Kuali ximouika ika toTeotsij
Kej tikitakej ipan achtoui tlamachtili, miakej maseualmej kiitaj Biblia kej toTeotsij iTlajtol. Yeka, kema kipouaj uan kichiuaj tlen kiijtoua, kimatij kenijkatsa kinechkauiaj toTeotsij uan kikuamachiliaj kenke itstokej.
Biblia kitekiuia nopa tlajtoli titlaneltokas, o kuali timouikas ika toTeotsij, kema kiijtoua kenijkatsa kinamiki timonejnemiltisej (Judas 18, 19). Se maseuali katli amo tlaneltoka amo motemachia ipan toTeotsij uan kichiua san tlen ya moiljuia. Uan se maseuali katli kena tlaneltoka, nochipa kikaua toTeotsij ma kiyakana (Efesios 5:1).
XIMOTEMACHI IPAN TLEN TIJCHIA
TLEN BIBLIA TETLAJTOLMAKA: “Intla timotlatskanekis tonaya ipan moteki, noja más kaxantias mofuerza para tijtlamiltis” (Proverbios 24:10).
¿TLAKE KIIJTOSNEKI? Kema tlauel timokuesouaj o timoyolkokouaj, tochikaualis kaxani uan ayokmo tiuelij tikixnamikij tlaouijkayotl. Uan kema tlauel timotemachiaj ipan tlen tijchiaj, techpaleuia ma tikilnamiktokaj amo nochipa tijpixtosej kuesoli. Nojkia tikilnamikij maske titlaijiyouiaj, nojua techpano kuajkuali tlamantli.
¿TLAKE UELIS TIJCHIUAS? Ximoiljui teipa kuali tiitstos uan tiyolpakis. Amo ximotekipacho ika tlamantli tlen ueliskia panos, uan amo ximoiljui tijchiuas tlen timosentlalijtok kema ayokmo tijpias kuesoli, xijchiua kampeka nama tijchiuas. Uan xikilnamikto kemantika panos se tlenijki tlen mitstsakuilis (Eclesiastés 9:11). Maske kiampa pano, teipa nochi kuali kisa. Biblia kineskayotia ni tlamantli ika tlen kichiua se milchijketl: “Xijsenuikili xijtoka moxinach ika ijnalok uan nojkia xijtoka ika tiotlak. Pampa axtijmati [tlake] xinachtli ixuas uan kisas más kuali. Uelis más ixuas tlen tijtojki ika ijnalok, o uelis tlen tijtojki ika tiotlak o uelis nochi ome iuikal kipiasej inintlajka tlen kuali” (Eclesiastés 11:6).
XIKITA KENIJKATSA MONANKILIA TLAJTLANILI TLEN TLAUEL IPATI
TLEN BIBLIA TETLAJTOLMAKA: “Xinechmaka tlalnamikistli [...]. Motlajtol senkistok melauak” (Salmo 119:144, 160).
¿TLAKE KIIJTOSNEKI? Biblia techixtomilia miak tlamantli tlen tijnekij tijmatisej. Ni eli san se keski tlajtlanili:
¿Kenke tiitstokej?
¿Kenke tlauel titlaijiyouiaj?
¿Tlake techpano kema timikij?
¿Tlake timotemachiaj tijselisej teipa?
Ipan ni tonali, miakej maseualmej tlen nochi Tlaltipaktli itstokej ika pakilistli pampa kiitstokej kenijkatsa Biblia kinankilia ni uan sekinok tlajtlanili.
¿TLAKE UELIS TIJCHIUAS? Tijnekiskiaj nojkia xikita tlake tlamachtia Biblia. Xikiljui se tlen Jehová itlajtoltemakauaj ma mitspaleui tijkuamachilis. Nojkia uelis tikitas kampa titlamachtiaj ipan Internet ipan jw.org, o tias ipan se tlanechikoli kampa timosentiliaj. Amo mitsinamasej kema tikalakis yon amo mitstlajtlanisej tomij kema nopaya tiitstos.
TLEN NOJKIA MITSPALEUIS
Xikita nopa video ¿Kenke moneki timomachtis Biblia? ipan jw.org, eltok ipan kipano 880 tlajtoli.
XIJKAUA TOTEOTSIJ MA MITSYAKANA
“Pakij katli kimatij moneki momachtisej toTeotsij iTlajtol” (MATEO 5:3, TNM).
KUALI XIKIXMATI TOTEOTSIJ KATLI KICHIJCHIJKI BIBLIA
“Ximonechkauikaj kampa toTeko uan yajaya inmechnechkauis” (SANTIAGO 4:8).
XIJPOUA UAN XIMOYOLILJUI IPAN BIBLIA
“Paki nopa tlakatl tlen [...] kichijtinemi tlen kiijtoua itlanauatiljuaj toTeko, * uan ipan nopa tlanauatili moyoliljuijtinemi tonaya uan tlayoua. [...] Nochi tlen kichiua kisa kuali (SALMO 1:1-3).
^ párr. 23 Biblia kiijtoua toTeotsij motokaxtia Jehová.
Tlen nojkia mitspaktis tikitas
TLEN BIBLIA KINANKILIA
¿Tlake kiijtosneki kuali titlaneltokas? ¿Moneki tiitstos ipan se religión uan kiampa titlaneltokas?
Xikita eyi tlamantli tlen mitspaleuis kuali titlaneltokas, uan xikita naui tlamantli tlen amo melauak tlen sekinok kiijtouaj kema se akajya tlaneltoka.
¿Nojkia uelis nechpaleuis Biblia?
Maske Biblia tlauel uejkajkia kiijkuilojkej, tlen tetlajtolmaka tlauel tepaleuia.
