Moneki tijchijchiuasej miak kali kampa timosentiliaj pampa sejse xiuitl miakej maseualmej moatsonpoliuiltiaj. Yeka, Katli kiitaj kenijkatsa mochijchiuas kali kampa titlaueyichiuasej ipan nochi Tlaltipaktli, kiijtojkej ipan xiuitl 2020 kichijchiuaskiaj uan kikualchijchiuaskiaj kipano 2,700 kali kampa titlaueyichiuaj. a

 Ipan ni tonali ayokmo uelki mochiua nopa tekitl pampa momoyajki nopa kokolistli COVID-19. Yeka, Katli kiyakanaj tlen mochiua ika amatlajkuiloli kiijtojkej namantsi amo mochiuaskia nopa tekitl, kiampa kinmokuitlauiskiaj toikniuaj uan kintlepanitaskiaj tlanauatianij. Ipan xiuitl 2020 kema ayamo momoyauayaya nopa kokolistli, kichijchijkej uan kikualchijchijkej kipano se 1,700 kali kampa titlaueyichiuaj. Nojkia kitlamiltijkej kipano se 100 tekitl tlen monekiyaya mochiuas ipan miak kali Betel. Ma tikitakaj ome tlamantli tlen mochijki uan kenijkatsa kinpaleuijtok toikniuaj.

 Kali Betel tlen Camerún. Nopa achtoui Kali Betel tlen eltoya ipan altepetl Duala, amo tlauel ueyi eliyaya uan monekiyaya kikualchijchiuasej. Yeka, Katli kiyakanaj tlen mochiua ika amatlajkuiloli kiitakej tlaj kikualchijchiuaskiaj, eliskia patiyo. Nojkia moiljuijkej kichijchiuaskiaj sejkanok o kikouaskiaj seyok kali uan kikualchijchiuaskiaj. Maske kiampa kinejkej kichiuasej, amo uelki.

 Teipa, toikniuaj kimatkej tekichiuanij kichiuaskiaj se carretera ika ajko tlen altepetl Duala, nechka kampa mochiua uejueyi tlanechikolistli. Nopa tlauel kinpaleuiskia nima ma asitij ipan kali Betel uan kipixtoskiaj nochi tlen moneki. Yeka, Katli kinyakanaj Jehová itlajtoltemakauaj kiijtojkej nopaya kichiuaskiaj se yankuik kali Betel.

 Toikniuaj kitlanejkej se empresa katli kalchiuaj, ni kinpaleuik ma kichiuakaj se keski tlamantli, kiampa amo uejkajkej uan amo kitekiuijkej miak tomij. Tlen kichijkej, amo motekiuik nochi nopa tomij tlen kiijtojtoyaj uan nojua mokajki kipano 2 millones de dólares. Yeka, nochi betelitas nima panokej ipan nopa yankuik kali Betel kema nojua ayamo momoyauayaya kokolistli COVID-19.

 Nama betelitas tlen Camerún tlauel kuali itstokej kampa tekitij, uan kiitaj kej se ueyi tlateochiualistli tlen Jehová kinmakatok. Se toikni iuaya isiua kiijtojkej: “Nama nojua tlauel tijnekij titekitisej pampa tijpatiitaj tlen Jehová techmakatok”.

 Kali kampa kitlajtolkuepa amatlajkuiloli ika tlajtoli tojolabal (ORT), México. Miak xiuitl toikniuaj katli tlajtolkuepaj ika tlajtoli tojolabal itstoyaj Betel tlen Centroamérica, nechka Ciudad de Mexico. Nopa tlajtoli tojolabal san kamanaltij ipan se keski altepemej tlen Altamirano uan Las Margaritas, uan iuejkaka tlen kali Betel eli se 1,000 kilómetros. Yeka, toikniuaj amo nochipa kinpantiyayaj maseualmej katli kamanaltij inintlajtol. Nojkia amo kinpantiyayaj toikniuaj katli nechka itstoyaj uan katli kinekiskiaj tlapaleuisej kampa tlajtolkuepaj uan kichiuasej grabaciones.

 Toikniuaj Katli kiijkuilouaj amatlajkuiloli kiijtojkej katli tlajtolkuepaj monekiyaya itstosej kampa kamanaltij tojolabal. Yeka kali Betel kikojki uan kikualchijchijki nopa kali, kiampa amo motekiuik miak tomij.

 Se toikni katli tlajtolkuepa kiijtok kenijkatsa kiyolmati: “Nitekitik 10 xiuitl ipan kali Betel, uan amo kema nijpantik se akajya katli kamanalti notlajtol. Nama kampa tiitstokej nochi maseualmej kamanaltij tojolabal uan mojmostla nikamanalti ininuaya. Ni nechpaleuijtok nojua kuali ma nijyeko notlajtol uan kuali ma nijchiua noteki”.

 Tlaj kualtias ipan xiuitl 2021, tijnekij tijchiuasej 75 kali kampa tlajtolkuepasej uan kali kampa momachtiaj toikniuaj. Nojkia tijnekij tijchiuasej 8 piltekitsitsij ipan se keski kali Betel, kej nopa tekitl tlen mochiuas ipan Rámapo (Nueva York) uan sampa mochijchiuas sejkanok nopa kali Betel tlen Argentina uan Italia. Moneki kichijchiuasej kipano se 1,000 yajyankuik kali kampa timosentiliaj, kipano 6,000 tlen moneki kipatlasej uan se 4,000 kali kampa timosentiliaj tlen moneki kikualchijchiuasej.

 ¿Kenijkatsa tikixtlauaj nochi tlen tijchiuaj? Toikni Lázaro González se tlen Katli kiyakana Betel tlen Centroamérica, kiijtok kema mochijki nopa Kali kampa kitlajtolkuepaj amatlajkuiloli ika tlajtoli tojolabal, ya kiijtok: “Toikniuaj katli itstokej nopaya amo tlatominpiaj. Yeka, tlaj toikniuaj amo temakaskiaj tomij ika nochi ininyolo, amo ueliskia mochijchiuas nopa kali kampa tlajtolkuepaj toikniuaj tlen sekinok tlajtoli. Tlauel tikintlaskamatiliaj nochi toikniuaj pampa temakaj inintomij kiampa katli tlajtolkuepaj uelij yauij kampa kamanaltij inintlajtol. Tlauel tiinmechtlaskamatiliaj pampa intemakaj tlen inkipiaj”. Kej tikitakej, nochi ni tekitl ueli mochiua pampa sekinok temakaj tomij ika nochi ininyolo, uan miakej temakaj ipan donate.pr418.com.