Tlaj amo tijnekij tiitstosej ininuaya maseualmej katli amo kuali tikinitaj, nopa kichiuas nojua tlauel ma tikinchikoitakaj. Uan tlaj touampoyouaj moiljuiaj, kiyolmatij uan kichiuaj sanse tlamantli kej tojuantij, uajka uelis timoiljuisej san tojuantij tlauel topati.

“Nijneki xitechiknelikaj [ika inmoyolo, TNM] keja tojuantij tiinmechikneliaj” (2 CORINTIOS 6:13).

¿Tlake kiijtosneki? Nopa tlajtoli inmoyolo kiijtosneki tlen tijyolmatij. Tlaj san techpaktia tiitstosej ininuaya maseualmej katli elij kej tojuantij, uajka kejuak tijtsakuasej toyolo. Tlaj amo tijnekij kiampa tijchiuasej, moneki tikinpiasej touampoyouaj katli amo elij kej tojuantij.

Kema kuali tikixmatij se akajya tijkuamachiliaj kenke kichiua sekinok tlamantli. Uan kema tiitstosej iuaya nopa maseuali, peua tikitaj kej touampo uan tijpatiitaj. Uan kuali tijyolmatij kema tikitaj yolpaki uan techtekipachoua kema tikitaj mokuesoua.

Ma tikitakaj tlen kipanok Nazaré, ya kinchikoitayaya katli san asitoyaj ipan ialtepe. Ya kiijtoua: “Niitstoya ininuaya nopa maseualmej pampa sansejko titekitiyayaj. Kema nikinixmatki, nikitak inijuantij amo eliyayaj kej nechiljuijtoyaj. Tlaj timouampojchiuas ininuaya maseualmej katli sejkoyok euanij, mitspaleuis amo xikinchikoita, xikinikneli uan xikinpatiita”.

Xijchiua kampeka timokamanaljuis ininuaya maseualmej katli euaj ipan seyok altepetl, katli amo elij  kej ta uan katli kamanaltij seyok tlajtoli. Uelis tijchiuas ni tlamantli:

• Xikiniljui ma mitsiljuikaj tlake kinpanotok.

• Xikintlaneui ma tlakuatij mochaj.

• Xijkaki tlen mitspouilisej uan xikita tlake kipatiitaj.

Tlaj tijchiuas kampeka tijmatis tlen kinpanotok, mitspaleuis xikinkuamachili uan kuali tikinitas.