¿Kenijkatsa uelis tijnextisej tlatlepanitakayotl ika sekinok?
¿KENKE MONEKI TIKINTLEPANITAS SEKINOK?
Tlaj tikintlepanitaj sekinok, techpaleuis amo ma timokualanikaj ininuaya uan amo ma moueyili se kualantli.
-
Biblia kiijtoua: “Kema se akajya kinankilia ika yejyektsi seyok tlen kualantok, nimantsi kiseseltia. Pero intla kinankilis chikauak, achi más kikualankamakas” (Proverbios 15:1). Kema se akajya amo tlanankilia ika tlatlepanitakayotl uan amo tlatlepanita, más kiueyilia se kuesoli. Uan nojkia kichiua amo kuali ma mouika ininuaya sekinok.
-
Jesús kiijtok: “Tlen tikijtouaj, ya nopa eltok ipan toyolo” (Mateo 12:34). Tlaj amo kuali tikinnojnotsaj sekinok, uelis titekualankaitaj ipan toyolo. Tlen tikijtouaj, kinextia kenijkatsa tikinitaj katli amo elij sanse kej tojuantij, katli euaj ipan sekinok altepemej o katli momajtokej kichiuaj sekinok tlamantli. Uajka, moneki tojuantij tijpatlasej kej timoiljuiaj.
Kema kintlatsintokijkej kipano 32 mil maseualmej ipan 28 altepemej kenijkatsa kinitaj maseualmej, se 65% kiijtok ipan ni tonali ayokmo tlatlepanitaj.
¿TLAKE UELIS TIJCHIUAS?
Xikintlepanita nochi katli ininuaya tikamanalti maske amo moiljuiaj sanse kej ta. Xijchiua kampeka tikamanaltis ininuaya sekinok tlen se tlamantli tlen amo kichiuas ximokualanikaj, kiampa amo tikinijilnamikis yon tikinkualankaitas.
Xikinchiuili sekinok tlen mitspaktiskia ma mitschiuilikaj. Tlaj tikiniknelia sekinok uan tikinchiuilia tlen kuali, inijuantij nojkia mitsiknelisej.
Xijchiua kampeka titetlapojpoljuis. Tlaj se akajya mitsyolkokok ika tlen kichijki o ika tlen kiijtok, xijchiua kampeka timoiljuis amo kinekiyaya kiampa kichiuas uan xijtlapojpoljui.
¿TLAKE KICHIUAJ JEHOVÁ ITLAJTOLTEMAKAUAJ?
Maske kampa ueli tiitstokej o titekitij, tijchiuaj kampeka tikintlepanitasej sekinok uan tikinpaleuiaj nojkia kiampa ma kichiuakaj.
Tikiniljuiaj sekinok uelis tikinmachtisej ika Biblia uan amo tikininamasej. Maske kiampa tikiniljuiaj, amo tikinchiualtiaj ma moiljuikaj kej tojuantij yon ma kineltokakaj tlen tijneltokaj. Tojuantij tijchiuaj kampeka tikinmachtisej sekinok “ika yamanik uan ika tlatlepanitakayotl” (1 Pedro 3:15; 2 Timoteo 2:24).
Amo titechikoitaj. Ipan tlanechikoli kuali tikinseliaj nochi katli kinekij momachtisej Biblia maske kampa ueli euaj. Nojkia tijkauaj inijuantij ma kitlapejpenikaj tlake kichiuasej pampa tikintlepanitaj (1 Pedro 2:17).
Tikintlepanitaj tekichiuanij kampa tiitstokej (Romanos 13:1). Tijchiuaj tlen technauatiaj uan titlaxtlauaj impuestos. Maske amo timokalakiaj ipan política, tijtlepanitaj tlen sekinok kitlapejpeniaj kichiuasej.
