Kipano se 60% katli tlajtolkuepaj itstokej ipan kali kampa kitlajtolkuepaj amatlajkuiloli (ORT), uan amo ipan kali Betel. ¿Kenijkatsa tepaleuia? ¿Tlake tlamantli kitekiuiaj toikniuaj katli tlatekipanouaj ipan ORT? ¿Kenke tlauel kinpaleuia toikniuaj katli itstokej ipan se ORT nojua tlauel kuali ma tlajtolkuepakaj?

 Tlauel kinpaleuia toikniuaj katli itstokej ipan kali kampa tlajtolkuepaj pampa itstokej kampa maseualmej kamanaltij nopa tlajtoli. Karin, katli kitlajtolkuepa amatlajkuiloli ipan bajo alemán, kiijtoua: “Nama tiitstokej ipan ORT tlen Cuauhtémoc, ipan Chihuahua (México). Yeka, nochipa tikamanaltij bajo alemán, uan amo san ininuaya toikniuaj katli tlajtolkuepaj o ipan tlajtolmoyaualistli, nojkia kema tiauij titlakouaj. Tlauel techpaleuijtok tiitstokej ininuaya katli kamanaltij ni tlajtoli pampa tijkakij se keski tlajtoli tlen amo tijkaktoyaj. Nama tijmatij kenijkatsa nelnelia kamanaltij maseualmej”.

 James itstok Ghana uan tlatekipanoua ininuaya toikniuaj katli tlajtolkuepaj ika tlajtoli Frafra. Maske kintemoua toikniuaj katli itstokej Betel, ya kiijtoua: “Tlauel nechpaktia niitstos ipan ORT. Nojkia nechpaktia nitlajtolmoyauas uan nikitas kenijkatsa nopa kuali tlamachtili asi ipan ininyolo maseualmej”.

 ¿Tlake kinpaleuia toikniuaj kimatisej kanke uelis elis se ORT? Joseph, katli tlatekipanoua kampa kiitaj kenijkatsa mochijchiua Kali kampa Titlaueyichiuaj ipan Tlaltipaktli ipan Warwick (Nueva York), kiijtoua: “Kemantika nopa altepemej kampa tijnekij tijchijchiuasej se ORT amo onka miak atl yon tlauili, uan nojkia amo onka kuali Internet tlen techpaleuis ma tijkixtikaj tlen tijtlajtolkuepasej. Yeka, achtoui moneki tikitasej ipan tlake altepemej tlen kamanaltij nopa tlajtoli uelis tijchiuasej se ORT”.

 Yeka, kichijchiuaj se ORT kampa toikniuaj amo uejka itstokej, kej ipan Kali kampa mochiua uejueyi tlanechikolistli, ipan kali kampa timosentiliaj o kampa mokauaj misioneros, kiampa amo kitekiuiaj miak tomij. Tlaj ipan nopa altepetl amo onka se tlen ni tlamantli, uajka toikniuaj kikouaj se kali kampa uelisej mokauasej uan tekitisej. Tlaj toikniuaj katli tlajtolkuepaj monekis yasej sejkanok, uajka nopa kali tlen kikojtoyaj sampa kinamakaj, uan nopa tomij motekiuia kampa moneki.

 Ipan xiuitl 2020 motekiuik 13 millones de dólares kema kikualchijchijkej ORT. Toikniuaj katli tlajtolkuepaj kinmakakej computadoras, programas tlen kinpaleuiskia computadoras kuali ma tekitikaj, tlen ika kichiuaskia grabaciones, Internet uan sekinok tlamantli. Se neskayotl, monekiyaya 750 dólares uan kiampa kikouaskiaj se computadora uan nojkia kitlalisej se keski programas. Nojkia, katli tlajtolkuepaj kitekiuiaj Watchtower Translation System, nopa kinpaleuia ma tlajtolkuepakaj uan ma kichiuakaj ininteki kej kinamiki.

 Nojkia, katli tlajtolkuepaj kinmakaj se keski tlamantli tlen ika kichiuasej grabaciones kampa tekitij. Ni tepostli tlauel kinpaleuik kema pejki momoyaua kokolistli COVID-19 pampa uelki kiuikaj ininchaj uan nopaya kichijkej grabaciones tlen videos uan amatlajkuiloli.

 Nojkia tlapaleuiaj sekinok toikniuaj kema kiitaj se keski amatlajkuiloli uan kema kikualchijchiuaj se keski tlamantli. Cirstin, katli tekiti ipan kali kampa kitlajtolkuepaj amatlajkuiloli ika tlajtoli afrikáans ipan Ciudad del Cabo (Sudáfrica), kiijtoua: “Miakej toikniuaj uan precursores tekitij ika tlen kimatij kichiuasej”.

 Nochi katli nopaya tekitij tlauel yolpakij. Se neskayotl, se tosiuaikni katli tlapaleuia ipan se ORT kiijtoua tlauel kiyolchikaua kema nopaya tekiti. Se keski toikniuaj tlapaleuiaj kema kichiuaj grabaciones. Juana, katli tlajtolkuepa ika tlajtoli totonaco tlen Veracruz (México), kiijtoua: “Kampa tiitstokej miakej kamanaltij totlajtol, yeka nama miakej toikniuaj uelis techpaleuis ika grabaciones”.

 ¿Nelia kinpaleuia toikniuaj katli itstokej ipan se ORT nojua tlauel kuali ma tlajtolkuepakaj? Miakej kiijtouaj kena. Cédric, katli tlajtolkuepa ika tlajtoli Congo tlen República Democrática del Congo, kiijtoua: “Se keski toikniuaj kiijtouayayaj tlen motlajtolkuepayaya eliyaya tlen congo ‘de la Watch Tower’ pampa amo kuali kikuamachiliyayaj. Nama kiijtouaj titlajtolkuepaj tlen congo tlen inijuantij kamanaltij pampa kena kikuamachiliaj uan motekiuia tlajtoli tlen kiixmatij”.

 Andile katli tlajtolkuepa ika tlajtoli xhosa kiijtoua nojkia kiampa pano ipan Sudáfrica. Ya kiijtoua: “Miakej kiijtouaj mopatlatok kej motlajtolkueptok amatlajkuiloli. Se keski konemej katli kipouayayaj Tlen Tematiltia ika inglés nama kipouaj ika xhosa. Uan tlauel kinpaktia kipouasej Traducción del Nuevo Mundo pampa nima kikuamachiliaj”.

 Nopa tomij tlen temakaj ika nochi ininyolo ipan pilkuakajontsitsij o ipan donate.pr418.com, motekiuia kema kichijchiuaj se ORT, kema kikualchijchiuaj se tlamantli uan tlen kitekiuiaj toikniuaj.