Ipan nochi Tlaltipaktli Jehová itlajtoltemakauaj kiitasej grabación tlen ueyi tlanechikolistli tlen eyi tonali, 2020, “¡Nochipa xiyolpaktokaj!”, ipan metstli julio uan agosto, ni tlamantli amo kema kiampa mochijtoya. Ni uelki mochiua pampa nochi tlamachtili tlen mopanoltis ipan ni ueyi tlanechikolistli motlajtolkuepki ipan kipano 500 tlajtoli. Ni tekitl ipa mochijtoya uan uejkauayaya kipano se xiuitl. Maske kiampa kichijtoyaj, katli tlajtolkuepaj san kipixtoyaj naui metstli kitlajtolkuepasej ni ueyi tlanechikolistli pampa momoyajki kokolistli coronavirus.

 Toikniuaj Katli kiitaj tlen mokouas uan Katli tlapaleuiaj kampa kitlajtolkuepaj amatlajkuiloli ipan ueyi Kali Betel, mosentikapaleuijkej ipan ni ueyi tekitl. Katli tlapaleuiaj kampa kitlajtolkuepaj amatlajkuiloli kiitakej miakej toikniuaj katli tlajtolkuepaj kinpolouayaya se keski tlamantli tlen ika tekitisej, kej kuajkuali micrófonos. Yeka, Katli kiitaj tlen mokouas kikojkej 1,000 micrófonos uan kititlankej ipan se 200 altepemej.

 Amo motekiuik miak tomij pampa kikojkej nopa micrófonos ika imiaka, san kititlankej ipan se altepetl kampa nopaya kixejxelojkej uan kintitlanilijkej tlajtolkuepanij. Sejse micrófonos moixtlajki 170 dólares pampa kikojkej ika imiaka, kiampa amo motekiuik se 20 % tomij.

 Maske ouij eliyayaj pampa ya pejtoya nopa kokolistli, Katli kiitaj tlen mokouas kikojkej tlen motekiuiskia uan kititlankej ipan metstli abril uan mayo, 2020. Yeka, ipan itlamia mayo, nochi toikniuaj katli itstokej ipan kali kampa tlajtolkuepaj, kali Betel uan sekinok toikniuaj katli tlapaleuiaj, kipixtoyaj tlen ika tekitiskiaj.

 Jay Swinney, katli kiita tlen mokouas kiijtok: “Ipan nochi ni tekitl tlen mochijtok tlauel kuali mopaleuijtokej departamentos tlen Betel uan katli tlanamakaj. San Jehová itonal ueli kichiua amo ma tijtekiuikaj miak tomij uan nima ma kipiakaj toikniuaj tlen moneki”.

 Nicholas Ahladis, Katli tlapaleuia kampa kitlajtolkuepaj amatlajkuiloli kiijtok: “Toikniuaj katli tlajtolkuepaj uan amo ueliyayaj kisaj, tlauel yolpajkej kema kiselijkej tlen kitekiuiskiaj. Maske amo itstoyaj ininuaya katli tekitij, uelkej kitlajtolkuepaj tlamachtili, kichijkej grabaciones, videos uan uikatl ipan kipano se 500 tlajtoli”.

 Amo san ni tekitl mochijki, nojkia onkak sekinok tekitl uan kiampa nochi toikniuaj uelkej kiitaj nopa ueyi tlanechikolistli tlen eyi tonali, 2020, “¡Nochipa xiyolpaktokaj!”. Tlauel tiinmechtlaskamatiliaj pampa nochi tlen motekiuik uelki mokoua ika nopa tomij tlen intemakaj ika nochi inmoyolo. Sekij temakakej ipan donate.pr418.com o ipan sekinok tlamantli.