Jehová tlauel kipaktia kinmachtis itekipanojkauaj, yeka itlanechikol kichijtok ma onka miak escuelas kampa uelis momachtisej toikniuaj para más kuali kichiuasej ininteki. Se tlen nopa escuela eli Kampa kinmachtiaj katli senkistok tlatekipanouaj. Ipan se keski xiuitl tlen panotok, Jehová itlanechikol amo san kiyankuilijtok tlen ika tlamachtiaj, nojkia kikualchijchijtok kali kampa momachtiaj. Kiampa kichiuaj pampa kinekij toikniuaj katli momachtiaj uan katli tlamachtiaj kuali ma momachtikaj. ¿Kenijkatsa motekiuia tomij tlen titemakaj para mochiuas ni tekitl?

 Ipan miak xiuitl, toikniuaj momachtijtokej kampa timosentiliaj uan nojkia kampa mochiua uejueyi tlanechikolistli. Pero namanok pejki mochijchiua uan mokualchijchiua kali tlen san motekiuis para kinmachtisej toikniuaj. ¿Kenke kiampa mochiua? Ma tikitakaj eyi tlamantli.

 Onka miak tekitl. Toikni Christopher Mavor, katli kinpaleuia Katli kiyakanaj tlajtolmoyaualistli, kiijtok: “Miak kali Betel techiljuiaj kinekij miakej toikniuaj uan tosiuaikniuaj ma kinpaleuikaj ipan tlajtolmoyaualistli. Se neskayotl, ipan 2019, kali Betel tlen Brasil kiijtok kinekiyaya ma kinpaleuikaj se 7,600 toikniuaj katli momachtijtoyaj Kampa kinmachtiaj katli senkistok tlatekipanouaj”. Nojkia, kali Betel tlen Estados Unidos kinneki miakej precursores katli kuali tlatekipanouaj para kinmachtisej sekinok ma tlajtolmoyauakaj kampa nemij miakej, kampa moketsaj barcos uan ipan cárcel. Nojkia monekij toikniuaj tlen uelis tlapaleuisej Kampa kiitaj kenijkatsa ipan nopa altepetl mochijchiua Kali kampa titlaueyichiuaj uan Katli kamanaltij ininuaya tepajtianij. Uan toikniuaj katli momachtijtokej Kampa kinmachtiaj katli senkistok tlatekipanouaj, uelis nopaya tlapaleuisej.

 Miakej kinekij momachtisej. Ipan miak kali Betel asi tlauel miak solicitudes tlen kititlanij katli kinekij momachtisej. Kiampa pano ipan Brasil, nopa kali Betel kiselik se 2,500 solicitudes ipan se xiuitl. Pero nopa kali kampa tlamachtiaj amo kinaxilik, yeka san kinselijkej 950 katli momachtiskiaj.

 Moneki kuali eltos kampa mokauasej. Kema toikniuaj momachtiaj ipan kali kampa timosentiliaj o ipan kali kampa mochiua uejueyi tlanechikolistli, mokauaj ininchaj toikniuaj. Ni amo kenijki kampa amo miakej yauij momachtiaj ipan se xiuitl. Pero kampa miakej yauij, uelis toikniuaj katli tetlanejtiaj ininchaj, amo uelis kinselisej miak metstli ipan se xiuitl. Yeka pejki motekiuia kali tlen nechka eltok kampa momachtiaj uan tlen mochijchijtok para inijuantij.

 Para mochijchiuas kampa momachtisej, kampa mokauasej uan tlen kitekiuisej toikniuaj katli tlamachtisej uan se 30 katli momachtitij, moneki tlauel miak tomij, nojkia moneki kiitasej kanke mochijchiuas uan sekinok tlamantli.

 Nopa kali kampa momachtiaj, kanajya mochijchijtok iteno se ueyi altepetl uan amo itstokej miakej maseualmej, pero kena onka carros tlen ika uelis nemisej. Nojkia mochijchiua kampa itstokej miakej tlajtolmoyauanij, kiampa toikniuaj uelis tlapaleuisej kampa momachtiaj uan uelis kimokuitlauisej nopa kali uan tlen motekiuia.

 Nopa kali kipia kampa uelis momachtisej ininselti, bibliotecas, computadoras uan impresoras. Nojkia kichijchijtokej kampa uelis tlakuasej sansejko katli momachtiaj uan tlamachtianij. Uan nojkia kichijchijtokej kampa uelis kichiuasej ejercicio uan mauiltisej.

 Pero tlen más ipati eli nopa kali kampa momachtiaj. Se toikni katli itoka Troy uan tekiti Kampa kiitaj kenijkatsa ipan nopa altepetl mochijchiua Kali kampa titlaueyichiuaj ipan Warwick (Nueva York), kiijtoua: “Tikiniljuijkej toikniuaj Katli kiitaj tlen mochiuas kampa kinmachtiaj tlajtolmoyauanij, ma techpaleuikaj tikitasej kenijkatsa tijchijchiuasej nopa kali para ma kipia tlen uelis kinpaleuis toikniuaj kuali ma momachtikaj. Toikniuaj techiljuijkej kenijkatsa uelis elis iuexka, tlake moneki kipias nopa kali, kenijkatsa moneki eltos tlauili uan nochi tlen motekiuia ipan audio uan video”. Toikni Zoltán, katli tlamachtia Kampa kinmachtiaj katli senkistok tlatekipanouaj ipan Hungría, kiijtoua: “Achtouia, amo tijpiayayaj micrófonos, yeka tikiniljuiyayaj toikniuaj katli momachtiyaya ma tlanankilikaj chikauak. Pero nama pampa ya onka micrófonos ipan ininmesa..., ¡ayokmo tiouijtij!”.

 ¿Kenijkatsa kinpaleuijtok katli momachtiaj uan katli tlamachtiaj? Angela, katli yajki Kampa kinmachtiaj katli senkistok tlatekipanouaj ipan Palm Coast (Florida, Estados Unidos), kiijtoua: “Tlauel kuali tijyolmatis. Nochi kuali kichijchijtokej, kampa timomachtiaj uan kampa timokauaj. Kiampa ueli timosentlaliaj ipan tlen timomachtiaj. Toikni Csaba, katli tlamachtia ipan nopa escuela ipan Hungría, kiijtoua tlauel kipaktia tlakuas ininuaya katli kinmachtia. Nopa tlauel kinpaleuia. Ya kiijtoua: “Katli tikinmachtiaj techiljuiaj tlen kiyolmatij uan tlen kinpano. Nopa techpaleuia kuali ma tikinixmatikaj uan uelis tikitasej kenijkatsa tikinpaleuisej kema tikinmachtiaj”.

 Katli tlamachtiaj uan katli momachtiaj kiitaj nochi tlen mochijchijtok eli se tlateochiualistli tlen Jehová kinmakatok, katli eli totlamachtijka (Isaías 30:20, 21). Ipan Filipinas mokualchijchijki se kali kampa momachtiskiaj. Uan se tosiuaikni katli nopaya momachtik, kiijtok: “Nochi tlen mokualchijchijtok kichiua ma timoiljuikaj amo san tiitstokej nopaya para timomachtisej, tijyolmatij Jehová techtlanejtok. Ya kineki ma tiyolpakikaj kema kuali timomachtiaj iTlajtol”.

 Tlaskamati miak pampa intemakaj tomij ika nochi inmoyolo, yeka ueli mochijchiua, mokualchijchiua uan kuali eltok nopa kali kampa momachtiaj. Miakej temakaj inintomij ipan donate.pr418.com. ¡Tlaskamati miak pampa intemakaj tlen inkipiaj!