Katli kinyakanaj Jehová itlajtoltemakauaj kuali kitekiuiaj nopa tomij tlen titemakaj para kichijchiuasej kali tlen techpaleuis ma tijmoyauakaj nopa kuali tlamachtili. Ipan xiuitl 2023, ipan miak kali Betel kitekiuijkej kipano 500 millones de dólares a para kikouasej, kichijchiuasej uan kikualchijchiuasej kali kampa timosentiliaj uan kampa mochiua uejueyi tlanechikolistli. Uan nojkia motekiuik miak tomij pampa ipan nochi tlanechikoli kikualchijchijkej kampa mosentiliaj.

 Nojkia, nopa tomij tlen titemakaj motekiuia para kichijchiuasej uan kikualchijchiuasej kali Betel, pampa nopaya kiitaj kenijkatsa titlajtolmoyauasej ipan nochi Tlaltipaktli. Ipan se keski kali Betel mopatlatok se keski tlamantli pampa kiampa nopa tomij ueli motekiuia para mochijchiuas o mokualchijchiuas kampa timosentiliaj uan kampa mochiua uejueyi tlanechikolistli. Pero nojua moneki miak tomij para mokualchijchiuas uan para kipatlasej se keski kali Betel. ¿Kenke tlauel ipati ni tekitl? ¿Uan kenke nopa tekitl tlen mochiua ipan kali Betel tlapaleuia nojua ma momoyaua nopa kuali tlamachtili? Ma tikitakaj.

 Miak kali Betel kichijchijkej ya kipano se 30 o 40 xiuitl. Nicholas, katli tlatekipanoua Kampa kiitaj kenijkatsa ipan Tlaltipaktli mochijchiua Kali kampa titlaueyichiuaj, kiijtoua: “Maske se keski kali kuali kimokuitlauiaj, nojua moneki kikualchijchijtinemisej pampa kema panotia xiuitl, se keski tlamantli peua nempoliui. Kema se kali mokualchijchiua, uelis sampa motekiuis”.

 Nojkia monektok mopatlas se keski tlamantli ipan Betel pampa mopatlatia tlen mochiua nopaya. Kema mochijchijki miak kali Betel, ayamo itstoyaj miakej toikniuaj uan nama tlauel momiakilijtokej. Yeka moneki más toikniuaj ma tlapaleuikaj nopaya. Uan miak tlen nopa kali ayokmo kinaxilia toikniuaj.

 Nojkia moneki kinmokuitlauisej toikniuaj katli itstokej ipan Betel. Tiitstokej ipan itlamia tonali, yeka momiakilijtok miak tlamantli tlen tetlasojsoljuilia uan tlen uelis kichiuas ma timikikaj (Lucas 21:11). Kema kikualchijchiuaj se kali Betel, kitekiuiaj yajyankuik tlamantli tlen ika kalchiuaj, kiampa amo nima sosoliuis. Nojkia, kema se tlamantli tetlasojsoljuilia, nopa kali uelis kitekiuisej para kinpaleuisej toikniuaj katli tlaijiyouiaj uan kiitasej kenijkatsa nojua uelis kitekipanojtosej Jehová.

 Ipan xiuitl 2023, Katli Kinyakanaj Jehová itlajtoltemakauaj kiijtojkej kikualchijchiuaskiaj 43 kali Betel, ¡eli tlajko tlen nochi kali Betel tlen onka! Ma tikitakaj kenke tlauel ipati nopa tekitl tlen mochiua nopaya.

 Angola. Matt, se tlen Katli kiyakanaj Betel ipan Angola, kiijtoua: “Tlauel timosentlachiliaj kema tikitaj kenijkatsa moaxitia Hageo 2:7. ¡Pampa ipan matlaktli xiuitl tlen panotok momiakilijtokej tlajtolmoyauanij se 60%! Para kinpaleuisej nochi nopa toikniuaj, monekiyaya kiueyilisej kali Betel. Ayokmo ueliyayaj kintlaneuij sekinok ma tlapaleuitij nopaya, yeka miakej katli itstoyaj Betel monejki más tekitisej”.

 Kiniljuijkej se keskij toikniuaj ma kiitakaj kenijkatsa ueliskia kiueyilisej nopa kali Betel. Achtoui moiljuijkej nima tlamiskiaj uan kuali eliskia tlaj san kikualchijchiuaskiaj. Pero teipa kiitakej tlaj kiampa kichiuaskiaj, san kiajauiltekiuiskiaj nopa tomij tlen temakaj toikniuaj. Moiljuijkej más kuali tlaj kikouasej uan kikualchijchiuasej se kali tlen eltoya nechka. Matt kiijtoua: “Kema nopa toikniuaj kiniljuijkej Katli kiyakanaj Betel kinekiyayaj kikouasej uan kikualchijchiuasej nopa kali, techtekipachok pampa timoiljuiyayaj amo ueliskia kuali titekitisej ipan se kali tlen tojuantij amo tijchijchijtoyaj. Pero nama tikitaj Jehová kiteochijki tlen tijtlapejpenijkej pampa nopa kali tlauel tlapaleuijtok”.

