ToTeotsij ipa kinnojnotstok maseualmej. Ika itonal kichijki tlakamej ma kiijkuilokaj itlalnamikilis ipan Biblia (2 Ped. 1:20, 21). Yeka uelis kuali tikixmatisej toTeotsij tlaj tijpouasej iTlajtol. (Xijpoua Juan 17:17 uan 2 Timoteo 3:16.)

Ipan Biblia toTeotsij techiljuia ajkia ya. Techixtomilia kenke kinchijchijki maseualmej uan kenijkatsa kineki ma timonejnemiltikaj (Hech. 17:24-27). Jehová kineki ma tijmatikaj ajkia ya. (Xijpoua 1 Timoteo 2:3 uan 4.)

Jehová yaya temachtia tlen melauak, uan kititlanki iKone Jesucristo ma techmachtiki nopa. Yeka katli kinekij kimatisej tlen melauak kitlakakiliaj tlen Jesús tlamachtik (Juan 18:37). ToTeotsij kineki ma kiueyichiuakaj katli nelia kinekij kimatisej tlen melauak. (Xijpoua Juan 4:23 uan 24.)

Satanás tlauel kiistlakauijtok toTeotsij uan yeka miakej maseualmej amo kiixmatij toTeotsij (2 Cor. 4:3, 4). Maseualmej katli amo kinekij kimatisej tlen melauak kineltokaj nopa istlakatili (Rom. 1:25). Ipan ni tonali tlauel miakej maseualmej katli kipiaj kuali ininyolo kimatij ajkia nelia toTeotsij pampa momachtiaj ika Biblia. (Xijpoua Hechos 17:11.)