Ipan enero 2021, Katli kinyakanaj Jehová itlajtoltemakauaj tematiltijkej kisaskia se yankuik amochtli tlen itoka ¡Nochipa xiitsto ika pakilistli!, a tlen techpaleuis nojua kuali ma titlamachtikaj. ¿Tlake tijyolmatkej kema techmatiltijkej? Matthew, katli eua Canadá, kiijtoua: “¡Tlauel niyolpajki! Uan nojua kiampa nijyolmatki kema nijkajki nopa tlamachtili tlen kiixtonkej toikniuaj, nopa videos tlen kinextik kenijkatsa tijtekiuisej nopa amochtli uan kenijkatsa kinpaleuijtoya toikniuaj. ¡Nijnekiyaya nijpias nopa amochtli uan nimantsi nijtekiuis!”.

 Nopa amochtli ¡Nochipa xiitsto ika pakilistli!, amo san techpaleuia tijmatisej kenijkatsa uelis peuas tijmachtisej se akajya ika Biblia, nojkia amo eli sanse kej nopa sekinok amochtli tlen tijtekiuiyayaj. Tlaj ta tijtekiuia ni amochtli ika amatl, uelis tikitstok amo eli sanse. ¿Kenke kiampa tikijtouaj? Ma tikitakaj kenijkatsa kichijchijtokej.

 Achi tilauak iamayo. Kema kichijchijkej nopa amochtli ¡Nochipa xiitsto ika pakilistli!, kitekiuijkej se amatl tlen achi tilauak, pampa ni amochtli kipia kipano 600 tlaixkopinkayomej ika color. ¡Kipia tlauel miak tlaixkopinkayomej uan amo kej amochtli Tlamachtia Biblia! Nojkia, ipan inakastla sejse iamayo san chipauak uan amo kiualika tlaixkopinkayomej. Yeka, toikniuaj kitemolijkej kenijkatsa kikualtlalisej ni tlamantli, pampa kema nopa amatl eli kanaktsi, nesi nopa tlaixkopinkayomej tlen eltok ipan seyok iamayo. Toikniuaj katli kiitaj kenijkatsa mochijchiua amatlajkuiloli ipan nochi Tlaltipaktli ipan Wallkill (Nueva York) amo kinejkej kiampa ma pano, uan yeka achtoui kichijchijkej ika nopa naui amatl tlen tijtekiuiaj ipan imprentas. Kema Katli kiijkuilouaj amatlajkuiloli tlen Katli kinyakanaj Jehová itlajtoltemakauaj kiitakej sejse tlen kichijtoyaj, kitlapejpenijkej katli amo tlauel kanaktsi. Maske ni amatl tlejko se 16% ipati, tlauel kinpaleuia katli momachtiaj Biblia, pampa kema kipouaj nopa amochtli amo kiitaj nopa tlaixkopinkayomej tlen eltok ipan seyok iamayo.

 Amo sanse ipantsajka. Ipantsajka ni yankuik amochtli amo eli sanse kej nopa sekinok amochtli tlen tijtekiuiaj. ¿Kenke? Pampa amo pepetlaka, uan nopa kichiua kuali ma nesi nopa tlaixkopinkayotl tlen kiualika ipan ipantsajka. Nojkia, kej kichijchijtokej kipaleuia amo ma nesi tlaj tlauel kitekiuiaj. Tlaj ipantsajka se amochtli kichijchiuaj amo ma pepetlaka, kisa tlauel patiyo. Yeka, miak kali Betel mosentikapaleuijkej uan kiampa kikojkej se tlamantli tlen kichiuaskia amo ma pepetlaka, uan amo ma kisa nelpatiyo.

 ¿Kenke kitekiuijkej se keski tlamantli tlen tlauel patiyo? Se toikni katli tlatekipanoua Kampa kiitaj kenijkatsa mochijchiua amatlajkuiloli ipan nochi Tlaltipaktli, kiijtoua: “Tijmatij ni amochtli tlauel motekiuis, yeka tijnekij nochipa kuali ma nesi”. Eduardo, katli tlatekipanoua Kampa kiitaj tlen mochiua ipan imprenta tlen Betel ipan Brasil, kiijtoua: “Tlauel tiyolpakij pampa tikitaj Jehová itlanechikol kitekiuia tlamantli tlen uejkaua uan tlen kichiua kuali ma nesi, uan kenijkatsa kuali kitekiuia nopa tomij tlen miakej temakaj ika nochi ininyolo”.