 Uelis teipa nopa kali Betel tlen Angola monekis nojua más ma moueyili. Nopa yankuik kali tlen kichijchijkej, nopa kaltinij tlen kichijchijkej uan nopa kali tlen kiixtlauaj tlauel tlapaleuis ipan nopa altepetl, pampa nopaya tlauel momiakiliaj toikniuaj.

 Japón. Nopa kali Betel tlen ni altepetl mochijchijki kipia nechka 40 xiuitl uan kikualchijchijtokej san se keski tlamantli. Maske kena kichijtokej kampeka kikualchijchiuasej, ya uejkajtok motekiuia ni kali. Yeka, se keskij toikniuaj ya pejkej kikualchijchiuaj.

 Namanok, mopatlatok kej itstokej toikniuaj ipan Betel. Achtouia, Kali Betel kichijchiuayaya tlakualistli para nochi katli nopaya tlatekipanouayayaj. Yeka ipan cuartos kipixtoyaj cocinas pilsiltsitsij. Pero ipan 2015, toikniuaj tlen Betel monejki más tlakualchiuasej inincuarto. Yeka, monejki kiueyilisej nopa cocinas. Tosiuaikni Kumiko, katli tlatekipanoua ipan kali Betel tlen Japón, kiijtoua: “Ni cocina nechpaleuijtok nima ma nimomati nijchiuas tlen mopatlatok ipan Betel. ¡Nama nijmati kejuak niitstok nochaj!”.

 Nopa tekitl tlen mochiua ipan kali Betel tlen Japón tlauel kinpaleuijtok toikniuaj ipan nochi Tlaltipaktli (Mateo 28:19, 20). Pampa san ipan ni kali Betel uan ipan seyok, ueli kikixtiaj Biblia nejmaxtik ika amatl. Yeka kitlalijkej se tepostli tlen uelis kinechikos tlaltejpoktli uan amatl. Tijkouas uan tijtlalis ni tepostli ipati nechka se millón de dólares, pero kinpaleuia katli tekitij ipan imprenta, kiampa nojua ueli mokixtia amatlajkuiloli uan momoyaua.

 Kema tlakualchijchiuayayaj, nojua kinekiyayaj ma kisto Biblia ika amatl. Trey, se tlen Katli kiyakanaj Betel ipan Japón, kiijtoua: “Kema tlakualchijchijtoyaj, nojua monejki tijkixtisej miak biblias pampa pejki kisa ika miak tlajtoli”. Miak departamentos tlen Betel uan se empresa monejki mopaleuisej sansejko para kitlalisej nopa yankuik tepostli uan kiampa nojua kistos amatlajkuiloli. Maske elki ouij, ipan marzo uan agosto 2023 mokixtik nechka 220 mil biblias sejse metstli. Miak kiski maske ipan nopa metstli tekititoyaj ipan imprenta. Uelki mochiua nochi nopa tekitl uan san motekiuik tomij tlen kiixtlalijtoyaj.

 Toikniuaj nojkia moneki kiitasej kenijkatsa amo tlauel kitekiuisej tlauili. Yeka, kitlalisej yankuik paneles solares tlen tlapaleuis amo tlauel ma motekiui tlauili, uan ma moajokui se 120 mil dólares sejse xiuitl. Nojkia kitlalisej ventanas tlen tlauel tilauak, nopa kichiuas amo tlauel ma motekiui tlauili uan moajokuis nechka 10 mil dólares sejse xiuitl. Maske motekiuis más miak tomij, teipa tlapaleuis ma moajokui uelis kipano tres millones uan tlajko de dólares, uan nojkia amo tlauel kisokiuis Tlaltipaktli.

 Tlen kichijtokej ipan Angola uan Japón kinextia nochi tlen moneki mochiuas ipan sekinok kali Betel para uelis nojua kinpaleuijtosej toikniuaj. ¡Nojua moneki mochiuas sekinok tekitl! Aaron, katli tlatekipanoua Kampa kiitaj kenijkatsa ipan Tlaltipaktli mochijchiua Kali kampa titlaueyichiuaj, kiijtoua: “Maske ya mochijtok miak tekitl, nojua poliui sekinok…”. Ya kiijtoua tlake moneki para nojua mochiuas sekinok tekitl tlen poliui: “Tlaj toikniuaj amo tlapaleuiskiaj ika tomij, amo ueliskia tijchiuasej ni tekitl. Pero nojkia tlauel tikintlaskamatiliaj toikniuaj katli kinekij tlapaleuisej ika nochi ininyolo uan katli kiitaj kenijkatsa tlapaleuisej teipa. Toikniuaj tlauel tlapaleuijtokej uan temakatokej inintomij, ni kinextia Jehová kiteochiua tlen tijchiuaj” (Salmo 110:3).

 Ueli mochijchiua uan mokualchijchiua miak kali kampa titlaueyichiuaj pampa intemakaj inmotomij ika nochi inmoyolo, uan miakpa intemakaj ipan donate.pr418.com. ¡Tlaskamati miak pampa intemakaj inmotomij!