Xikita kenijkatsa kinpaleuijtok se keskij maseualmej pampa kipouaj Biblia uan kichiuaj tlen tetlajtolmaka.

“Nama tlauel kuali niitstok. Nojkia nechpaleuijtok kuali ma nijyolmati uan ma nimoiljui ipan tlamantli tlen kuali. Nikita kej kinamiki tlen nechpano” (Fiona).

“Tlen nimomachtijtok ipan Biblia nechpaleuijtok tlauel ma niyolpaki” (Gnitko).

“Tlauel nechpaleuijtok pampa ayokmo tlauel nitekiti uan nama miak tonali niitstok ininuaya nochampoyouaj” (Andrew).

Amo san inijuantij kinpaleuijtok tlen Biblia tlamachtia. Ipan nochi Tlaltipaktli miakej maseualmej kinpaleuijtok ipan ininnemilis tlen Biblia tetlajtolmaka.

Ma tikitakaj kenijkatsa Biblia uelis mitspaleuis ipan ni tlamantli:

• Xijmokuitlaui motlakayo

• Xijnauati tlen tijyolmati

• Mochampoyouaj uan mouampoyouaj

• Kuali xijtekiui tomij

• Kuali ximouika ika toTeotsij

Tlen moixtomas ipan ni pilamochtsi kinextis kenijkatsa Biblia nelia eli toTeotsij iTlajtol, uan nojkia kenijkatsa uelis techpaleuis mojmostla ipan tonemilis.