Se tosiuaikni katli itoka Nicole uan eua Colombia kiijtok: “¡Yejyektsi kampa timosentiliaj!”. ¿Kenke tlauel kipaktia nopa kali kampa mosentilia? Ya kiijtoua:“Pampa nopaya niitstok ininuaya noikniuaj uan sansejko tijueyichiuaj Jehová”. ¿Nojkia kiampa tijyolmati?

 Ipan nochi tlaltipaktli, Jehová itlajtoltemakauaj mosentiliaj ipan kipano 63,000 kali kampa timosentiliaj. Ni kali amo eli san kampa tijueyichiuaj Dios. David katli tlatekipanoua kej precursor regular katli eua Colombia kiijtoua: “Nopa kali kampa timosentiliaj kiueyichiua tlen titlamachtiaj. Maseualmej katli yauij tlanechikoli mosentlachiliaj pampa kiitaj kuali eltok kampa timosentiliaj”. Kiampa pano. Pampa tijchiuaj kampeka titlachpanasej, titlapojpouasej uan tijkualchijchiuasej kampa timosentiliaj. ¿Kenijkatsa tijchiuaj?

 Sejse tlanechikoli kiita kenijkatsa kikualchijchiuasej kali kampa mosentiliaj. Yeka toikniuaj kema monechikouaj tlachpanaj, tlapojpouaj uan kikualchijchiuaj tlen moneki.

 Kampa kiitaj kenijkatsa mochijchiua Kali kampa titlaueyichiuaj (LDC) kinpaleuia tlanechikolmej uan kintlapejpenia se keski toikniuaj para kinmachtisej kenijkatsa kimokuitlauisej kali kampa mosentiliaj. Sejse tlen inijuantij kitlachiliaj chikuasej o matlaktli kali kampa timosentiliaj. Nojkia kinmachtiaj toikniuaj kenijkatsa kimokuitlauisej nopa kali kampa timosentiliaj. Kema pano eyi xiuitl, kiitaj uan kiijkuilouaj tlaj kuali eltok o tlaj nojua uelis motekiuis nopa kali kampa timosentiliaj.

 Toikniuaj uan tosiuaikniuaj kitlaskamatij pampa kinmachtijtokej kenijkatsa kimokuitlauisej kali kampa mosentiliaj. Se tosiuaikni katli itoka Indhumathi uan eua India, kiijtoua: “Tlauel kuali tlen techmachtijkej, nijmatis kenijkatsa tijmokuitlauisej kali kampa timosentiliaj tlauel techpaleuik”. Evans, se toikni katli eua Kenia, kiijtoua: “Techmachtijkej tlaj se tlamantli sosolijtok moneki nimantsi mokualchijchiuas kiampa amo motekiuis miak tomij”.

 Ipan se xiuitl moneki miak tomij tlaj tijnekij kuali ma elto nopa kali kampa timosentiliaj, a nojkia moneki moitas kanke eltok, keski xiuitl kipia ika mochijchijki uan keskij tlanechikolmej kitekiuiaj. ¿Kenijkatsa moixtlaua tlen motekiuia?

 Nochi tlen mokualchijchiua ipan nopa kali kampa timosentilia mochiua ika tomij tlen titemakaj ika nochi toyolo. Se toikni katli itoka Alexander uan eua Kazajistán kiijtoua: “Se achi tlen nopa tomij tlen temakaj motekiuia para kiixtlauasej internet, atl uan tlauili. Seyok achi motekiuia para kikouasej amatl, guantes, ika tlen tlapojpouasej uan pintura”. Nopa tomij tlen mokaua motitlani ipan obra mundial kiampa motekiuia para kikualchijchiuasej se keski kali kampa timosentiliaj ipan nochi tlaltipaktli.

