Kuali xijtekiui tomij
Miakej maseualmej ayokmo tlauel kipiaj miak kuesoli pampa kichijtokej tlen Biblia tetlajtolmaka kema kiijtoua kenijkatsa kinamiki tikitasej tomij.
KUALI XIMOILJUI TLAKE TIJCHIUAS
TLEN BIBLIA TETLAJTOLMAKA: ‘Katli moiljuia ika miak cuidado kejatsa kichiuas se tlamantli, kisas kuali iteki. Uan nopa tlakatl tlen momajkaua nimantsi uan kej ueli kichiua se tekitl, axkikualtilis uan mochiuas se teikneltsi’ (Proverbios 21:5).
¿TLAKE KIIJTOSNEKI? Tlaj tijneki kuali ma kisa se tlenijki, moneki kuali timoiljuis tlake tijchiuas, uan xijchiua senkistok kej timoiljuik. Kuali xikilnamikto ni: amo tiuelis tijkouas nochi tlen tijnekis, yeka amo san kej ueli xijtekiui motomij.
¿TLAKE UELIS TIJCHIUAS?
Xijtekiui san tlen moneki. Xikijkuilo nochi tlamantli tlen moneki tijkouas o tikixtlauas uan xijxejxelo. Teipa xikijto keski tomij tijtekiuis ipan sejse tlen nopa tlamantli tlen tijxelok. Tlaj se keski tlamantli amo kiaxilia motomij tlen tikijtok tijtekiuiskia, uajka xikitski tlen ika tijkouaskia seyok tlamantli. Ximoiljui ipan ni neskayotl: tlaj tijtekiuik miak tomij kema timopajtik, uajka xikaxiti motomij ika tlen tijkouaskia sekinok tlamantli tlen namantsi amo tlauel moneki, kej yajyankuik yoyomitl.
Amo ximotlauikilti. Tlaj amo moneki, amo xitetlauikili tomij. Kualtiaskia yolik tikajoktias motomij uan kiampa timokouis se tlenijki. Tlaj tijtekiuia se tarjeta de crédito, xijchiua kampeka nochipa tikixtlauas ipan tonali tlen kiixtlalijkej, kiampa amo mitsinamasej san pampa amo nima tikixtlajki. Uan tlaj titetlauikilia tomij, uajka kuali ximoiljui kenijkatsa tikixtlauas uan xijchiua kej timoiljuik.
Katli kiitaj kenijkatsa motekiuia tomij kiijtouaj maseualmej tlauel tlakojkouaj kema kipiaj se tarjeta de crédito. Yeka, tlaj ta tijpia se, kuali xijtekiui.
XIJCHIUA TLEN MITSPALEUIS
TLEN BIBLIA TETLAJTOLMAKA: “Se tlakatl tlen tlatsiui axmomiltia kema ipoual, uan axtleno kipia kema asi tonali para pixkistli” (Proverbios 20:4).
¿TLAKE KIIJTOSNEKI? Kema se akajya tlatsiui, amo tleno kipia. Yeka, xijchiua kampeka kuali titekitis uan tikajoktias tomij tlen teipa monekis tijtekiuis.
¿TLAKE UELIS TIJCHIUAS?
Kuali xitekiti. Tlaj amo titlatsiui uan tieli titemachtli, uajka nochipa mitstekimakasej. Maseualmej tlauel kipatiitaj se akajya katli kuali kichiua iteki.
Amo xitlakajkayaua. Kema se akajya tlakajkayaua kampa tekiti, ayokmo kuali kiitaj, uan yeka sekinok nojkia ayokmo kinekij kitekimakasej.
Amo xijneki titlapijpias. Tlaj amo tikitas tomij kej kinamiki, uelis kichiuas ximokoko uan ayokmo kuali timouikas ininuaya sekinok. Xikilnamiki: onka sekinok tlamantli tlen moneki tijpatiitas uan amo san tomij.
TLEN NOJKIA MITSPALEUIS
Xijpoua Biblia ipan jw.org, eltok ipan miak tlajtoli.
AMO XIMOTONALPOLO YON SAN KEJ UELI XIJTEKIUI MOTOMIJ
“Iuintinij uan tlen axkikauaj tlakuaj kema ixuitokej mopobrejtiliaj [...]. San kipiasej ininyoyo tlen tsayantok” (PROVERBIOS 23:21).
AMO TLAUEL XIMOKUESO
“Amo ximokuesokaj tlen inmonemilis uan intla onkas [...] tlen inkikuasej uan tlen inkiisej. Amo ximoiljuikaj tlen inmotlakayo uan intla onkas ika tlen inmoyoyontisej” (MATEO 6:25).
AMO XITEKOKOLI
‘Se tlakatl tlen nochi kiixtoka kinekiskia nimantsi tlatominpias, uan axkimati kenijkatsa nojua mochiuas teikneltsi’ (PROVERBIOS 28:22).
