Katli tetlapojpoljuia kiilkaua tlen kichiuilijkej maske kiyolkokojkej uan amo uejkaua kualantok. Nopa amo kiijtosneki moiljuis amo tleno panok o amo elki se ueyi kuesoli.

TLEN BIBLIA TETLAJTOLMAKA: “Uajka xijpiakaj inmoyolo ika tlen inmechchiuiliaj tlen axkuali uan xikintlapojpoljuikaj. Intla se kiteiljuia seyok ika se tlenijki, ma kitlapojpoljui” (Colosenses 3:13).

“Kema tikiknelia se akajya, tikitas kenijkatsa kichiua kampeka kipatlas se keski tlamantli uan amo san tikitas kema mokuapoloua” (Aaron).

Tlaj uejkauas tikualantos uelis kichiuas ximokoko, amo kuali tijyolmatis uan ayokmo kuali tiitstos iuaya mosiua o moueue.

“Se tonali noueue kichijki se tlamantli tlen tlauel nechyolkokok uan nechiljuik ma nijtlapojpoljui. Maske ouij nijmatki, teipa kena nijtlapojpoljuik. Nimoiljuik nimantsi monektoskia nijtlapojpoljuis, kiampa amo tlauel titlaijiyouijtoskiaj” (Julia).

XIMOILJUI

Kema moueue o mosiua kichiuas se tlamantli tlen mitsyolkokos, ximoiljui ipan ni:

• ¿Nima nimoyolkokoua?

• ¿Moneki nochipa nechiljuis ma nijtlapojpoljui o uelis san nikilkauas?

TLEN UELIS INMOTLATSINTOKISEJ

• ¿Nima timotlapojpoljuiaj?

• ¿Tlake uelis tijchiuasej uan kiampa nima timotlapojpoljuisej?

XIJCHIUA NI

• Kema moueue o mosiua mitsyolkokos, amo ximoiljui san kinejki kiampa kichiuas.

• Xijtlapojpoljui mosiua o moueue uan xikilnamiki nochi miakpa “timokuapolouaj” (Santiago 3:⁠2).

“Kema tiomej timokuapolouaj amo ouij timotlapojpoljuiaj, uan kema san se tlen tojuantij mokuapoloua kena ouij tijmatij. Moneki amo timoueyimatis tlaj tijneki ma mitstlapojpoljuikaj o tijtlapojpoljuis se akajya” (Kimberly).

TLEN BIBLIA TETLAJTOLMAKA: “Uan intla se mokualankaitakaj kineki mitsteiljuis ika tlen axkuali tijchiuilijtok, uajka ximosenkaua iuaya nimantsi” (Mateo 5:25).