5 ¿Asis se tonali kema ayokmo titlaijiyouisej?
¿Kenke moneki tijmatis?
Tlauel techpaleuis ma tikitakaj tonemilis ika pakilistli tlaj timotemachisej se tonali nelia tlamis tlaijiyouilistli. Uan nojkia techpaleuis ma tijmatikaj toTeotsij amo kichiua tlen amo kuali.
Ximoiljui ni
Maske miakej maseualmej kinektokej kitlamiltisej tlaijiyouilistli, amo uelij kitlamiltiaj miak tlamantli. Xikita se keski tlamantli:
Maske tepajtianij momachtijtokej miak tlamantli...
-
... miakej maseualmej amo kuali tekiti ininyolo, yeka san nopa kokolistli tlauel miakej kinmiktia ipan nochi Tlaltipaktli.
-
... sejse xiuitl, nopa cáncer tlauel miakej kinmiktia.
-
... ipan pilamochtsi Frontiers in Immunology, David Bloom kiijtok “miakej maseualmej kinasi kokolistli tlen tlauel mauilili. Nojkia kistok sekinok yajyankuik kokolistli uan sekinok uejkajkia onkayaya”.
Maske ipan se keski altepemej tlauel tlatominpiaj...
-
... sejse xiuitl tlauel miakej konemej mikij, uan tlauel kiampa pano ipan pilaltepetsitsij kampa amo kipiaj tlen ika mopanoltisej.
-
... tlauel miakej maseualmej itstokej kampa amo onka kanke tlasoltepeuasej.
-
... tlauel miakej maseualmej itstokej kampa amo onka atl tlen kiisej.
Maske onka miak tlanauatili tlen kinmanauia maseualmej...
-
... ipan miak altepemej nojua kinichtekij uan kinnamakaj maseualmej. Nopa Naciones Unidas kiijtok uelis ipan se keskij altepemej amo tleno kichiuaj “pampa tekichiuanij amo kimatij tlaj pano nopa tlamantli o amo kipiaj tomij tlen ika uelis kiixnamikisej”.
TLAJ NOJUA TIJNEKI TIJMATIS
Xikita nopa video ¿Tlake nopa toTeotsij iTlanauatijkayo? ipan jw.org/nch.
Tlen Biblia kiijtoua
ToTeotsij kitekipachoua tlen techpano
ToTeotsij moyolkokoua kema titlaijiyouiaj.
“[ToTeotsij,] axtitechilkajtok kema titlaijiyouiaj, niyon axtitechuejkamajkajtok. Axneli titechixtlatilia. ¡Axtle! Ta tinechtlakakilia kema timitstlajtlaniaj xitechpaleuiki” (SALMO 22:24).
“Xikiljuikaj toTeko nochi inmokuesol uan xijkauakaj imako, pampa yajaya inmechmokuitlauia” (1 PEDRO 5:7).
Amo nochipa titlaijiyouisej
Biblia kiijtoua toTeotsij kitlamiltis tlaijiyouilistli.
“ToTeko kinuachilis nochi ininixayo. Uan ayok kema aki mikis, niyon mokuesos, niyon chokas” (APOCALIPSIS 21:3, 4).
ToTeotsij kitlamiltis nochi tlen techtlaijiyouiltia
Nopa kichiuas ika iTlanauatijkayo uan Biblia kiijtoua nelia eltok nopa tlanauatijkayotl.
“ToTeko Dios tlen itstok iluikak kiketsas se tlanauatilistli [...] tlen axaka uelis kisemanas, niyon axkikauas nopa itlanauatilis ika seyok. [...] Uan nopa tlanauatijketl tlen toTeko kitlalijtos uejkauas para nochipa” (DANIEL 2:44).