 Kemantika kema mokualchijchiua se kali kampa titlaueyichiuaj motekiuia miak tomij tlen ueltoskia motekiuis ipan ome o eyi metstli. Tlaj kiampa pano uajka ueuejtlakamej monojnotsaj iuaya katli kinmachtia tlen LDC. Tlaj LDC kiijtos ma mochiua nopa tekitl uajka motekiuia nopa tomij tlen kititlanij ipan obra mundial. Tlen mochijki ipan xiuitl 2023, mokualchijchijki 8,793 uan motekiuik 76,6 millones de dólares. Ma tikitakaj tlen mochijchijki.

 Ipan Angola, kipia se 15 xiuitl mochijchijki nopa kali kampa titlaueyichiuaj uan monekiyaya kikualchijchiuasej miak tlamantli. Monekiyaya mokualchijchiuas tlauili uan kampa tlatlapakatoya. Nojkia, maseualmej katli itstokej nechka kampa titlaueyichiuaj, kiijtojkej nopa atl tlen temoyaya kalpani kalakiyaya ininchaj. LDC kiijtok ma mochiua nopa tekitl uan motekiuik 9,285 dólares. Nopa maseualmej mosentlachilijkej pampa nima mokualchijchijki uan tlauel kitlaskamatij.

 Ipan Polonia, se kali kampa timosentiliaj tlaakalakiyaya uan nopa alfombra ayokmo kuali eltoya. LDC kiijtok ma kikualchijchiuakaj para ayokmo tlaakalakis uan kitlalijkej se yankuik alfombra. Uan motekiuik 9,757 dólares. Yeka, ipan se keski xiuitl amo monekis ma mokualchijchiua nopa kali kampa timosentiliaj.

 Tlaj kuali tijmokuitlauisej nopa kali kampa timosentiliaj uelis amo motekiuis miak tomij tlen titemakaj ika nochi toyolo uan nojkia kiueyichiua Jehová. Se toikni katli itoka Shaun uan eua Tonga, kiijtoua: “Pampa kuali tijmokuitlauiaj nopa kali kampa timosentilia uan tijueyichiuaj Jehová, kampa tlapajpaktik, kuali tlajtlalijtokej uan nochi kuali eltok tlen motekiuia. Kiampa kiuejkapantlalia itoka Jehová kampa tiitstokej. Tlauel tiyolpakij tikintlaneuisej maseualmej ma yakaj ipan nopa kali kampa timosentiliaj”.

 Nochi uelis titlapaleuisej kema tlapojpouaj uan kema mokualchijchiua nopa kali kampa titlaueyichiuaj. Marino katli eua Australia uan katli tlamachtia kenijkatsa kimokuitlauisej kali kampa titlaueyichiuaj kiijtoua: “Tijmokuitlauisej kali kampa titlaueyichiuaj eli se ueyi tlateochiualistli uan nochi uelis titlapaleuisej. Kema kiampa tijchiuaj, amo tlauel motekiuia miak tomij uan uelis motekiuis kampa nelia monekilia”.

 Joel katli eua India, tlauel kipaktia tlapaleuis kema mokualchijchiua nopa kali kampa timosentiliaj kiijtoua: “Nitlapaleuis ininuaya toikniuaj, nechpaleuia nimoiljuis kenijkatsa titekitisej ipan nopa yankuik Tlaltipaktli”. Nicole, katli tikijtojkej achtouia, kiijtoua: “Kipia se keski tonali, toikniuaj monejki kikualchijchiuasej baño pampa tlaachichipikayaya, uan nechiljuijkej ma nijuatsa piso. Maske na amo nijkualchijchijki tlen sosolijtoya, nitlapaleuik amo tleno ma kinpano toikniuaj”.

 Tlaj nojkia tijneki titlapaleuis kema kikualchijchiuaj nopa kali kampa timosentiliaj, xikiniljui ueuejtlakamej tlen motlanechikol. Kema titemaka tomij amo san motekiuia ipan nopa kali kampa timosentilia nojkia titlapaleuia ma mokualchijchiua kali tlen eltok ipan nochi tlaltipaktli. Uelis titemakas motomij ipan pilkuakajontsitsij tlen eltok ipan kali kampa timosentiliaj o ipan donate.pr418.com. Tlauel tiinmechtlaskamatiliaj pampa intemakaj tlen inkipiaj.