Tlen Biblia tlamachtia kinpaleuia maseualmej kuali ma monejnemiltikaj. Ma tikitakaj kenijkatsa kinpaleuik Ricardo uan Andrés.

RICARDO. Kema nijpixtoya 15 xiuitl, nimokalakik ipan se pandilla. Pampa nieliyaya nipiltelpokatsi, nojkia pejki nijchiua tlen nouampoyouaj kichiuayayaj. Na nijnekiyaya se tonali ma nechtsakuakaj ipan cárcel matlaktli xiuitl. Maske san se katli uiuitik moiljuiskia nopa, kampa na niitstoya tlauel kintlepanitayayaj katli kintsaktoyaj. Na nojkia nijnekiyaya ma nechtlepanitakaj kej inijuantij.

Tlauel niauilnemiyaya, nijtekiuiyaya drogas uan tlauel nimosisiniyaya. Se youali timototopotskej ininuaya sekinok. Maske nimoiljuik nechmiktiskiaj, uelki nimochololtik. Kema panok nopa, pejki nimoiljuia tlake nijchiuayaya ika nonemilis. Maske nimosentlalik nijpatlas kej nimonejnemiltiyaya, ¿kenijkatsa nijchiuaskia nopa? ¿Ajkia nechpaleuiskia?

Miakej nouikaljuaj o noteixmatkauaj kipixtoyaj miak kuesoli uan amo itstoyaj ika pakilistli. Se notío ichampoyouaj amo kiampa eliyayaj. Na nijmajtoya inijuantij kipixtoyaj kuali ininyolo uan kichiuayayaj tlen Biblia tlamachtia. Inijuantij nechiljuijtoyaj toTeotsij itoka Jehová. Yeka, kema ya nimototopotstoya ininuaya sekinok, nijtekiuik toTeotsij itoka kema nimomaijtok uan nikiljuik ma nechpaleui. San nimosentlachilik kema ualmostla se tlen Jehová itlajtoltemakauaj panok nochaj. Uan ya pejki nechmachtia ika Biblia.

Teipa nijpixki se ueyi tlaouijkayotl. Katli achtouia eliyayaj nouampoyouaj nechnojnotsayayaj uan nechiljuiyayaj sampa ma ninemi ininuaya. Maske nijmatki ouij, nikiniljuik ayokmo nijnekiyaya. Nimosentlalijtoya amo nijkauas nimomachtis Biblia, uan tlauel niyolpaki pampa kiampa nijchijki. Nelia nijpatlak nonemilis uan nama tlauel niyolpaki.

Achtouia na nijnekiyaya ma nechtsakuakaj matlaktli xiuitl pampa nijnekiyaya ma nechtlepanitakaj, yeka nikiljuik toTeotsij ma nechkaua nijtekipanos maske san matlaktli xiuitl, kiampa ueliskia nikinpaleuis maseualmej ika Biblia kej na nechpaleuijtoyaj. ToTeotsij nelia nechtlakakilik pampa ya nijtekipanojtok 17 xiuitl. Uan amo kema nechtsajkej.

Katli achtouia eliyayaj nouampoyouaj uejkauas kintsaktosej, uan sekij kinmiktijkej. Tlauel nikintlaskamatilia nouikaljuaj katli elij Jehová itlajtoltemakauaj pampa inijuantij amo monejnemiltiyayaj kej sekinok, uan pampa kichiuayayaj tlen Biblia tlamachtia. Nelia tlauel nikintlepanita uan amo kej katli itstokej ipan se pandilla. Uan nojua tlauel nijtlaskamatilia toTeotsij Jehová pampa nechmachtik kenijkatsa kuali nimonejnemiltis.

 ANDRÉS. Nitlakatki uan nimoskaltik kampa itstoyaj maseualmej katli teikneltsitsij, kampa kitekiuiyayaj drogas, momiktiyayaj, tlachtekiyayaj uan kampa maseualmej tlainamayayaj pampa motekayayaj ininuaya. Notata tlauel moiuintiyaya uan kitekiuiyaya cocaína. Nochipa motlaijiljuiyaya iuaya nonana uan moteuiyayaj.

Kema nieliyaya nipiltelpokatsi pejki nimoiuintia uan nijtekiuia drogas. Amo niitstoya nochaj, san nitlachtektinemiyaya uan nijnamakayaya tlen nikichtekiyaya. Kema panok se keski xiuitl, notata kinekiyaya kuali mouikas nouaya, yeka nechnextilik kenijkatsa nijualikas drogas uan sekinok tlamantli uan kiampa nijnamakas ipan noaltepe. Nimantsi nijtlanki miak tomij. Se tonali, policías asitoj nochaj, nechitskijkej uan nechtsajkej makuili xiuitl pampa nijnejki nitemiktis.

Se tonali, nochi katli techtsaktoyaj techiljuijkej ma tiakaj kampa Jehová itlajtoltemakauaj tlamachtiskiaj, uan na niajki. Melauak nochi tlen tlamachtijkej, yeka nijnejki ma nechmachtikaj ika Biblia. Jehová itlajtoltemakauaj xitlauak nechmachtijkej tlen Biblia kiijtoua, uan kenijkatsa toTeotsij kineki ma timonejnemiltikaj.

Nikitak tlaj nijnekiyaya nijpatlas nonemilis, monekiyaya ma nechpaleuikaj. Kampa nitsaktoya sekij amo kinpaktiyaya ma nimomachti Biblia, yeka kinekiyayaj nechchiuilisej tlen amo kuali. Nikiljuik Jehová ma nechmaka tlalnamikilistli uan ma nechpaleui nikijiyouis. Ika itlapaleuil, uelki nikixnamijki nopa tlaouijkayotl uan nikiniljuik tlen nijyekojtiauiyaya.

Kema nikiski ipan carcél amo nijmatiyaya tlake nijchiuaskia, yeka nimoiljuiyaya kualtiaskia nojua nimokauas nopaya. Kema nikiski, sekij katli tsaktoyaj yajkej nechtlajpalouaj, uan sekinok nechiljuijkej ika tlaiknelili ma nitlakuepili nochaj.

Amo nijneki nimoiljuis kenijkatsa niitstoskia tlaj amo nijkajtoskia toTeotsij ma nechmachti. Yeka, tlauel nijtlaskamatilia pampa nechiknelia uan pampa kiitak ueliskia nijpatlas nonemilis. *