Biblia kiijtok tlake panoskia kema nechka tlamiskia tlen amo kuali ipan Tlaltipaktli, “se pilaltepetsi moteuis ika seyok pilaltepetsi” uan tetlasojsoljuilis se tlenijki (Mateo 24:3, 7). Tlen panok ipan xiuitl 2023 a kinextia nojua moaxitia tlen kiijtoua ni tlajtolpanextili. Miakej maseualmej tlaijiyouiaj ipan nechka 100 altepemej uan pilaltepetsitsij pampa mochijtok tlauilankayotl o kintlasojsoljuilik se tlenijki. Maske kiampa panok, Jehová itlajtoltemakauaj kinextijkej nopa tlaiknelili tlen Dios kinextia. ¿Kenijkatsa Jehová itlajtoltemakauaj kinpaleuijkej toikniuaj?

 Ipan xiuitl 2023, Jehová itlanechikol kinpaleuik toikniuaj kema se 200 tlamantli tlasosolok kampa itstoyaj o kinpanok se tlamantli tlen amo kuali pampa maseualmej san tlemach tlachiuaj. Ipan se keski altepemej Jehová itlajtoltemakauaj kitekiuijkej kipano 10 millones de dólares b tlen temakaj ipan obra mundial uan motekiuia kema kinpaleuiaj toikniuaj ipan nochi Tlaltipaktli kema kintlasojsoljuilia se tlenijki. Nojkia toikniuaj kinpaleuijkej kema inijuantij kiixtlajkej se keski tlamantli tlen toikniuaj kinpolouayaya. Ma tikitakaj kenijkatsa motekiuik tomij tlen toikniuaj temakaj uan kiampa kinpaleuijkej miakej toikniuaj kema ome tlamantli kintlasojsoljuilik.

 Ipan se keski pilaltepetsitsij tlen Nigeria, kema chikauak tlakiajki tlauel tlaatemik. Ipan octubre 2022 tlauel tlaatemik amo kiampa panotoya ipan se 10 xiuitl. Kipano se 676.000 hectáreas kampa motlatojtokijtoyaj tlami polijki uan kipano ome millones maseualmej monejki kikajteuasej ininchaj. Kali Betel tlen Nigeria kintekimakak se keskij toikniuaj Katli kiitaj kema se tlenijki tetlasojsoljuilia uan kiampa kinpaleuiskiaj toikniuaj uan kinyolchikauaskiaj.

•   7,505 toikniuaj monejki kikajteuasej ininchaj.

•   Sosolijki 860 kalmej.

•   90 Kali kampa titlaueyichiuaj uan 1 Kali kampa mochiua uejueyi tlanechikolistli akalajki.

 Motekiuik kipano 250.000 dólares kema kinpaleuijkej toikniuaj. Ni tomij motekiuik ipan ni tlamantli:

•   Mokojki arroz, etl uan sopas.

•   Nojkia mokojki tlamantli tlen motekiuia kalijtik, kej colchones uan mosquiteros.

•   Kikualchijchijkej kalmej tlen sosolijtoya.

 ¿Kenijkatsa toikniuaj kuali kitekiuijkej nopa tomij? Kuali kitlachilijkej sejse kali tlaj monekiyaya san mokualchijchiuas o mochijchiuas se yankuik. Tlaj monekiyaya mochijchiuas se yankuik kali, uajka mochijchiuayaya kej sekinok ininchaj.

 Toikniuaj katli kinpaleuijkej tlauel tetlaskamatiliaj. Se tosiuaikni kiijtoua: “Kema tlauel tlaatemik mopatlak tonemilis, pampa nochi tlen tijtoktoyaj nempolijki uan tochaj tlami sosolijki. Kema techpanok ni tlaouijkayotl toikniuaj nimantsi asikoj para techpaleuisej uan techuikasej kampa ueliskia kuali tiitstosej. Tlauel techyolchikajki kema kali Betel kititlanki tlakualistli. Tikitstokej ipan tonemilis kenijkatsa moaxitijtok tlen kiijtoua Juan 13:34, 35. Tlauel timosentlachilijkej pampa nelnelia kinextiaj teikneliaj. Nochampoyouaj uan na tijnekij tiinmechtlaskamatilisej ika nochi toyolo pampa intechpaleuijkej kema más monekiyaya”.

