Jehová itlajtoltemakauaj tlauel timotekipachouaj ika tlen kinpano toikniuaj (1 Pedro 2:17). Miakej tlen tojuantij tijyolmatij kej tosiuaikni Tannis, katli eua Kenia. Ya kiijtoua: “Nechpaktia nijmatis tlen kinpano nopilikniuaj ipan nochi Tlaltipaktli”. ¿Kenijkatsa tijmatij tlen kinpano Jehová itlajtoltemakauaj? Ipan 2013, ipan jw.org kitlalijkej nopa tlaxeloli “Tlen pano”, uan nopaya techmatiltiaj tlen kinpano toikni.

 Tlen moijkuiloua ipan nopa tlaxeloli eli temachtli pampa kiijtoua kenijkatsa mochijchiua kali kampa titlaueyichiuaj, titlapaleuiaj kema se ajakatl o seyok tlamantli tetlasojsoljuilia uan kema moneki tijmatisej se tlamantli tlen tlauel pankisa, kej kema kisa se yankuik Biblia. Nojkia techmatiltiaj tlen kinpano toikniuaj katli tsaktokej pampa kineltokaj tlen Biblia kiijtoua, nojkia kema kintlaneuij ma yakaj tlajtolmoyauatij sejkanok uan kema titetlaneuij kema moilnamiki Cristo imikilis. ¿Ajkia kichiua kampeka kitemos tlen pano uan kenijkatsa kikualchijchiuaj tlen techmatiltisej?

 Kampa Tematiltiaj tlen pano kiitaj tlake moijkuilos ipan tlaxeloli “Tlen pano”. Katli kiyakanaj tlen kichiuaj sekinok comités tlen Katli kinyakanaj Jehová itlajtoltemakauaj, kiyakanaj nopa tekitl tlen toikniuaj kichiuaj Kampa Tematiltiaj tlen pano, tlen eltok ipan ueyi kali Betel, nopaya tlapaleuiaj kipano se 100 toikniuaj katli amo itstokej ipan kali Betel. Ni toikniuaj kiijkuilouaj, kikualchijchiuaj, kitlajtolkuepaj o kiyejyekchiuaj tlen techmatiltisej. Nojkia monojnotsaj ininuaya tekichiuanij, katli tlamachtiaj ipan universidad uan katli tematiltiaj se noticia. Ipan kali Betel tlen nochi Tlaltipaktli onka kipano 80 Kampa Tematiltiaj tlen pano, kiampa nochi mosentikapaleuiaj.

 Kampa Tematiltiaj tlen pano, tekitij sansejko ika sekinok kali Betel kema kikualchijchiuaj se noticia. Kema toikniuaj kimatij tlen panok uan moiljuiaj uelis tematiltisej, achtoui kiitaj tlaj nelia panok uan teipa kikualchijchiuaj. Tlaj kinekij kuali ma kisa tlen tematiltisej, kemantika moneki kintlatsintokisej sekinok o kamanaltisej iuaya se akajya katli kimati tlen nopa tlamantli. Kema kimatij nochi tlen panok, peua kiijkuilouaj, kikualchijchiuaj uan kiitaj tlaj kuali ijkuilijtok. Kitlapejpeniaj tlaixkopinkayomej uan kintitlaniliaj Katli kiyakanaj tlen kichiuaj sekinok comités, inijuantij kitlachiliaj uan kiijtouaj tlaj kuali mokajki.

 ¿Tlake kiijtouaj toikniuaj tlen motlalia kampa “Tlen pano”? Se tosiuaikni katli itoka Cheryl, uan eua Filipinas kiijtoua: “Ika ijnalok nechpaktia nijpouas tlen kinpano toikniuaj uan tlen mochiua ipan Jehová itlanechikol”.

 Miakej kiijtouaj amo eli sanse tlen motlalia ipan jw.org uan tlen tematiltiaj ipan noticias. Tatiana, katli eua Kazajistán, kiijtoua: “Tlauel nijpatiita tlen tematiltiaj ipan jw.org pampa temachtli tlen kiijtouaj”. Se tosiuaikni katli itoka Alma uan eua México kiijtoua: “Kampa sekinok tematiltiaj tlen pano kitlaliaj tlen amo kuali, uan tlen kitlaliaj ipan jw.org tlauel techyolchikaua”.

 Tlen moijkuiloua ipan tlaxeloli “Tlen pano” eli temachtli, nopa techpaleuia ma tijtetilikaj totlaneltokilis. Bernard katli eua Kenia, kiijtoua: “Pampa techmatiltiaj tlen pano, nama nikinita toikniuaj kej nochampoyouaj maske kampa ueli euaj. Kema nimomaijtoua ueli nikintokaxtia uan nikiljuia Jehová ma kinpaleui ika tlen kinpano o kintekipachoua”. Bybron se tosiuaikni katli eua Kenia, kiijtoua: “¡Tlauel niyolpaki kema nikita ipan ‘Tlen pano’, kiski se yankuik Biblia! Nikilnamiki kenijkatsa Jehová tlauel techiknelia”.

 Uan maske kemantika techmatiltiaj kenijkatsa toikniuaj kintlatsakuiltiaj, nopa nojkia uelis techyolchikauas. Jackline, katli eua Kenia kiijtoua: “Nimoiljuis tlen kinpano toikniuaj uan kenijkatsa amo majmauij, nechpaleuia nojua ma nijtetili notlaneltokilis. Nochipa nimoiljuia tlake kinpaleuik toikniuaj ma kiijiyouikaj tlen kinpanok. Nikitstok toikniuaj tlauel kinpaleuia kema kichiuaj ‘tlen ya kimatijʼ, kej momaijtosej, kipouasej Biblia uan uikasej”.

 Se tosiuaikni katli itoka Beatriz uan eua Costa Rica kitlaskamati pampa toikniuaj tematiltiaj kema tetlasojsoljuilia se tlenijki. Ya kiijtoua: “Nimosentlachilia pampa Jehová itlanechikol nima kinpaleuiaj toikniuaj katli kintlasojsoljuilia se tlenijki. Kuali kichiuaj ininteki uan ika miak tlaiknelili. Ni kichiua nojua ma nimotemachi nelia niitstok ipan Jehová itlanechikol”.

 ¡Tlauel tiyolpakij pampa ipan jw.org eltok nopa tlaxeloli “Tlen pano”! Tlen techmatiltiaj nopaya, techpaleuia ma tijmatikaj tlen kinpano toikniuaj ipan nochi Tlaltipaktli. Ueli moijkuiloua tlen pano pampa intemakaj inmotomij ika nochi inmoyolo, uan miakej tlen inmojuantij inkichiuaj ipan donate.pr418.com. Tiinmechtlaskamatiliaj miak ika tlen intemakaj.