Kema tetajmej kuali monojnotsaj ininuaya ininkoneuaj, kiijtouaj tlen moiljuiaj uan tlen kiyolmatij.

Kemantika uelis ouij tijmati tikamanaltis iuaya motelpoka o moichpoka, pampa kema nojua eliyaya pilsiltsi uelis mitsiljuiyaya nochi tlen moiljuiyaya uan nama pampa motelpokachijki ayokmo tlauel kineki kamanaltis mouaya. Yeka, ayokmo tijmati tlake moiljuia uan tlake kiyolmati, eli kejuak ta tiijkatok ipan se nali tlen se ueyatl tlen tlauel patlauak uan mokone ipan nopa seyok nali. Kema kiampa pano, sekij moiljuiaj ayokmo moneki kamanaltisej ininuaya inintelpokauaj, maske kiampa moiljuiaj, kena moneki monojnotsasej ininuaya.

Xijtlakakili mokone kema kinekis mitskamanaljuis. Kiampa xijchiua maske intlayouilisej.

“Kemantika uelis tijneki tikiljuis: ‘¡Se tonal tiitstoyaj sansejko, ¿uan nama tijneki tikamanaltis?!’. Amo kinamiki kiampa tikiljuis kema ya kinekis mitsiljuis tlen kiyolmati, pampa nochi tetajmej kinekij ininkoneuaj ma kiniljuikaj tlen kiyolmatij” (Lisa).

“Maske nechpaktia kualka nikochis, kemantika tlauel kuali nimonojnotstok ininuaya notelpokauaj kema ya panok tlajkoyoual” (Herbert).

TLEN BIBLIA TETLAJTOLMAKA: “Axaka ma kitemo tlen kuali para ya iselti, pero ma tijchiuakaj tlen kinpaleuis sekinok” (1 Corintios 10:24).

Amo xijchiua sekinok tlamantli. Se tetaj kiijtoua: “Kemantika kema nokoneuaj nechkamanaljuiaj, peua nimoiljuia ipan sekinok tlamantli uan inijuantij kiitaj amo kuali nikintlakakilia”.

Tlaj nojkia kiampa mitspano, xijseui televisión uan amo xikitskito moteléfono o motableta. Kuali xijtlakakili mokone, kiampa kiitas mitstekipachoua tlen kipano maske timoiljuis amo tlauel ipati tlen kiijtoua.

“Tokoneuaj moneki kiitasej techtekipachoua tlen kinpano. Tlaj amo kiampa kiitasej, uajka ayokmo tleno techiljuisej o kiniljuisej sekinok ma kinpaleuikaj” (Maranda).

“Amo xikualani kema mokone mitsiljuis se tlamantli tlen amo kinamiki” (Anthony).

TLEN BIBLIA TETLAJTOLMAKA: “Uajka xijpiakaj cuidado kejatsa inkikakij” (Lucas 8:18).

Nochipa ximokamanaljui ininuaya. Kemantika telpokamej kinpaktia kamanaltisej ininuaya inintatauaj kema kichijtinemij sekinok tlamantli.

“Tojuantij tikamanaltij kema tiauij tipaxalouaj. Tlauel kuali timokamanaljuiaj kema nokone moseuijti nonakastla uan amo, kema moseuijtok noixtla” (Nicole).

Kema intlakuasej nojkia uelis inmokamanaljuisej.

“Ika tlayoua, kema titlakuaj nochi tikijtouaj tlake kuali tlamantli techpanok uan tlake amo. Pampa kiampa timomajtokej tijchiuaj, techilnamikilia amo moneki toselti tijsenkauasej se kuesoli uan techpaleuia sansejko ma tiitstokaj” (Robin).

TLEN BIBLIA TETLAJTOLMAKA: “Nimantsi xijtlakakilikaj kuali kema seyok inmechkamauia. Pero kema inkinkamauiaj sekinok, xikinkamauikaj ika yamaktsi [o amo nima xikamanaltikaj]” (Santiago 1:19).