 Toikniuaj katli tlapaleuiaj kema tetlasojsoljuilia se tlenijki nojkia kinpaleuijtokej sekinok maseualmej. Ipan Sabagreia (se pilaltepetsi tlen Bayelsa), katli kiyakana nopa pilaltepetsi kiijtok: “Maske onka miak Iglesias ipan nochi tlaltipaktli, san Jehová itlajtoltemakauaj tlauel mopaleuiaj. San inijuantij tlauel kuali tlen kichiuaj”.

 Ipan febrero 2023, Ipan Chile kipano se 400 imiakpa tlatlak kuatitlamitl. Uan kipano se 430.000 hectáreas tlamitlatlak uan nochi tlen onkayaya ipan nopa altepetl. Uan se 8.000 maseualmej monejki kikajteuasej ininchaj. Kema panok ni tlamantli Kali Betel pejki kinsentilia toikniuaj katli tlapaleuiaj kema kintlasojsoljuilia se tlenijki.

•   222 toikniuaj monejki kikajteuasej ininchaj.

•   20 kalmej tlamitlatlak.

 Kema kinpaleuijkej toikniuaj, motekiuik kipano se 200.000 dólares. Ni tomij motekiuik ipan ni tlamantli:

•   Mokojki tlakualistli uan atl.

•   Mokojki gasolina, tlen ika tlapojpouaj uan pajtli.

•   Kikualchijchijkej kalmej tlen sosolijtoya.

 Se toikni uan ichampoyouaj mosentlachilijkej kema kimatkej kipolojtoyaj nochi tlen kipixtoyaj, kej ininchaj uan kampa tlanamakayayaj. Uan ayokmo kipiaskiaj tlen ika mopanoltiskiaj. Tlauel moyolkokouayayaj kema kiitayayaj kampa eltoya ininchaj ayokmo tleno onkayaya. Pero, kema kiitakej toikniuaj kichijchiuayayaj ininchaj, tlauel yolpajkej. Pampa toikniuaj katli tlapaleuiaj kinextijkej tlauel kinikneliaj, kinpaleuik ma kiijiyouikaj tlen kinpanoyaya. Kema kiitakej kenijkatsa toikniuaj kinpaleuijkej nojkia kinejkej tlapaleuisej para kikualchijchiuasej ichaj se toikni.

 Miakej toikniuaj mosentlachilijkej pampa miakej tlapaleuijkej kema tetlasojsoljuilik se tlenijki. Se toikni kiijtok: “Katli kiitaj kema se tlenijki tetlasojsoljuilia eli se nemaktli tlen Jehová techmakatok. Ipan nopa tonali kema ya panotoya nopa tlamantli toikniuaj techmakakej se keski tlamantli tlen monekiyaya. Uan kema tijpouaj tlen kinpano toikniuaj ipan nochi Tlaltipaktli uan kenijkatsa kinpaleuiaj kema kintlasojsoljuilia se tlenijki, tlauel techyolchikaua. Pero kema ta mitspano nojua tlauel tijpatiitas tlen kichiua Jehová itlanechikol. Nojkia toikniuaj kinextiaj nopa kuajkuali tlamantli tlen Jehová kinextia, kintekipachoua ma tijpiakaj tlen ika timopanoltisej, tlen techpaleuis kuali ma titlaneltokakaj uan kuali ma tijyolmatikaj. Jehová kinextia tlauel techiknelia”.

 Pampa monechkauia itlamia tonali, nojua onkas miak tlamantli tlen tetlasojsoljuilis (Lucas 21:10, 11). Maske kiampa, totlanauatijkaj Jesucristo, itstos touaya “hasta kema tlamis tlen mochijtok ipan Tlaltipaktli” uan kinextis kema techyakanas ika tlanechikoli (Mateo 28:20). Kema titemaka tomij ipan donate.pr418.com o ipan sekinok tlamantli, tijpaleuia Dios itlanechikol. Nojkia kema tijtekiuia tonali uan mochikaualis, tijnextia tijpaleuia toTlanauatijka Jesucristo uan iTlanauatijkayo. ¡Tlaskamati miak toikniuaj pampa intemakaj inmotomij ika nochi inmoyolo!