¿Kenijkatsa uelis tijnextisej tlatlepanitakayotl ika nemilistli?

Ma kakisti ipan

¿KENKE MONEKI TIJPATIITAS NEMILISTLI?

Kema tijchiuaj tlen techtlanauia o kintlanauia sekinok, tijnextiaj amo tijpatiitaj tonemilis yon ininnemilis sekinok.

Katli tlachichina uelis kipias cáncer uan nojkia uelis ouij mochikauas tlaj kipia ni kokolistli. Se 90% maseualmej katli kipiayayaj cáncer ipan inineltapach uan mijkej, eli pampa tlachichinayayaj o pampa itstoyaj inechka katli kichichinayaya iyatl.
Sejse xiuitl, miakej maseualmej kinmajmatiaj pampa tlatotopotsaj. Nopa Universidad tlen Stanford (Estados Unidos), kiijtok: “Ixtlamatinij kiijtouaj maske sekij amo kintoponiaj [kema itstokej ipan escuela], teipa nochipa majmauij pampa moiljuiaj sampa tlatotopotsasej”.
Kema se akajya kinemiltia carro iuintitok o kema kitekiuijtok drogas, uelis kitomonis se akajya katli nojkia kiuika carro o katli yaui ipan nopa ojtli. Miakej kinpanotok tlen amo kuali pampa sekinok amo kapatiitaj nemilistli.

¿TLAKE UELIS TIJCHIUAS?

Xijchiua kampeka kuali tiitstos. Maske ya uejkajtok tijchichina cigarros o cigarros electrónicos, tlauel titlai o tijtekiuia drogas, nojua uelis tijkauas uan tijmokuitlauis monemilis. Ni tlamantli mitstlanauia, kinextia amo tijpatiita monemilis, ininnemilis sekinok uan tlen mochampoyouaj.

“Ma timokixtilikaj nochi tlen kisokiuia totlakayo” (2 Corintios 7:1).

Ximomokuitlaui. Xijkualchijchiua mochaj uan kiampa amo panos tlen amo kuali. Amo san kej ueli xijnemilti mocarro uan xijkualchijchijtinemi. Amo xijkaua sekinok ma mitschiualtikaj timauiltis ika se tlenijki tlen ueliskia mitskokos o mitsmiktis.

“Kema akajya tlen inmojuantij kichiuas se kali yankuik, moneki kitlalilis se tepamitl itejteno kalpani, uan keja nopa axkiuikas tlajtlakoli ipampa ieso se tlen axmomokuitlauis uan mokuatepexiuis tlen kalpani uan mikis” (Deuteronomio 22:8). a

Xikinikneli sekinok. Tijnextiaj tijpatiitaj nemilistli kema amo tikinchikoitaj katli momajtokej kichiuaj sekinok tlamantli, katli euaj sejkanok, katli amo kipiaj tomij o katli amo tlauel momachtijtokej. Kema maseualmej techikoitaj uan tekualankaitaj, kichiua ma mokualanikaj uan ma onka tlauilankayotl.

“Ayokmo ximokualankamakakaj ika tlen inmechchiuilijkej, ayokmo ximosisinikaj, ayokmo xikualanikaj, ayokmo xitekuatsajtsilikaj yon xijtekiuikaj tlajtoli tlen teyolkokoua, uan nojkia ayokmo xijchiuakaj yon kentsi tlen amo kuali. Más kuali xijpiakaj kuali inmoyolo se ika seyok” (Efesios 4:31, 32).

¿TLAKE KICHIUAJ JEHOVÁ ITLAJTOLTEMAKAUAJ?

Tikinmachtiaj sekinok kenijkatsa kimokuitlauisej ininnemilis. Kema tikinmachtiaj ika Biblia, miakej maseualmej kipatlaj ininnemilis uan ayokmo kitekiuiaj tlen kintlanauia.

Tijmokuitlauiaj tonemilis kema tikalchiuaj. Nochi katli tlapaleuiaj kampa kichijchiuaj o kikualchijchiuaj kali kampa titlaueyichiuaj, kinmachtiaj kenijkatsa momokuitlauisej para amo molekuenisej o amo kinpanos tlen amo kuali. Nochipa kitlachilijtinemij kenijkatsa eltok nopa kali uan kiampa amo kiixpanosej nopa tlanauatili tlen eltok ipan se altepetl, kampa kiijtoua moneki kuali eltos nopa kali.

Tikinpaleuiaj katli kintlasosoljuilia se tlenijki. Ipan se xiuitl, se 200 tlamantli kintlasosoljuilik miakej maseualmej ipan nochi Tlaltipaktli. Jehová itlajtoltemakauaj tlapaleuijkej uan motekiuik 12 millones dólares kema tikinpaleuijkej katli kintlasosoljuilik se tlenijki.

Kema pejki momoyaua nopa kokolistli Ébola ipan África Occidental (2014) uan ipan República Democrática del Congo (2018), Jehová itlajtoltemakauaj kinmachtijkej maseualmej tlake kichiuasej para ayokmo ma momoyaua ni kokolistli. Kintitlankej se keskij toikniuaj ma kiixtomakaj nopa tlamachtili “Tlauel techpaleuia kema titlaneltokaj” uan miakej maseualmej kikajkej. Nojkia, kalteno kampa timonechikouaj kitlalijkej kampa ueliskia timomajtekisej. Kiniljuijkej maseualmej nochipa monekiyaya momajtekisej uan momokuitlauisej para ayokmo momauasej.

Ipan Sierra Leona, ipan radio kiijtojkej kuali tlen kichiuayayaj Jehová itlajtoltemakauaj pampa kiniljuiyayaj katli yauiyayaj ipan ininreligión kenijkatsa ayokmo momauaskiaj ika kokolistli Ébola.

Ipan se kali kampa mosentiliaj Jehová itlajtoltemakauaj ipan Liberia, momajtekiaj pampa momoyajki nopa kokolistli Ébola ipan 2014.

a Ni tlanauatili tlen kinmakakej uejkajkia ipan Oriente Medio, kinextia moneki tijpatiitasej nemilistli.

¡XITLACHIXTOKAJ!