Ximoiljui tia ipan se altepetl kampa amo kema tiajtoya. Nochi tlen nopaya tikita amo sanse kej kampa ta tiitstok, kej tlakualistli, tomij uan tlen momajtokej kichiuaj. Yeka, uelis amo tijmatiskia tlake tijchiuaskia.

Kema tijpeualtis tijpouas Biblia, uelis nojkia amo tijmatis tlake tijchiuas. Kema tijpouas tikitas miak tlamantli tlen nama ayokmo eltok. Tikixmatis miak altepemej, kej kampa itstoyaj filisteaeuanij. Nojkia tikitas tlen momajtoyaj kichiuaj ipan nopa tonali, nama ayokmo tijchiuaj, kej kema kitsayanayayaj ininyoyo. Uan tikixmatis se tlakualistli tlen itoka maná, uan se tomij tlen kiiljuiyayaj dracma (Éx. 16:31; Jos. 13:2; 2 Sam. 3:31; Luc. 15:9). Uelis amo tijmatis tlake tijchiuas kema tikitas nochi ni. Kema tia ipan se altepetl, tlauel tijtlaskamatilia katli mitspaleuia. ¿Tijnekiskia se akajya nojkia ma mitspaleui tijkuamachilis tlen eltok ipan Biblia?

Kema pejkej kiijkuilouaj Biblia, nojkia pejkej kinpaleuiaj maseualmej ma kikuamachilikaj tlen ijkuilijtoya. Moisés, katli achtoui kinyakanki israeleuanij, kinixtomilik nochi tlen kiijkuilok (Deut. 1:5).

Kema panotoya nechka mil xiuitl, nojua itstoyaj katli kuali kiixtomayayaj Biblia. Ipan xiuitl 455 a.u.J., miakej judíos, katli ya uejueyij uan konemej, mosentilijkej “kampa kichiuaj tiankis ipan Jerusalén”. Uan katli tlamachtiyayaj “kipojkej chikauak” nopa tlajkuiloli uan kinixtomilijkej maseualmej “tlake kineki kiijtos sejse tlamachtili [...,] uan nochi uelkej kimachilijkej” (Neh. 8:1-8).

Seyok quinientos xiuitl teipa, Jesucristo nojkia pejki tlamachtia. Maseualmej kiixmatiyayaj kej tlamachtijketl (Juan 13:13). Kinmachtik kema maseualmej mosentiliyayaj o kema itstoyaj ininselti. Se tonali, Jesús pejki kinmachtia miakej maseualmej kema mosentilijkej tlamimiltipa, uan “yajuantij kisentlachiliyayaj ika itlamachtil” (Mat. 5:1, 2; 7:28). Uan ipan xiuitl 33, Jesús kamanaltik ika omej itokilijkauaj kema yauiyayaj ipan se pilaltepetsi nechka Jerusalén, “uan kinixtomilik nochi tlen ijkuilijtok [...] ipan iTlajtol toTeko” (Luc. 24:13-15, 27, 32).

Jesús itokilijkauaj nojkia kuali tlamachtijkej toTeotsij iTlajtol. Se tonali, se tlakatl tlen euayaya Etiopía kipojtoya Biblia, uan se Jesús itokilijka tlen motokaxtiyaya Felipe kinechkauito uan kitlajtlanik: “¿Tijmachilia tlen tijpoua?”. Uan ya kinankilik: “Axuelis nijmachilis tlaj axaka nechixtomilis”. Uajka Felipe pejki kiixtomilia (Hech. 8:27-35).

Kej uejkajkia itstoyaj katli kuali tlamachtiyayaj, ipan ni tonali Jehová itlajtoltemakauaj nojkia kinixtomiliaj maseualmej tlen Biblia tlamachtia ipan kipano 239 altepemej uan pilaltepetsitsij (Mat. 28:19, 20, TNM). Sejse chikueyi, kinpaleuiaj kipano 9 millones ma kikuamachilikaj Biblia. Miakej tlen nopa maseualmej amo tlaneltokaj ipan Jesús. Ta nojkia uelis timomachtis ipan mochaj o kampa ta tijnekis, amo mitsinamasej. Nojkia uelis mitsmachtisej ipan teléfono o ipan videoconferencia.

Tlaj tijneki timomachtis, xikiljui se tlen Jehová itlajtoltemakauaj. Tikitas kenijkatsa Biblia amo ouij se kikuamachilis, uan tikitas kenijkatsa “techmachtia [...] uan techtlakaualtia [...,] techtlalnamiktia uan technextilia kejatsa ma timonejnemiltikaj xitlauak”, kiampa nochipa ‘uelis tijchiuas nochi tlen kuali’ (2 Tim. 3:16, 17).