Ipan Latinoaméricana itstokej tlauel miakej maseualmej, uan miakej itstokej ipan pilaltepetsitsij kampa kamanaltij sekinok tlajtoli uan momajtokej kichiuaj sekinok tlamantli. Miakej toikniuaj itstokej ipa nopa pilaltepetsitsij. Jehová itlajtoltemakauaj kinekij kinpaleuisej nopa maseualmej ma kiixmatikaj tlen Biblia tlamachtia, yeka kitlajtolkuepaj amatlajkuiloli ipan 130 tlajtoli tlen kamanaltij katli itstokej ipan Latinoamérica. a Miakej toikniuaj maske kitlepanitaj tlen kichiuaj maseualmej, kiixnamiktokej miak tlaouijkayotl pampa kitekipanouaj Jehová uan amo kinekij kiixpanosej tlen Biblia kiijtoua. ¿Kenijkatsa tikinpaleuiaj ika nopa tomij tlen sekinok temakaj?

 Ipan se pilaltepetsi kampa kamanaltij huichol ipan Jalisco (México), toikniuaj amo kinejkej iljuichiuasej kema maseualmej kinueyichiuayayaj ininteotsitsij pampa kiixpanoskiaj tlen Biblia kiijtoua. b Se keskij maseualmej tlauel kualankej, yeka ipan diciembre 4, 2017, kinuijuitejkej se keskij toikniuaj uan katli nojkia momachtiyayaj. Nopa maseualmej kinkixtijkej toikniuaj tlen nopa pilaltepetsi, kixolejkej ininchaj uan tlen kipiayayaj, uan kiijtojkej kimiktiskiaj katli tlakuepiliskia.

 Toikniuaj katli nechka itstoyaj tlen nopa pilaltepetsi, kinpaleuijkej toikniuaj uan kinmakakej tlen ika mopanoltiskiaj. Maske kiampa kichijkej, ¿kenijkatsa ueliskiaj kinpaleuisej ma tlakuepilikaj ininchaj? Se toikni katli itoka Agustín, kiijtoua: “Amo ueliyaya tikiljuiaj se abogado ma techpaleui pampa amo tijpiayayaj tomij, uan amo tijmatiyayaj kanke titeiljuiskiaj ma techpaleuikaj”.

 Amo kinkauiliyayaj toikniuaj ma tlaueyichiuakaj, yeka Kali Betel tlen México nima kiitak kenijkatsa kinpaleuiskia. Achtoui, kiniljuijkej tekichiuanij tlen nopa pilaltepetsi ma kisenkauakaj nopa kuesoli. Teipa, Katli kinyakanaj tlen kichiuaj sekinok comités kiijtojkej katli tlapaleuiaj ipan Asuntos Legales tlen Ueyi Kali Betel kinpaleuiskiaj Kali Betel tlen México, kiampa ueliskiaj kinpaleuisej toikniuaj huicholes. Teipa, nojkia kinmatiltijkej katli tekitij ipan Suprema Corte de Justicia de la Nación, inijuantij elij katli kipiaj miak tlanauatili ipan México.

 Se keskij abogados, katli kampa ueli euaj ipan Tlaltipaktli, mokamanaljuijkej ininuaya tekichiuanij uan kinixtomilijkej kenijkatsa maseualmej kitlepanitaj tlen momajtokej kichiuaj ipan se pilaltepetsi. Uajka, katli nopaya euaj amo kinamikiyaya kinchiualtisej toikniuaj ma kichiuakaj se keski tlamantli uan monekiyaya kintlepanitasej. Nojkia, kiijtojkej nochi uelis tijtlapejpenisej tlake tijnekij tijchiuasej.

 Ipan julio 8, 2020, nopa Suprema Corte de Justicia kiijtok kinpaleuis toikniuaj uan nojkia kiniljuik maseualmej katli euaj ipan nopa pilaltepetsi ma kinkauakaj toikniuaj uan katli momachtiyayaj, ma tlakuepilikaj. Agustín, katli achtouia tikijtojkej, kiijtok: “Tlauel tiyolpakij uan tikintlaskamatiliaj toikniuaj pampa tlauel techpaleuijkej. Techpanotoskia miak tlamantli tlaj amo techpaleuijtoskiaj”.

