Tiitstokej ipan itlamia tonali, yeka amo timosentlachiliaj kema tijkakij “onka tlateuijkayotl” (Mateo 24:6). Maske miakej toikniuaj tlaijiyouiaj pampa pano ni tlamantli, nochipa tikinpaleuiaj. Kuali tijyolmatkej kema tijkajkej ipan Tlen techmatiltiaj katli kinyakanaj Jehová itlajtoltemakauaj 3 tlen xiuitl 2022, kiijtojkej ipan Europa del este pejtokej kinpaleuiaj toikniuaj katli tlaijiyouijtokej pampa onka tlauilankayotl ipan Ucrania. ¿Kenijkatsa tikinpaleuijtokej toikniuaj maske onka tlauilankayotl? Uan ¿tlake kiyolmatij kema kiseliaj nopa tlapaleuili?

 Ipan Febrero 24, 2022, kema pejki nopa tlauilankayotl ipan Ucrania, katli kiyakanaj tlen kichiuaj sekinok comités kiijtojkej ueliskia motekiuis se achi tomij uan kiampa kinpaleuiskiaj toikniuaj tlen Ucrania. Kali Betel tlen Ucrania nima pejki kikoua tlen monekiyaya, uan nopa 27 pamitl tlen toikniuaj katli kiita kema se tlenijki tetlasosoljuilia pejkej kintitlaniliaj toikniuaj nopa tlapaleuili.

 Nojkia, toikniuaj tlen ueyi kali Betel nima pejkej kiitaj kenijkatsa kipaleuiskia kali Betel tlen Ucrania. Katli kiyakanaj tlen kichiuaj sekinok comités uan katli kiyakanaj tlen mochiuaj ika amatlajkuiloli, kiniljuijkej katli kiitaj tlen mokouas ipan nochi Tlaltipaktli ma mopaleuikaj ika se keski toikniuaj tlen kali Betel tlen Ucrania uan Polonia, uan ma kiitakaj kenijkatsa ueliskia tlapaleuisej. Mojmostla, se keskij toikniuaj katli kiitaj tlen mokouas, Departamento de Envíos uan katli kiitaj Asuntos Legales tlen sejse kali Betel, mosentiliyayaj iuaya se tlen katli kiyakanaj Betel tlen Ucrania, uan ika se keskij toikniuaj katli kiitaj tlen mokouas ipan nochi Tlaltipaktli, uan kiitayayaj kenijkatsa tekitiskiaj.

 Jay Swinney, se tlen katli kiitaj tlen mokouas ipan nochi Tlaltipaktli kiijtoua: “Achtoui monekiyaya tijmatisej tlake kinpolouayaya toikniuaj. Pampa tijnekiyayaj tikinmakasej tlen ipa momaktoyaj kitekiuiaj kej tlakualistli uan tlen ika maltiskiaj. Amo san nopa monekiyayaj tijmatisej; nojkia monekiyaya tikitasej kenijkatsa tikintitlaniliskiaj, pampa tijnekiyayaj kuali ma asi ipan Ucrania nopa tlapaleuili”.

 Ipan marzo 9, 2022, toikniuaj ya kimatiyayaj tlake kititlaniskiaj. Kikualchijchijkej cajas ika tlakualistli kej nakatl uan michij ipan latas, arroz, etl, xapoj uan amatl tlen motekiuia baño. Ipati sejse caja ika ni tlamantli eliyaya se 65 dólares uan kinaxiliyaya naui semanas. Pampa miakej toikniuaj kinpolouayaya ni tlamantli, Katli kiyakanaj tlen kichiuaj sekinok comités kiijtojkej ueliskia kitekiuisej tomij tlen monekiskia, kiampa ueliskia kinpaleuisej toikniuaj ika tlen kinpolouayaya. Uan ¿kenijkatsa momaljuiskiaj toikniuaj kema kiuikaskiaj nopa tlapaleuili?

 Ipan marzo 13, omej toikniuaj tlen Polonia kikixtisej nopa tlakualistli tlen kali Betel tlen Polonia uan kichijkej kampeka kiuikasej Ucrania, kampa kisentiliaj tlakualistli nechka altepetl Leópolis (Lviv). Se keski tonali achtoui, toikniuaj tlen kali Betel tlen Polonia uan Ucrania kinpaleuijkej kuali ma elto ininama, kiampa amo ouij panoskia ipan Ucrania, uan kichijkej ipan inincarros ma kiijto inijuantij yauiyayaj tlapaleuitij. Se keskij toikniuaj tlen Ucrania kiniljuijkej tlake ojtli kinpaleuiskia nima ma asitij kampa kikauaskiaj nopa tlapaleuili. Kiampa uelkej kikauaj ipan Leópolis, uan ipan san se tonal, toikniuaj katli kiitaj kema se tlenijki tetlasojsoljuilia ya kiselijtoyaj, uan nopa omej toikniuaj tlakuepilijkej ininchaj ika kuali. Ni uelki mochiua pampa toikniuaj kuali moiljuijkej tlen kichiuaskiaj uan pampa Jehová kinteochijki.

