Xijmokuitlaui motlakayo
Maske Biblia amo kiijtoua kenijkatsa timopajtisej, kena kiijtoua moneki tijmokuitlauisej totlakayo. Ma tikitakaj kenijkatsa tlen Biblia tetlajtolmaka uelis techpaleuis amo ma timokokokaj.
MA TIJMOKUITLAUIKAJ TOTLAKAYO
TLEN BIBLIA TETLAJTOLMAKA: “Axaka kitlauelkaua itlakayo. Nochi tlakamej kitlamakaj inintlakayo uan kimokuitlauiaj ika teiknelijkayotl” (Efesios 5:29).
¿TLAKE KIIJTOSNEKI? Ni texto techpaleuia ma tikitakaj tlauel moneki tijmokuitlauisej totlakayo. Tepajtianij kiitstokej miakej mokokouaj pampa amo kichiuaj tlen kipaleuia inintlakayo. Uajka, tlaj tijchiuas tlen kinamiki, amo tlauel timokokos.
¿TLAKE UELIS TIJCHIUAS?
Kuali ximotlamaka. Xijchiua kampeka tijkuas tlakualistli tlen kipaleuis motlakayo uan nochipa xiatli miak.
Xijpaleui motlakayo. Maske ya tiueyi o nojua titelpokatl, tlauel mitspaleuis tlaj tijchiuas tlamantli tlen kipaleuis motlakayo. Uelis tijchiuas miak tlamantli maske timokokoua o maske amo kuali tekiti se tlenijki ipan motlakayo. Maske mochampoyouaj o se tepajtijketl uelis mitspaleuisej xijchiua se keski tlamantli, san ta tijtlapejpenis tlaj tijchiuas tlen kipaleuis motlakayo o amo.
Kuali xikochi. Maseualmej katli amo tlauel uejkauaj kochij, teipa tlauel mokokouaj. Miakej tlauel mokochsojsolouaj pampa tlauel uejkauaj tekitij uan amo mosiajketsaj kej kinamiki. Yeka, tlaj tijchiuas kampeka tikochis kej kinamiki, mitspaleuis kuali xiitsto.
AMO XIJCHIUA TLEN AMO MITSPALEUIA
TLEN BIBLIA TETLAJTOLMAKA: “Ma timoiyokatlalikaj tlen nochi tlamantli tlen kiijtlakos totlakayo” (2 Corintios 7:1).
¿TLAKE KIIJTOSNEKI? Amo tlauel timokokos tlaj amo tijchiuas tlamantli tlen kitlanauis motlakayo, kej kema titlachichina. Nopa kichijtok tlauel miakej ma mokokokaj uan ma mikikaj.
¿TLAKE UELIS TIJCHIUAS? Xikijto tlake tonali tijkauas titlachichinas, xikijkuilo ipan se calendario uan xikiljui se akajya katli tijmati nelia mitspaleuis. Kema nechka asis nopa tonali, xijtlamitepeua cigarros uan nochi tlamantli tlen tijtekiuia kema titlachichina. Uan amo xipano yon xia kampa tlachichinaj.
TLEN NOJKIA MITSPALEUIS
Tlaj tijneki se Biblia, xijtlajtlani se tlen Jehová itlajtoltemakauaj katli itstok nechka mochaj.
XIMOMOKUITLAUI
“Kema se akajya tlen inmojuantij kichiuas se kali yankuik, moneki kitlalilis se tepamitl itejteno kalpani, uan keja nopa axkiuikas tlajtlakoli ipampa ieso se tlen axmomokuitlauis uan mokuatepexiuis tlen kalpani uan mikis” (DEUTERONOMIO 22:8).
AMO NIMA XIKUALANI
“Se tlakatl tlen ouij para kualanis kimachilis miak tlamantli. Pero se tlen nimantsi kualani kinextia iuiuiyo” (PROVERBIOS 14:29).
AMO SAN XITLAKUAJTO
‘Amo ximosansejkotili ininuaya katli san kinpaktia tlakuajtosej maske ayokmo mayanaj’ (PROVERBIOS 23:20).