 Ipan Ecuador, nojkia kinpanok tlen amo kuali toikniuaj katli itstokej ipan pilaltepetsi San Juan de Ilumán. Nopa pilaltepetsi mokaua ipan tlamayamitl tlen Otavalo. Ipan xiuitl 2014, pejki mochijchiua se kali kampa mosentiliskiaj toikniuaj. Maske ya kinkajtoyaj ma kichijchiuakaj nopa kali, se sacerdote iuaya sekinok 100 maseualmej ayokmo kinkauilijkej ma tekitikaj toikniuaj. Uan nojkia ayokmo kinkauilijkej ma mosentilikaj.

 Katli tlapaleuiaj ipan Asuntos Legales tlen Kali Betel tlen Ecuador uan katli tlatekipanouaj ipan Ueyi Kali Betel, kinpaleuijkej toikniuaj. Inijuantij kinmatiltijkej tekichiuanij tlen kinchiuiliyayaj toikniuaj ipan nopa pilaltepetsi, yeka maseualmej nojua kinkauilijkej ma monechikokaj uan ma kitlamiltikaj nopa kali. Teipa nopa abogados kiniljuijkej tekichiuanij ma kichiuakaj se keski tlamantli tlen kinpaleuiskia sekinok toikniuaj uan amo san katli kiixnamiktoyaj nopa tlaouijkayotl ipan nopa xiuitl. Inijuantij kiniljuijkej: “Maseualmej katli itstokej ipan pilaltepetsitsij, ¿nojkia kinamiki kitlepanitasej tlen sekinok kitlapejpenisej?”.

 Ipan julio 16, 2020, nopa Constitucional del Ecuador, katli kipia miak tlanauatili ipan nopa altepetl, kiitak kenijkatsa kipaleuiskia toikniuaj. Nopa abogados katli tlapaleuijekej, nojkia eliyayaj toikniuaj tlen Ecuador. Nopaya nojkia itstoyaj nauij toikniuaj abogados katli kinpaleuijtokej toikniuaj katli kampa ueli euaj ipan Tlaltipaktli. Nopa tlanechikoli mochijki ipan videollamada pampa momoyajtoya kokolistli COVID-19. Nopa tribunal amo kema kinkajtoya toikniuaj kiampa ma kisenkauakaj kuesoli. c Nopa abogados kiniljuijkej tekichiuanij, katli itstokej ipan pilaltepetsitsij nojkia uelis kitlapejpenisej tlen inijuantij kinekij kichiuasej.

 Ipan ni tonali, toikniuaj katli itstokej ipan Otavalo kichixtokej tlake kiijtosej tekichiuanij tlen Corte Constitucional, uan nojkia tlauel yolpakij pampa sekinok toikniuaj kinpaleuiaj. César, se ueuejtlakatl katli itstok ipan tlanechikoli Ilumán Quichua, kiijtoua: “Jehová kitekiuia itlanechikol uan kiampa kinpaleuia itekipanojkauaj maske amo miakej elij”.

 Nochi nopa abogados katli kinpaleuijkej toikniuaj ika nochi ininyolo uan ika pakilistli, nojkia eliyayaj Jehová itlajtoltemakauaj. Kema kisenkajkej nopa tlaouijkayotl, monejki kuali mokualchijchiuasej uan kitekiuisej tomij. Toikniuaj katli kisenkajkej nopa tlaouijkayotl ipan México, kichijchijkej tlen kitekiuiskiaj ipan se 380 horas uan kitlajtolkuepkej amatl ipan 240 horas. Uan ipan Ecuador, nopa 40 toikniuaj katli kisenkajkej nopa tlaouijkayotl, nojkia kitekiuijkej miak horas. ¿Kenijkatsa moixtlaua nochi ni tlamantli? Ika nopa tomij tlen intemakaj ipan donate.pr418.com. Tlaskamati pampa intemakaj ika nochi inmoyolo.