TETAJMEJ
8. Xijchiua tlen tijneki ma kichiuakaj
¿TLAKE KIIJTOSNEKI?
Kiijtosneki tlen tetajmej kichiuaj pampa kinekij ininkoneuaj nojkia kiampa ma kichiuakaj. Se okichpil amo kinekis kichiuas tlen itata kiiljuia tlaj kiita itata amo kineki kisas kema se akajya kitemoua uan kiniljuia ma kiijtokaj amo itstok.
“Miakej maseualmej kiijtouaj: ‘Xijchiua tlen nikijtoua uan amo tlen nijchiuaʼ, nopa amo kinpaleuia konemej. Tokoneuaj elij kej se ichkatl tlen nochi kiachichina pampa inijuantij kichiuaj uan kiijtouaj nochi tlen kiitaj uan kikakij. Tlaj tikiniljuiaj ma kichiuakaj se tlamantli uan kiitaj tojuantij amo kiampa tijchiuaj, inijuantij techiljuisej” (David).
TLEN BIBLIA TETLAJTOLMAKA: “Inkiniljuiaj sekinok ma axtlachtekikaj, pero inmojuantij intetlachtekiliaj” (Romanos 2:21).
¿KENKE TLAUEL MONEKI?
Konemej uan telpokamej kichiuaj tlen inintatauaj kichiuaj uan amo tlauel tlen kichiuaj katli ininuaya momachtiaj. Uajka, san inmojuantij intetajmej uelis kuali inkinyakanasej inmokoneuaj tlaj inkichiuasej tlen kuali.
“Maske uelis miakpa tikiniljuisej tokoneuaj ma kichiuakaj se tlamantli, uan timoiljuisej amo techtlakakilijtokej, kema sampatsi amo tijchiuasej tlen tikijtojkej, inijuantij nima techiljuisej” (Nicole).
TLEN BIBLIA TETLAJTOLMAKA: “Tlakamej tlen kipiaj nopa tlalnamikilistli tlen toTeko temaka [...] axkipiaj omej ixayak” (Santiago 3:17).
¿TLAKE UELISKIA TIJCHIUAS?
Ximotlatsintoki: “¿Nijnextia nikiknelia nosiua o noueue uan nokoneuaj? ¿Tlake nechpaktia nimauisos ipan televisión? ¿Ininuaya ajkia nimouika? ¿Nechtekipachoua tlen kinpano sekinok?”. Ximoiljui, ¿tijnekiskia mokoneuaj ma kichiuakaj tlen ta tijchiua?
“Noueue uan na amo tikiniljuiaj tokoneuaj ma kichiuakaj se tlamantli tlen tojuantij amo tijchiuaj” (Christine).
Xikijto ma mitstlapojpoljuikaj. Konemej kimatij inintatauaj nojkia mokuapolouaj. Yeka, tlaj kema timokuapoloua tikiljuia mosiua, moueue uan mokoneuaj ma mitstlapojpoljuikaj, tikinpaleuis nojkia amo ma moueyimatikaj uan ma kiijtokaj kema mokuapolosej.
“Moneki tikijtosej kema timokuapolouaj uan tikiniljuisej sekinok ma techtlapojpoljuikaj, pampa tlaj amo kiampa tijchiuaj, tokoneuaj nojkia amo kiampa kichiuasej” (Robin).
“Tojuantij uelis tikinpaleuisej tokoneuaj, yeka moneki kuali timonejnemiltisej pampa inijuantij ya nopa kiitaj. Tokoneuaj kiyekouaj nochi tlen tijchiuaj kema itstokej touaya” (Wendell).
