kinextik san Jehová kinamiki technauatis, uan nojkia kinextik se maseuali katli amo tlajtlakole uelis nochipa kitekipanos Jehová maske kipias tlaouijkayotl.

14, 15. ¿Kenijkatsa techpaleuia pampa Jesús mijki?

¹⁴ Maske Jesús tlauel tlaijiyouik kema mijki, amo kema kitlauelkajki toTeotsij uan kinextik san Jehová kinamiki technauatis. Pampa Jesús motemaktilik, tojuantij ueli timotemachiaj tiitstosej nochipa ipan se xochimili, yeka kinamiki ma tijtlaskamatilikaj. Apóstol Pablo kiijtok Jehová uan Jesús kinextijkej nelia tlauel techikneliaj kema Jesús motemaktilik. Ya kiijtok: “Axaka kineki mikis ipampa seyok tlakatl yonke ne se tlakatl elis se tlakatl tlen xitlauak. Uelis se omej mikiskiaj ipampa se tlakatl tlen nelia kuali iyolo. Pero toTeko technextilik para nelia miak techiknelia pampa Cristo mijki ipampa nochi tojuantij kema noja tieliyayaj titlajtlakolchiuanij” (Rom. 5:6-8). Uan apóstol Juan kiijkuilok: “ToTeko technextilik hasta kanke techiknelia pampa techtitlanilik iKone iyojtsi para ma uala ipan ni Tlaltipaktli para ma tijpiakaj yolistli yankuik ipampa ya. Ya ni technextilijtok se teiknelijkayotl tlen melauak. Axtojuantij tikiknelijkej toTeko uan yeka Cristo ualajki. Elki toTeko [tlen] techiknelik uan yeka techtitlanilik iKone para yajaya elis nopa tlakajkaualistli tlen tlaxtlauas ipampa totlajtlakoljuaj” (1 Juan 4:9, 10).

¹⁵ Jesús kiijtok “toTeko nelia miak kiniknelia nochi tlakamej ipan ni Tlaltipaktli uan yeka kititlanki iKone iyojtsi para mikis ininpampa. Uan  keja nopa nochi tlen kineltokasej, axpoliuisej, pero kipiasej yolistli tlen yankuik para nochipa” (Juan 3:16). Maske Jehová tlauel kiyolkokok, ya temaktilik iKone. Ni kinextia Jehová tlauel kiniknelia maseualmej, uan nochipa kiniknelis. Pablo kiijkuilok: “Pampa nijmati para temachtli axtleno ueli techiyokakauas tlen iteiknelijkayo toTeko. Yonke timikisej o tiitstosej, techiknelia. Yonke iluikaeuanij, o iajakauaj Axkualtlakatl [...] kinekiskiaj kitsakuilisej iteiknelijkayo, yaja techiknelia. Axtleno tlen ama onka, niyon axtleno tlen teipa onkas uelis techiyokakauas tlen iteiknelijkayo. Axtleno tlen ualas tlen uejkapa, o tlen ualas tlen tlatsintla, niyon axtleno tlen tlachijchiuali, uelis techiyokakauas tlen iteiknelijkayo toTeko tlen technextilijtok ipan toueyiteko Cristo Jesús” (Rom. 8:38, 39).

16. ¿Tlake nopa Mesías iTlanauatijkayo, uan ajkia kitekitlalijtokej?

¹⁶ Jehová nojkia kinextia techiknelia ika Mesías iTlanauatijkayo. Ni Tlanauatijkayotl toTeotsij kitlalijtok uan kitekitlalijtok Jesucristo, katli kiniknelia maseualmej uan katli kena kuali kinnauatis (Prov. 8:31). Nojkia kintlapejpenijtok 144,000 maseualmej katli tlanauatisej iuaya Jesús ne iluikak. Kema moyolkuisej inijuantij kikuamachilisej kenijkatsa tijyolmatij pampa nojkia eliyayaj maseualmej (Apoc. 14:1). Kema Jesús itstoya ipan Tlaltipaktli, tlauel tlamachtik tlen nopa Tlanauatijkayotl, uan kinnextilik itokilijkauaj kenijkatsa kinamiki momaijtosej: “ToTeko toTata tlen tiitstok nepa iluikak. Nochi tlakamej ma kiueyichiuakaj motoka. Xiuala, xitlanauatiki nikaj. Ma kichiuakaj mopakilis nochi ipan ni Tlaltipaktli keja mochijtok nepa iluikak” (Mat. 6:9, 10). ¡Tijchixtokej ma moaxiti tlen kiijtoua ni tlamaijtoli, kema toTeotsij techteochiuas ika iTlanauatijkayo!

17. Xikijto kenke Jesús amo sanse tlanauatia kej maseualmej.

¹⁷ Jesús amo sanse tlanauatia kej maseualmej. Tlanauatianij san kichijtokej ma onka tlauilankayotl uan tlauel miakej maseualmej miktokej. Uan Jesús techiknelia uan nojkia kinextia kuajkuali tlamantli kej Jehová, kej nopa tlaiknelili (Apoc. 7:10, 16, 17). Jesús kiijtok: “Xiualakaj kampa na nochi inmojuantij tlen intlaxikouaj uan intlamamaluikaj etik, uan na niinmechkixtilis inmotlamamal para ximoseuikaj uan ximosiyajkauakaj. Xinechkauilikaj ma nieli niinmoteko uan xinemikaj nouaya. Ximomachtikaj tlen na pampa na nijpia noyolo. Axnimoueyimati uan ika na inkipantisej tlen kitemoua inmoalma para ma moseuis uan mosiyajkauas. Axouij nopa tekitl tlen niinmechmakas. Eltok keja se tlamamali tlen axetik” (Mat. 11:28-30). ¡Nelia tlauel techiknelia Jesús!

18. 1) ¿Tlake pejki mochiua ipan xiuitl 1914? 2) ¿Tlake tikitasej ipan seyok tlamachtili?

¹⁸ Biblia tlamachtia toTeotsij iTlanauatijkayo pejki tekichiua ne iluikak ipan xiuitl 1914. Ipan nopa xiuitl toTeotsij nojkia pejki kintlapejpenia katli poliuij tlen nopa 144,000. Nojkia pejki kinsentilia nopa “miak tlakamej” katli momanauisej kema kintsontlamiltisej katli amo kualmej uan itstosej ipan Xochimili (Apoc. 7:9, 13, 14). ¿Keskij maseualmej kinsentilijtokej tlen nopa “miak tlakamej”? ¿Tlake kineki toTeotsij ma kichiuakaj? Ni tikitasej ipan seyok tlamachtili.