TLEN BIBLIA TETLAJTOLMAKA: “Más kuali tlen kipias iyolo uan axkualani que tlen itstok tetik” (Proverbios 16:32).

¿TLAKE KIIJTOSNEKI? Tlauel mitspaleuis tlaj tijmatis kenijkatsa tijnauatis tlen tijyolmati. Maske kemantika kinamiki tikualanis, tlaj amo timonauatia, teipa uelis panos tlen amo kuali. Nochi tikitstokej kenijkatsa kema se maseuali amo monauatia uan tlauel kualani, kiijtoua o kichiua tlen amo kuali uan teipa moyolkokoua pampa kiampa kichijki o kiijtok.

¿TLAKE UELIS TIJCHIUAS? Tlaj amo tijnauatis mokualankayo, uajka ayokmo uelis tijtsakuilis, yeka xijchiua kampeka amo nima tikualanis. Maske miakej moiljuiaj kinextiaj kipiaj chikaualistli kema kualanij, nopa amo nelia pampa nesi amo uelij monauatiaj. Biblia kiijtoua: “Se tlakatl tlen axueli motsakuilia para axkualanis [...] nelia mauilili keja se altepetl tlen axkipia tepamitl yaualtik para kimanauis” (Proverbios 25:28). Tlaj achtoui tijmatis nochi tlen panotok, mitspaleuis amo xikualantiuetsi. “Se tlakatl tlen tlamachilia axyolkentsi” (Proverbios 19:11). Tlaj kuali tikintlakakilis katli ininuaya timokualanik, mitspaleuis xijkuamachili nochi tlen panok uan amo nima tikualanis.

TLEN BIBLIA TETLAJTOLMAKA: “Nochipa ximotlaskamatikaj” (Colosenses 3:15).

¿TLAKE KIIJTOSNEKI? Sekij kiijtouaj san yolpakij katli tetlaskamatiliaj. Nojkia kiampa kiijtouaj katli kipolojkej tlen kipixtoyaj o mijki se katli kiikneliyayaj. Kiijtouaj pampa kitlaskamatij tlen nama kipiaj uan amo mosentlaliaj ipan tlen kipolojtokej, kinpaleuijtok amo ma moyoliljuikaj ipan tlamantli tlen kinyolkokoua.

¿TLAKE UELIS TIJCHIUAS? Mojmostla xikijkuilo se keski tlamantli tlen tijtlaskamatis. Amo moneki elis uejueyi tlamantli, uelis tikijkuilos tlen sekinok kiilkauaj, kej kema tlanesi, pampa tikamanaltik iuaya se mouampo o se tlen mochampoyouaj, o pampa nojua titlanexilik. Tlaj timosentlalis tijchiuas ni, mitspaleuis kuali xijyolmati.

Uan nojkia tlauel mitspaleuis tlaj tikintlaskamatilis mochampoyouaj uan mouampoyouaj. Ximoiljui kenke tikinpatiita uan xikiniljui nopa kema tikamanaltis ininuaya, o uelis tikintitlanilis se amatlajkuiloli, se mensaje o se correo electrónico. Kiampa nojua kuali timouikas ininuaya uan tlauel tiyolpakis pampa tijchiua tlen kinpaleuia sekinok (Hechos 20:35).

AXXITEKUALANKANOJNOTSA

“Se tlen kipeualtis se kualantli eltok keja se tlen kitsintlapos se atemitl para ma pano ipan ichaj, elis ouij teipa para kiketsas. Uajka achi kuali xijkaua [...] uan amo xijpeualti” (PROVERBIOS 17:14).

AMO XIMOTEKIPACHO IKA TLEN PANOS TEIPA

“Amo ximokuesokaj tlen uelis panos mostla. Pampa mojmostla tijpantijtiauij kuesoli. Mojmostla achi kuali san timoiljuisej tlen nopa kuesoli tlen nopa tonal kiualikak” (MATEO 6:34).

ACHTOUI XIMOILJUI TLAKE TIJCHIUAS

“Pampa tielis titlalnamiki uan tijmatis miak, motlalnamikilis mitsmokuitlauis. Kena, tlen tijmatis mitschiuas para tiitstos ika temachili” (PROVERBIOS 2:11).