Jehová itlajtoltemakauaj amo kema tijselijtoyaj tlauel miak tlamachtili san ipan toteléfono o tableta kej nama. Ipan se keski altepemej, toikniuaj amo uelij kiixtlauaj Internet. Sekij itstokej kampa tlauel yolik tekiti Internet o amo onka.

 Maske kiampa pano, miakej toikniuaj uelij kikixtiaj amatlajkuiloli uan videos ipan ininteléfono o tableta maske amo kipiaj Internet. ¿Kenijkatsa kichiuaj?

 Nopa Jw Box eli se tlamantli katli amo ueyi, uan kititlanij ipan tlanechikoli kampa tlauel amo kuali tekiti Internet o amo onka. Ni rúter kikojkej, uan teipa toikniuaj tlen Departamento de Computación tlen kali Betel kikualchijchiuiliaj se programa informático, kiampa ueli kipia amatlajkuiloli uan videos tlen jw.org. Sejse tlen ni tlamantli ipati se 75 dólares.

 Kema toikniuaj itstokej ipan tlanechikoli, uelij kikixtiaj ipan ininteléfono o tableta amatlajkuiloli uan videos tlen Jw Box ika wifi. Nojkia, toikniuaj uelis kitekiuisej JW Box maske ininteléfono o tableta amo tlauel yankuik o amo tlauel patiyo. Kema ipan se tlanechikoli amo kipia internet, ¿kenijkatsa kiseliaj tlamachtili tlen namanok kistok ika JW Box? Kema onka yajyankuik amatlajkuiloli uan videos tlen jw.org, kali Betel kintitlanilia tlanechikolmej se USB tlen kipia nochi tlen namanok kistok, se tlen ni USB ipati se 4 dólares. Nopa USB kitlaliaj ipan JW Box, kiampa toikniuaj uelij kikixtiaj yankuik tlamachtili.

 ¿Kenijkatsa kinpaleuijtok toikniuaj Jw Box? Nathan Adruandra, tlen República Democrática del Congo, kiijtoua: “Miakpa nijchijki kampeka nijkixtis nopa videos, ‘NoTeko Jehová, ipan ta nimotemachia’ uan Xikilnamikikaj tlen ipantik isiua Lot, uan amo kema niuelki. Yeka nimokuesouayaya. Nama kena niueli nijkixtia videos, uan nopa techpaleuia tikinmachtisej tokoneuaj”.

 Ipan Nigeria, se toikni katli kinpaleuia toikniuaj ma kitlalikaj JW Box, kiijtoua: “Toikniuaj kiitaj JW Box kej se tlateochiualistli katli Jehová kinmakatok. Tlauel yolpakij pampa nama amo ouij kikixtiaj amatlajkuiloli uan videos tlen tlauel tijtekiuiaj kema titlamachtiaj”.

 Kititlantokej kipano 1,700 JW Box ipan tlanechikoli tlen África, Oceanía uan Sudamérica, uan nojua moiljuijtokej kintitlanilisej sekinok tlanechikolmej. ¿Kanke kisa tomij tlen ika kiixtlauaj? Kisa tlen nopa tomij katli miakej temakaj ika nochi ininyolo. Miakej temakaj ipan donate.pr418.com. Tlauel tiinmechtlaskamatiliaj pampa intemakaj tlen inkipiaj.