¿Kiitstokej científicos kenijkatsa pejki nochi tlen onka uan nemilistli? Amo. Miakej moiljuiaj nopa cosmología uelis kiixtomas kenijkatsa pejki nochi tlen onka. Maske kiampa kiijtouaj, Marcelo Gleiser, se agnóstico uan tlamachtia Astronomía ipan Universidad tlen Dartmouth, kiijtok: “Amo kema ueltok tikijtouaj kenijkatsa pejki nochi tlen onka”.

¿Uan kenijkatsa pejki nemilistli? Pilamochtsi Science News, kiijtoua: “Uelis ouij tijmatisej kema nelnelia pejki nemilistli. Miak tlamantli tlen techpaleuiskia tijmatisej, ayokmo onka”. Ni ome tlamantli kinextia ciencia ayamo ueltok kiijtoua kenijkatsa pejki nochi tlen onka uan nemilistli.

Uelis timotlatsintokia: “Tlaj nochi tlen onka ipan Tlaltipaktli kichijchijki se akajya, ¿ajkia kichijchijki? Uan, tlaj Katli tlachijchijki kipia kuali iyolo uan tlalnamiki, ¿kenke kikaua ma titlaijiyouikaj? ¿Kenke kikaua ma onka miak religiones? ¿Kenke kinkaua katli kipiaj se religión ma kichiuakaj tlen amo kuali?”.

Maske ciencia amo ueltok kinankilia ni tlajtlanili, kena uelis tijmatisej. Miakej maseualmej kiitstokej kenijkatsa Biblia kinankilia ni tlajtlanili.

Se keskij científicos nojkia kiitstokej tlen Biblia tlamachtia. ¿Mitspaktiskia tijmatis kenke inijuantij kineltokaj itstok se Katli tlachijchijki? Xijtemo ipan jw.org kampa kiijtoua: “Kiijtouaj kenke tlaneltokaj ipan toTeotsij”.