Sejse xiuitl, miakej toikniuaj katli senkistok tlatekipanouaj yauij Kampa momachtiaj ipan Galaad ipan Patterson (Nueva York). a Kampa momachtiaj kinpaleuiaj nojua kuali ma kitekipanokaj Jehová. Uan kiampa uelis kinpaleuisej toikniuaj kuali ma tlaneltokaj, kuali tlatekipanosej ipan tlanechikoli uan ipan kali Betel.

 Kampa momachtiaj ipan Galaad yauij katli kampa uelij euaj. Se neskayotl, kema ipan 2019 mochijki clase 147 itstoyaj 56 toikniuaj katli euayayaj ipan 29 altepemej. Toikniuaj katli nopaya momachtiaj senkistok tlatekipanouaj, sekij elij betelitas, precursores especiales, misioneros o katli tepaxalouaj chijchikuasej metstli.

 Ika miak metstli toikniuaj kiitaj kenijkatsa kinpaleuisej katli yasej momachtitij. Se neskayotl, Katli kiitaj keski tomij motekiuis tlaj yasej kanajya inijuantij kikouaj nopa boletos tlen avión. Sejse toikni katli yajki ipan clase 147, kitekiuik 1,075 dólares tlen ika yajki Patterson uan tlakuepilik kampa tlatekipanouayaya. Kema toikniuaj katli euaj islas Salomón yajkej Patterson tlejkokej ipan naui aviones, uan eyij kema tlakuepilijkej, kiampa kichijkej kipano 35,400 kilómetros. Sejse toikni kitekiuik 2,300 dólares. Yeka, Katli kiitaj keski tomij motekiuis tlaj yasej kanajya toikniuaj, kitekiuiaj se programa tlen kinpaleuiaj ma kipantikaj boletos tlen amo patiyo. Kema toikniuaj kikouaj nopa boleto, nopa programa nojua kitemoua ipan miak semanas o miak metstli nopa boletos tlen amo patiyo. Katli kiitaj keski tomij motekiuis tlaj yasej kanajya nojkia kitekiuiaj puntos de viajero tlen temakaj aerolíneas.

 Miakej toikniuaj katli yauij Galaad amo kipiaj nopa amatl tlen kinpaleuia panosej Estados Unidos. Yeka, toikniuaj katli tlatekipanouaj ipan Asuntos Legales tlen Ueyi Kali Betel kinpaleuiaj toikniuaj ma kipiakaj nopa amatl. Sejse toikni tlaxtlaua se 510 dólares kema kikixtia nopa amatl.

 ¿Kenijkatsa techpaleuia kema toikniuaj yauij Kampa momachtiaj ipan Galaad? Hendra Gunawan, se ueuejtlakatl katli tlatekipanoua ipan se tlanechikoli tlen Sureste Asiático, kiijtoua: “Ipan totlanechikol amo itstoyaj precursores regulares. Uan kema asitoj toikni iuaya isiua katli yajkej momachtitoj Galaad, miakej pejkej tlatekipanouaj kej precursores. Uan teipa se tosiuaikni tlen totlanechikol yajki Kampa kinmachtiaj tlajtolmoyauanij”.

 Sergio Panjaitan tekiti ininuaya toikniuaj katli yajkej momachtitoj Galaad ipan se kali Betel tlen Sureste Asiático. Ya kiijtoua: “Tlen kiyekojkej toikniuaj amo san inijuantij kinpaleuijtok, nojkia tojuantij tlauel techpaleuijtok. ¡Kiyekojkej miak tlamantli! Maske kimatij miak tlamantli, inijuantij amo moueyimatij uan techmachtiaj tlen kiyekojkej. Tlen kichiuaj tlauel techyolchikaua uan nojkia techpaleuia tikinyolchikauasej sekinok”.

 ¿Kenijkatsa kiixtlauaj tlen motekiuia Kampa momachtiaj ipan Galaad? Ika tomij tlen toikniuaj temakaj ika nochi ininyolo. Miakej temakaj tomij o sekinok tlamantli ipan donate.pr418.com. Tlauel tiinmechtlaskamatiliaj pampa intlapaleuiaj ika nochi inmoyolo. Uan yeka miakej toikniuaj katli kampa uelij euaj uelij yauij Kampa momachtiaj ipan Galaad.