Maske tlauel kinpaleuia, nojkia uelis kipanos ni tlamantli katli san kitekiuiaj Internet kema monojnotsaj ininuaya sekinok:

• Amo nelnelia kikuamachilisej tlen kiyolmatij ininuampoyouaj.

• Kiyolmatisej itstokej ininselti uan moyolkokosej.

• Amo kintekipachos tlen kinpanos sekinok.

XIJKUAMACHILI TLEN KIYOLMATIJ SEKINOK

Moneki timoiljuisej ipan sekinok tlaj tijnekij tijkuamachilisej tlen kiyolmatij. Tlaj nochipa tijpouaj tlen kitlaliaj ipan Internet, tijtlejkoltiaj miak tlamantli uan nima titlanankiliaj, amo tijkuamachilisej tlen kiyolmatij.

Tlaj nochipa tijtekiuijtokej Internet, teipa ayokmo tikinnankilisej touampoyouaj ika pakilistli. Tlaj kiampa techpanos, teipa san tikinnankilijtiuetsisej nochi katli techtlajkuiljuiliaj uan ayokmo tijpaleuisej katli amo kuali kiyolmati.

XIMOILJUI NI: ¿Kenijkatsa uelis tijnextis tikinkuamachilia mouampoyouaj kema tikinnojnotsa? (1 PEDRO 3:8).

TIMOYOLKOKOS

Se keskij ixtlamatinij kiijtouaj miakej maseualmej amo kuali kiyolmatkej kema tlauel uejkajkej kitlachilijtoyaj se red social. Nojkia kiitakej kema tijtlachiliaj tlen kitlaliaj uan tlen kiijtouaj sekinok, uelis kichiuas ma tijyolmatikaj “amo tijchijtokej se tlamantli tlen tlauel ipati”.

Uan kema tikitaj tlaixkopinkayomej kampa nesij tlauel yolpakij, uelis kichiuas ma timoiljuikaj san inijuantij kiampa itstokej uan tojuantij amo timopakilismakaj.

XIMOILJUI NI: ¿Tlake mitspaleuis amo san timoiljuis ipan tlen sekinok kichiuaj kema tijtekiuis redes sociales? (GÁLATAS 6:4).

SAN IPAN TA TIMOILJUIS

Se tlamachtijketl kiijtok se keskij telpokamej san moiljuiaj ipan inijuantij uan mouampojchiuaj san ininuaya katli kinmakaj se tlenijki uan kinpaleuiaj. * Kiampa kichiuaj pampa kinekij nochipa ma kinpaleuikaj. Yeka se akajya uelis kinitas iuampoyouaj kej aplicaciones tlen kipia se celular, tlen uelis kitekiuis uan kitsakuas kema kinekis.

 XIMOILJUI NI: ¿Tijnextia ika tlen tijtlalia ipan Internet san ta tijpia miak tlamantli uan san ipan ta timoiljuia? (GÁLATAS 5:26).

XIMOILJUI KENIJKATSA TIJTEKIUIA INTERNET

Tlaj tijtekiuia Internet kej kinamiki uan amo mitstonalpoloua, uelis timonojnotsas ininuaya mouampoyouaj uan mitspaleuis nojua kuali ximouika ininuaya.

Xikita tlake mitspaktiskia tijchiuas o xikijkuilo:

• Nojua tlauel nikamanaltis ininuaya sekinok uan amo san nikintlajkuiljuilis o nikintitlanilis correos electrónicos.

• Amo nijtekiuijtos celular kema nikamanaltis ininuaya sekinok o nijchiuas amo ma kakisti.

• Ayokmo tlauel nikitas tlen kitlaliaj ipan redes sociales.

• Kuali nikintlakakilis sekinok.

• Nijnojnotsas o nijtlajkuiljuilis se nouampo katli amo kuali itstok.