Ipejya marzo 2022, ipan jw.org motlalik ni tlamantli: “Tiyolpakij tiinmechmatiltisej Katli kinyakanaj Jehová itlajtoltemakauaj kiijtojkej tlaj tekichiuanij ya tekauaj ma mosentilikaj ipan ininaltepe, uajka nochi ya uelis timonechikosej ipan kali kampa timosentiliaj ipan semana tlen abril 1”. Nochi tlauel tiyolpajkej kema tijpojkej nopa, maske ni ueyi kokolistli ayamo tlamiyaya a yeka nojua monekiyaya timomokuitlauisej uan tijchiuasej se keski tlamantli tlen techpaleuiskia amo ma timomauakaj, ¿kenijkatsa tijkualtlaliskiaj uan tijpiaskiaj nochi tlen tijtekiuiskiaj ipan nopa kali kampa timosentiliaj maske amo timosentilijtoyaj ome xiuitl?

 Se keski metstli achtoui, toikniuaj pejtoyaj mokualchijchiuaj, kiampa ueliskia sampa timonechikosej ipan kali kampa timosentilia.

 Ipan xiuitl 2020 kiijtojkej ayokmo timosentiliskiaj uan kema panok se metstli, toikniuaj katli tekitij Kampa kiitaj kenijkatsa ipan Tlaltipaktli mochijchiua Kali kampa titlaueyichiuaj tlen Warwick, Nueva York, pejkej kiitaj tlake ueliskia kipanos nopa kali kampa timosentiliaj pampa onkayaya COVID-19 uan tlake monekiyaya tijchiuasej, kiampa ueliskia timonechikosej uan amo timomauaskiaj.

 Ipan se keski altepemej monekiyaya se keski tlamantli uan ipan sekinok, seyok tlamantli. Mathew De Sanctis, katli tlatekipanoua Kampa kiitaj kenijkatsa ipan Tlaltipaktli mochijchiua Kali kampa titlaueyichiuaj, kiijtoua: “Ipan se keski altepemej ouij kipantiaj kanke uelis momapajpakasej, yeka tlaj ipan se kali kampa timosentiliaj amo onka atl, moneki tijkouasej o tiatlakuisej ipan ueyatl o ipan se ameli tlen eltos nechka. Ipan sekinok altepemej tekichiuanij kiijtojkej monekiyaya kitekiuisej tlen kichiuaskia ma kalaki ajakatl uan ma kitlalikaj letreros kampa kiijtoskia moneki momapajpakasej uan momokuitlauisej”.

 ¿Tlake kichijkej toikniuaj? Mathew nojua kiijtoua: “Ipan miak kali kampa timosentiliaj tijpantijkej tlen ueliskia tijtekiuisej uan tlen amo tlauel patiyo kiski”. Toikniuaj tlen Papúa Nueva Guinea kiitakej kenijkatsa kiuikaskiaj atl tlen ika momapajpakaskiaj, inijuantij kitekiuijkej garrafas tlen kikuiyaya 20 litros atl uan kitlalilijkej se llave kampa kisaskia nopa atl, kiampa san kitekiuijkej 40 dólares. Toikniuaj kikojkej ipan Asia se tlamantli kampa ueliskia momapajpakasej uan kintitlanilijkej toikniuaj tlen África.

 Uan ipan sekij monejki kitlalisej o kikualchijchiuasej ventiladores tlen kichiuaskia ma kalaki ajakatl ipan kali kampa timosentiliaj. Uan ipan miak tlanechikoli monejki kikouasej se tepostli tlen ika kipanoltiskiaj micrófonos, kiampa toikniuaj amo kiitskiskiaj kema tlanankiliskiaj ipan tlanechikoli. Nojkia kichijkej kampeka amo tlauel kiitskisej puertas uan llaves kampa kisayaya atl tlen ika momapajpakayayaj uan ajachika kipojpouayayaj, kiampa amo momauaskiaj. Uan ipan se keski kali kampa timosentiliaj monejki kitlalisej tlen kichiuaskia nopa atl ma yaui iselti ipan baños uan ma kisa iselti kema momapajpakaskiaj. Ipan Chile kitekiuijkej 1,400 dólares kema kitlalijkej nochi ni tlamantli ipan kali kampa timosentiliaj.

 Maske kinekiyayaj kinmokuitlauisej toikniuaj kema sampa monechikoskiaj ipan kali kampa timosentiliaj, nojkia kichijkej kampeka kuali kitekiuisej nopa tomij tlen miakej temakaj. Ipan se keski altepemej toikniuaj kiselijkej tlapaleuili tlen tekichiuanij kinmakakej kiampa uelkej kikouaj nopa tlamantli kampa ueliskia momajtekisej tlen ueliyaya kitlaliaj sejkanok, nojkia nopa tepostli tlen kinpaleuiskia amo ma kiitskikaj micrófono. Nojkia, miak kali Betel mopaleuijkej uan kikojkej ika imiaka tlen kitekiuiskiaj, kiampa kuali kitekiuijkej tomij. Nochi kali Betel uan Katli kiitaj tlen mokouas ipan nochi Tlaltipaktli kintlakouiliyayaj katli kichijchiuayayaj tlen kitekiuiskiaj, kiampa amo patiyo kisayaya uan nima kiualikayayaj tlen kikouayayaj.

 Tlen toikniuaj kiijtojkej moneki tijchiuasej kema tiasej tlanechikoli kichijtok kuali ma kiyolmatikaj nochi toikniuaj katli yauij kampa timonechikouaj uan amo ma majmauikaj. Se tosiuaikni katli eua Perú uan itoka Dulcine kiijtoua “majmajki se kentsi” kema kikajki sampa timonechikosej ipan kali kampa timosentiliaj, ya kiijtoua: “Nijpixki COVID-19 kema pejki nopa ueyi kokolistli, yeka amo nijnekiyaya nias ipan kali kampa timosentiliaj pampa nimoiljuiyaya sampa ueliskia nimomauas, kema niasito kampa timosentiliaj nikitak ueuejtlakamej kichijtoyaj se keski tlamantli tlen techpaleuiskia amo ma timomauakaj, eltoya kampa ueliskia timomajtekisej, tepostli tlen techpaleuiskia amo ma tikitskikaj micrófono uan tlapojpouayayaj kema ayamo peuayaya tlanechikoli uan kema tlamiyaya. Nopa kichijki ayokmo ma nimajmaui”. b

 Sara, se tosiuaikni katli eua Zambia kiixnamijki seyok tlaouijkayotl, ya kiijtoua: “Kipia se keski metstli mijki noueue pampa kipixki COVID-19. Nimotekipachouayaya pampa amo nijmatiyaya kenijkatsa nijyolmatiskia kema sampa niaskia tlanechikoli pampa monekiyaya nias noselti”. ¿Kenijkatsa momachilia nama? Ya kiijtoua: “Tlanechikoli nechpaleuia ma nikita Jehová itstok touaya ipan itlamia tonali, uan nama nojua nikita ueuejtlakamej uan sekinok toikniuaj kinextiaj nechikneliaj, nechyolchikauaj uan nechpaleuiaj”.

 Nochi toikniuaj tlauel yolpakij pampa sampa monechikouaj ipan kali kampa timosentiliaj. Tlaskamati pampa intemakaj inmotomij ipan donate.pr418.com. Nopa techpaleuik tijkouasej tlen monekiyaya, kiampa toikniuaj kuali momachiliyayaj kema yauiyayaj tlanechikoli.