 Nopa amochtli ¡Nochipa xiitsto ika pakilistli!, pejki tijkixtiaj ipan marzo 2021 kema COVID-19 pejtoya momoyaua, yeka tikixnamijkej se keski tlamantli. Ipan Betel ayokmo ueliyayaj kisaj, uan ipan imprentas ayokmo itstoyaj toikniuaj katli tekitiyayaj se keski tonali yon amo ueliyayaj kintlaneuij sekinok toikniuaj ma tlapaleuikaj. Yeka, ipan se keski imprentas amo itstoyaj miakej toikniuaj katli nopaya tekitiskiaj, uan kanajya monejki kitsakuasej se keski tonali pampa kiampa kiijtojkej tekichiuanij.

 ¿Tlake kichijkej uan kiampa mokixtik ni amochtli? Kema nopa imprenta pejki tekiti, kintlanejkej sekinok toikniuaj katli tekitiyayaj ipan sekinok departamentos tlen Betel ma tlapaleuikaj se keski tonali ipan imprenta. Joel, katli tlatekipanoua Kampa kiitaj tlen mochiua ipan imprenta, kiijtoua: “Toikniuaj tekitikej ika nochi ininyolo uan kinejkej kiyekosej sekinok tlamantli. Nopa kichijki kuali ma kisa nopa tekitl”.

 Maske tikixnamiktokej se keski tlamantli ueltok tijkixtijtokej tlauel miak amochtli ¡Nochipa xiitsto ika pakilistli!, uan motekiuijtok miak planchas de impresión, tlen ika tijchijchiuaj ipantsajka, amatl, tinta uan tlen ika tijpepechouaj. San ipan makuili metstli kema mokixtik ni amochtli, motekiuik kipano 2.3 millones de dólares. Toikniuaj amo kinejkej san kej ueli kitekiuisej tomij, yeka san kichijchijtokej tlen toikniuaj tlajtlanij ipan tlanechikoli.

 ¿Kenijkatsa kiyolmatij katli tlamachtiaj uan katli momachtiaj ika ni yankuik amochtli? Paul, se toikni katli eua Australia, kiijtoua: “Nechpaktia nitlamachtis ika ni amochtli. Kej kichijchijtokej, kinyoltilana maseualmej uan tlauel kinpaleuia. Nojkia, kuali mokuamachilia, kipia tlajtlanili tlen asi ipan ininyolo, videos, tlaixkopinkayomej, recuadros uan tlen uelis kichiuasej. Tlauel kuali kej kichijchijkej ni amochtli, pampa nechpaleuia nojua kuali nitlamachtis”.

 Ipan Estados Unidos, se katli momachtia Biblia kiijtok: “Tlauel nechpaktia ni yankuik amochtli. Tlaixkopinkayomej nechpaleuia ma nijkuamachili tlen tlauel ipati, uan nopa videos asi ipan noyolo uan nechpaleuia ma nijchiua tlen nimomachtia”. Ni maseuali momachtia ompa ipan se semana uan nochipa mosentilia touaya ipan tlanechikoli.

 Nojua moneki mokixtis nopa amochtli ¡Nochipa xiitsto ika pakilistli! ipan miak tlajtoli. Katli kinyakanaj Jehová itlajtoltemakauaj kiijtojkej uelis kitlajtolkuepasej ipan 710 tlajtoli, ¡kipano 340 kema kitlajtolkuepkej amochtli Tlamachtia Biblia!

 ¿Kenijkatsa moixtlaua nochi tlen mochijchiua? Ika tomij tlen miakej temakaj ika nochi ininyolo uan kema kichiuaj ipan donate.pr418.com. Tiinmechtlaskamatiliaj tlen intemakaj ika nochi inmoyolo, kiampa ueli mochijchiua amochtli tlen kinpaleuis maseualmej ma monechkauikaj ika Jehová uan ma kipiakaj nemilistli tlen axkema tlamis (Salmos 22:26).