 Maske nochi kuali kiski, tlen toikniuaj temakakej amo kiaxilik se tonelada (Se tonelada kej tlatamachiua ipan Estados Unidos). Nojua poliuiyaya temakasej se 200 toneladas (220 toneladas kej tlatamachiua ipan Estados Unidos). ¿Kenijkatsa nima kititlaniskiaj uan kinmakaskiaj toikniuaj nopa tlapaleuili?

 Kema kipojkej ipan jw.org kenijkatsa toikniuaj tlauel tlaijiyouijtokej pampa onkatok tlauilankayotl ipan Ucrania, miakej maseualmej kinejkej tlapaleuisej. Sekij katli uejka itstokej tlapaleuijkej kema temakakej tomij ika nochi ininyolo, kiampa kinpaleuijkej Jehová itlajtoltemakauaj pampa kimatiyayaj inijuantij kuali kitekiuiskiaj nopa tomij uan kinpaleuiskiaj toikniuaj ika tlen kinpolouayaya. Uan sekij katli euayayaj ipan altepeme tlen nechka eltoya kichijkej kampeka uan yajkej tlapaleuitoj. Ni eli san se keski neskayotl.

 Ipan Polonia miakej tlapaleuijkej ma mochiuaj miak cajas ika tlakualistli uan miakej konemej kichijchijkej tarjetas tlen kintitlaniliskiaj toikniuaj. Bartosz Kościelniak, se tlen katli kiitaj tlen mokouas ipan Polonia kiijtoua: “Maske miakpa nijpojtoya ipan Salmo 110:3 kiijtoua ‘motlakauaj ualasej kampa ta uan motenkauasej’, uelki nikitak nelia tlen nopaya kiijtoua, pampa miakej nimaj kinejkej tlapaleuisej, nochi sentik tekitiyayaj ipan tlen monekiyaya”.

 Se toikni katli kipia se ueyi empresa kampa kitekiuiaj uejueyi camiones, kikajki toikniuaj ma kintekiuikaj, uan ya tlaxtlajki nochi tlen monejki kema kiuikakej nopa tlapaleuili. Toikni kiijtoua: “Nijnekiyaya Jehova uan toikniuaj ma kimatikaj tlauel nikiniknelia, tlauel niyolpaki pampa uelki nitlapaleuik”. Toikniuaj temakakej se 7,700 litros (2,034 galones) tlen gasolina, uan sekinok toikniuaj tlapaleuijkej kema kikixtijkej tonali uan ininchikaualis, pampa kinemiltijkej nopa camiones se 48,000 kilómetros (30,000 millas).

 Pampa toikniuaj tlapaleuijkej ika nochi ininyolo uan chikauak tekitikej, ipan marzo 28, ya kititlantoyaj ipan Ucrania 100 toneladas (110 toneladas kej tlatamachiua ipan Estados Unidos) tlen tlakualistli, pajtli uan sekinok tlamantli. Uan pampa miakej toikniuaj uan katli tikinkouiliyayaj se keski tlamantli technemaktijkej miak tlamantli, amo motekiuik miak tomij kema tikinkualchijchijkej nopa cajas ika tlakualistli tlen tikintitlaniliskiaj toikniuaj. Ipan ni tonali Jehová itlajtoltemakauaj titlapaleuijtokej ika kipano se 190 toneladas (209 toneladas kej tlatamachiua ipan Estados Unidos) tlen tlapaleuili. ¿Kenijkatsa kiyolmatkej toikniuaj katli kiselijkej nopa tlapaleuili?

 Kema nopa cajas asito ipan Leópolis, toikniuaj katli kiitaj kema se tlenijki tetlasojsoljuilia tlen Ucrania nima kinuikilijkej toikniuaj nopa tlapaleuili. Miak tlen nopa cajas kinuikakej ipan altepemej tlen mokauaj kipano se 1,300 kilómetros (800 millas) tlen altepetl Leópolis (Lviv). Maske kichijkej kampeka nima kiuikasej, panok se keski tonali. a

 Markus Reinhardt, se tlen katli kiyakanaj Betel tlen Ucrania kiijtoua: “Ika tlen panotok, miakej toikniuaj kiitstokej kenijkatsa Jehová tlauel kiniknelia. Nojkia kiitstokej kenijkatsa tlauel kinpaleuijtok kema kichiuaj tlen Jehová itlanechikol kiniljuia maske ayamo pano tlen amo kuali. Se neskayotl, Jehová itlanechikol techiljuijtok ma tijsentilikaj tlakualistli tlen amo itlakaui uan atl tlen ika uelis timopanoltisej se keski semanas. Anton, katli eli ueuejtlakatl tlen se tlanechikoli tlen Kiev kiijtoua: “Tlauel tijtlaskamatiliaj Jehová itlanechikol pampa techkualchijchiua uan techiljuia tlen moneki tijchiuasej maske ayamo pano tlen amo kuali. Pampa tijpixtoyaj tlakualistli, atl uan se radio, uelkej timomanauiaj”. Tiyolpakij pampa toikniuaj kineltokakej tlen Jehová itlanechikol kiniljuik. Nopa kinpaleuik toikniuaj tlen kali Betel kuali ma moiljuikaj kenijkatsa kinpaleuiskiaj”.

