Jesús kiniljuik itokilijkauaj: “Intlayolmelauatij tlen na hasta kampa más uejuejka pilaltepetsitsij ipan ni Tlaltipaktli” (Hechos 1:8). Jehová itlajtoltemakauaj kichiuaj kampeka tlajtolmoyauasej ika miak pakilistli. Maske kiampa kichiuaj, ipan se keskij altepemej nojua moneki tlauel tlajtolmoyauasej, kej ipan uejueyi altepemej kampa itstokej tlauel miakej maseualmej. Nojkia, ipan se keski altepemej amo itstokej miakej Jehová itlajtoltemakauaj (Mateo 9:37, 38). Uajka, ¿tlake kichiuaj uan kiampa uelis kinkamanaljuisej nochi maseualmej?

 Uelij tijchiuaj tlen Jesús tlanauatik pampa Katli kiyakanaj tlajtolmoyaualistli tlen Katli kinyakanaj Jehová itlajtoltemakauaj, kintitlanij misioneros kampa amo itstokej miakej katli tlajtolmoyauaj. Ipan ni tonali tlatekipanouaj se 3,090 misioneros ipan nochi Tlaltipaktli. a Miakej kinmachtijtokej Kampa kinmachtiaj katli senkistok tlatekipanouaj. Inijuantij mosentlalijtokej kikauasej ininchaj uan yasej ipan seyok altepetl. Tlauel tlapaleuijtokej kimoyauasej nopa kuali tlamachtili pampa kuali tlaneltokaj, kuali momachtijtokej uan pampa miak xiuitl tlatekipanojtokej. Nojkia, ika tlen kichiuaj, kinmachtiaj sekinok kenijkatsa kinpaleuisej maseualmej ma mochiuakaj Cristo itokilijkauaj.

 Ipan sejse kali Betel, Katli kinpaleuiaj Katli senkistok Tlajtolmoyauaj, tekitij ininuaya Katli kiyakanaj Betel uan kiampa kiitaj kenijkatsa kinpaleuisej misioneros. Kiixtlauaj kampa mokauaj, kema mokokouaj uan nojkia kinmakaj se kentsi tomij tlen ika mopaleuisej. Ipan xiuitl 2020, Jehová itlajtoltemakauaj kitekiuijkej nechka 27 millones tomij tlen ika kinpaleuijkej misioneros, kiampa toikniuaj mosentlaliaj tlajtolmoyauasej uan kinyolchikauasej toikniuaj kampa tlatekipanouaj.

 ¿Kenijkatsa tlapaleuiaj misioneros ipan tlajtolmoyaualistli? Frank Madsen, se tlen Katli kiyakanaj Betel ipan Malaui, kiijtoua: “Ika tlen kimatij kichiuasej misioneros uan nojkia pampa amo majmauij, tlapaleuijtokej ipan tlanechikoli ma tlajtolmoyauakaj kampa tlauel ouij, kej ipan pilaltepetsitsij kampa ouij asitij uan kampa kamanaltij seyok tlajtoli. Tlauel kinpaleuia sekinok pampa kichiuaj kampeka kichiuasej tlen momajtokej kichiuaj ipan nopa altepetl uan kiyekosej inintlajtol. Nojkia, kinpaleuiaj telpokamej ma mosentlalikaj senkistok tlatekipanosej. Tlauel tijtlaskamatiliaj Jehová pampa tikinpiaj misioneros”.

 Se tlen Katli kiyakanaj Betel tlen seyok altepetl kiijtoua: “Tlen kichiuaj misioneros, kinextia ipan nochi Tlaltipaktli Jehová itlajtoltemakauaj nelnelia tlauel kuali mouikaj. Katli amo kitekipanouaj Jehová nojkia kiitstokej ipan toTeotsij itlanechikol amo techikoitaj. Tlen tijyekouaj ipan Biblia, kichiua ma tikinitakaj toikniuaj kej tochampoyouaj”.

 ¿Kenijkatsa misioneros kinpaleuiaj toikniuaj kampa tlajtolmoyauaj? Paulo, katli eua ipan Timor Oriental, tlauel kitlaskamati tlen kichiuaj misioneros katli tlatekipanouaj ipan itlanechikol. Ya kiijtoua: “Tiitstokej kampa tlauel tlatotonia. Uan maske misioneros euaj kampa tlaseseya, kichiuaj kampeka tlajtolmoyauasej maske amo momajtokej itstosej kampa tlauel tlatotonia. Nochipa mosentiliaj kampa tikisaj titlajtolmoyauaj uan miakpa kema tlamij tlajtolmoyauaj nojua kinpaxalouaj maseualmej katli kuali kintlakakilijkej, maske tlauel tona. Nojkia, nojua tlajtolmoyauaj ika tiotlak. Kinpaleuijtokej tlauel miakej maseualmej ma kitekipanokaj Jehová, kej na nechpaleuijkej. Kitekipanouaj Jehová ika miak pakilistli, uan nopa kinpaleuia toikniuaj nojkia ma mosentlalikaj kitekipanosej toTeotsij”.

 Ketti, katli eua Malaui uan senkistok tlatekipanoua, kiijtoua se misionero iuaya isiua kinpaleuijkej ichampoyouaj. Ya kiijtoua: “Kema asikoj misioneros ipan notlanechikol, san na nijtekipanouayaya Jehová. Tlauel nechpaleuijkej uan mouampojchijkej ininuaya nochi nochampoyouaj. Ika tlen misioneros kichiuaj, nokoneuaj kiitakej se akajya tlauel yolpaki kema tlauel tijtekipanoua Jehová. Nama, eyij noichpokauaj tlatekipanouaj kej precursoras, uan noueue pejtok yaui tlanechikoli”.

 ¿Uan kanke kisa nochi nopa tomij tlen ika kinpaleuiaj misioneros? Kisa tlen nopa tomij katli miakej temakaj ika nochi ininyolo. Miakej temakaj ipan donate.pr418.com. Tlauel tiinmechtlaskamatiliaj pampa intemakaj tlen inkipiaj.