Ipan ni xiuitl nochi Jehová itlajtoltemakauaj tijchixtoyaj nopa yankuik video tlen “Nopa kuajkuali tlamachtili tlen Jesús”. Tlauel miakej maseualmej ya kiitakej nopa achtoui video uan nojua poliui 17 videos. ¿Tlake mochiua kampa kichiuaj grabaciones? ¿Uan kenijkatsa titlapaleuijtok ma mochiua nochi ni tekitl?

 Ipan kali Betel tlen Australasia mochiua nopa grabaciones tlen nopa video “Nopa kuajkuali tlamachtili tlen Jesús” uan tlapaleuiaj se 50 o 80 toikniuaj. a Uan kintlamaka expa ipan se tonal. Yeka moneki kuali moiljuisej tlake tlakualistli kichiuasej. Tosiuaikni Esther, katli tlapaleuia kampa tlakualchiuaj kiijtoua: “Kema tijkouaj tlen tijtekiuisej ika tlen titlakualchiuasej tijtemouaj kampa amo tlauel patiyo, yeka amo san setsi tijtlakouiaj. Uan tikitaj keski imiaka tlakualistli tijchiuasej uan kiampa amo tijnempolosej”. Mojmostla ueli kitlamakaj se maseuali ika se naui dólares. b

 Toikniuaj katli kichiuaj grabaciones uan katli tlapaleuiaj ipan videos amo san moneki tlakuasej nojkia moneki momokuitlauisej. ¿Kenke? Pampa ipan Australia tlatotonia uan kemantika tlauel tona uan tetlanauia. Yeka, toikniuaj katli tlapaleuiaj tlauel tekitij kitlaliaj yoyonkali uan sekinok tlamantli, kiampa toikniuaj katli kichiuaj grabaciones uan nochi katli tekitij uelis moekauianosej uan amo tlauel kintlanauis tonati yon tlauel siauisej. Nojkia kiitaj ma onka crema solar, paraguas uan atl. Kevin katli tlapaleuia kampa kichiuaj grabaciones kiijtoua: “Se keskij toikniuaj katli tlapaleuiaj Betel uan miakej katli san tlapaleuiaj se keski tonali, inijuantij kitlachiliaj ma onka tlamantli tlen motekiuis. Uan kichiuaj ika miak pakilistli uan amo moueyimatij, nochi tlen kichiuaj tlapaleuia ma mochiua ni tekitl”.

 Se keski grabaciones amo ueli mochiua ipan kali Betel o ipan se estudio de grabación, yeka kemantika moneki yasej sejkanok. Kema kinekij ma nesi kej uejkajkia itstoyaj yauij ipan sekinok altepemej pampa achtouia amo onkayaya tlauili, kuajkuali carreteras yon kalmej tlen nama onka. Katli kichiuaj grabaciones uan katli kichijchiuaj videos yauij ipan sekinok altepemej. Yeka moneki moajokuis yoyomitl uan nochi tlamantli tlen motekiuis uan mouikas kampa mochiuas grabaciones. Kema ayamo peua grabaciones toikniuaj katli tlapaleuiaj kiitaj ma onka se tepostli tlen tlapaleuia ma onka tlauili, atl uan baños. Nochi toikniuaj katli tlapaleuiaj mokauaj ininchaj toikniuaj katli nechka itstokej uan sekij mokauaj ipan hoteles ipan cabañas o sejkanok.

 Kema sejkanok mochiua grabaciones motekiuia tlauel miak tomij, miak tonali uan katli tlapaleuiaj ipan nopa tekitl tlauel siauij. Yeka ipan 2023, Katli kinyakanaj Jehová itlajtoltemakauaj kiijtojkej ma mokoua se ueyi pantalla uan ipati elki dos millones y medio de dólares. Kema mochiua se grabación ika ni ueyi pantalla nesi kejuak mochijtoskia kalteno uan tlaj mochijtoskia sejkanok tlauel motekiuijtoskia miak tomij. Darren se tlen Katli kiyakana Betel tlen Australasia kiijtoua: “Ni ueyi pantalla ueli kichiua miak grabaciones, kiampa toikniuaj amo tlauel siauij. Se neskayotl, amo ueliskia nima tijchiuasej se grabación kema kalaki tonati pampa amo uejkaua. Uan ika ni ueyi pantalla kena ueli mochiua miak grabaciones, kiampa tijtlapejpeniaj tlen techpaktia”.

 Kema mochiua sejse tlaxeloli tlen nopa video “Nopa kuajkuali tlamachtili tlen Jesús”, monekij miakej toikniuaj katli kichiuasej grabaciones uan miakej katli tlapaleuisej. ¿Tlake kiyolmatij kema kiitaj kenijkatsa kinmokuitlauiaj?

 Tosiuaikni Amber katli eua Melbourne yajki tlapaleuito maske mokaua se 700 kilometros. Ya kiijtok: “Toikniuaj tlen kali Betel kuali nechmokuitlauijkej, kema niasito nechkuitoj aeropuerto. Miakej tlen inijuantij nechtlaneuiyayaj ma nitlakuati, ma nicafeniti uan toikniuaj katli kichiuaj grabaciones tlauel nechiknelijkej uan nopa kichijki kuali ma nijyolmati. Jehová tlauel nechpaleuik, yeka amo ouij nijmatki nitlapaleuis”.

 Toikni Derek tlapaleuia kampa mochijchiua videos. Ya kiijtoua: “Kema pejki ni tekitl miakej toikniuaj tlapaleuijtokej. Yeka, nikintlaskamatilia nochi toikniuaj pampa kikixtiaj tonali, temakaj tlen kipiaj uan ininchikaualis kiampa ueltok tlapaleuiaj. Nojkia kuali tenojnotsaj uan tlapaleuiaj ika nochi ininyolo. Jehová tlauel kinteochijtok toikniuaj uan nojkia tojuantij, ya amo san kitekipachoua kuali ma mokaua ni tekitl, nojkia kitekipachoua kenijkatsa mochiua ni tekitl”.

 Nopa videos ueltok mochiuaj pampa intemakaj tlen inkipiaj. Tiinmechtlaskamatiliaj pampa intemakaj tomij ika nochi inmoyolo ipan donate.pr418.com.