 ¿Kenijkatsa kiyolmatkej toikniuaj kema kiselijkej nopa tlapaleuili? Míkola uan Zinaida, katli euaj Járkov kiijtojkej: “Tlauel techyolchikaua kema toikniuaj techpaleuiaj. Tiinmechtlaskamatiliaj pampa intechtitlanilijkej tlakualistli uan pajtli. Nochi ni tlamantli kichiua ma tikitakaj Jehová techpaleuijtok”. Valentina, katli nojkia eua nopaya, kiijtoua: “Kema pejki nopa tlauilankayotl, tlaj tijnekiyayaj titlakouasej monekiyaya timotekpanasej, tlauel tiuejkauayayaj uan amo nochipa tijpantiyayaj tlen tijtekiuiskiaj. Maske kiampa, Jehová kiitayaya tlen techpanotoya. Yeka kichijki toikniuaj ma techualikilikaj tlen techpolouayaya. Kema techpano tlen tlauel amo kuali uan timoiljuiaj ayokmo tikijiyouisej, ipan nopa tlalochtli tikitaj kenijkatsa Jehová uan itlanechikol tlauel techmokuitlauiaj uan toikniuaj techyolchikauaj uan techpaleuiaj kema tlauel moneki”.

 Evguen, Irina uan Mikita, katli monejki mochololtisej tlen Mariúpol, kiijtouaj: “Tlauel tiinmechtlaskamatiliaj pampa intechmokuitlauijtokej na uan nochampoyouaj. Tlauel intechpaleuijtokej. Maske timoiljuiyayaj nopa cajas san kiualikayaya tlakualistli uan tlen ueliskia tijtekiuisej, kema tikintlapojkej tijpantijkej se keski tlamantli tlen technextilik toikniuaj tlauel techikneliaj”.

 Tikitaj kenijkatsa Jehová techyakana ika itonal, pampa ueltok tikinpaleuiaj toikniuaj ika tlen moneki maske tijmatij “onka tlateuijkayotl”. Nojkia tlauel intechpaleuiaj pampa intemakaj inmotomij ipan donate.pr418.com. ¡Nelia tlauel tiinmechtlaskamatiliaj pampa intemakaj inmotomij ika nochi inmoyolo!

Nimaj titlapaleuiaj uan tijchiuaj kampeka kuali ma asi nopa tlapaleuili

1. Febrero 24, 2022: Katli kiyakanaj tlen kichiuaj sekinok Comités kiijtojkej ueliskia tijtekiuisej se achi tomij uan kiampa tikinpaleuiskiaj toikniuaj tlen Ucrania.

2. Febrero 24–marzo 8, 2022: Kali Betel tlen Ucrania kikoua se keski tlamantli uan kintitlanilia toikniuaj katli kiitaj kema se tlenijki tetlasojsoljuilia. Uan mokualchijchiuaj pampa kiselisej tlapaleuili tlen Polonia.

3. Marzo 9, 2022: Katli kiyakanaj tlen kichiuaj sekinok Comités kiijtojkej kintitlaniliskiaj tlapaleuili toikniuaj tlen Ucrania.

4. Marzo 10–12, 2022: Ipan Polonia mokualchijchiuaj pampa kititlanisej tlakualistli ipan altepetl Leópolis (Lviv) ipan Ucrania.

5. Marzo 13, 2022: Ipan Polonia kititlanij nopa tlapaleuili ma asi ipan Leópolis.

6. Marzo 14–16, 2022: Ipan Polonia, katli tlapaleuiaj kampa kiitaj kenijkatsa ipan nopa altepetl mochiua kali kampa titlaueyichiuaj mosentilijkej ipan se kali kampa mochiuaj uejueyi tlanechikolistli nechka altepetl Poznań uan kikualchijchijkej cajas ika tlakualistli uan sekinok tlamantli.

7. Marzo 17, 2022: Kema panotoya naui tonali ika kititlantoyaj nopa achtoui tlapaleuili, pejkej kiuikaj 13 toneladas (14 toneladas kej tlatamachiua ipan Estados Unidos) tlen paquetes ika tlamantli tlen kinpaleuiskia toikniuaj tlen Ucrania.

8. Marzo 21–27, 2022: Ipan Polonia kikualchijchiuaj sekinok cajas ika tlakualistli uan kititlanij Ucrania. San ipan se tonal ya kinuikilijtoyaj toikniuaj katli kinpolouayaya tlen ika mopanoltisej.

9. Marzo 28, 2022: Kema panok 20 tonali kema kiijtojkej kinuikiliskiaj tlapaleuili toikniuaj ipan Ucrania, ya tijtitlantokej 100 toneladas (110 toneladas kej tlatamachiua ipan Estados Unidos) tlen tlakualistli, pajtli uan sekinok tlamantli.

 Ipan ni tonali Jehová itlajtoltemakauaj tijtitlantokej Ucrania kipano se 190 toneladas (209 toneladas kej tlatamachiua ipan Estados Unidos) tlen tlakualistli uan tlapaleuili.