Kipano se 130 xiuitl Jehová itekipanojkauaj tlen ni tonali mosentiliaj ipan uejueyi tlanechikolistli. Nopaya tikitasej kipano se 40 tlamachtili, uikatl, se keskij toikniuaj kiijtosej tlen kinpanotok uan videos. Nochi katli yasej ipan uejueyi tlanechikolistli tijnekij ma yolpakikaj uan ma moyolchikauakaj, yeka moneki kuali kakistis uan kuali nesis (Lucas 2:20). ¿Kenijkatsa tlapaleuia nopa tomij tlen intemakaj ika nochi inmoyolo maske kampa ueli mochiua uejueyi tlanechikolistli?

 Timotlaneuij kampa mauiltiaj kema mochiuas uejueyi tlanechikolistli uan nopaya ya kipiaj audio uan video. Uajka ¿kenke tojuantij moneki tijuikasej uan tijtlalisej audio uan video? David katli tlatekipanoua ipan Broadcasting ipan ueyi Kali Betel kiijtoua: “Ma tikilnamikikaj ipan ni uejueyi tlanechikolistli mopanoltia miak tlamachtili. Katli kikakitij nopa tlamachtili itstosej se tonal uan kampa timotlaneuij kemantika amo kuali kakisti. Se neskayotl, kampa mauiltiaj kitekiuiaj bocinas para ma kakisti chikauak se uikatl. Uan ipan televisión san tematiltiaj ajkia tlatlantiaj, kitlaliaj tlen panok uan sekinok tlamantli. Ipan uejueyi tlanechikolistli mopanoltia videos tlen uejkaua uan tijnekij nochi katli nopaya itstokej kuali ma kikakikaj tlen moijtoua tlaixpa”.

 Kampa mochiua uejueyi tlanechikolistli amo sanse eli yeka, nopa audio uan video monekis kitlalisej kampa kuali nesis uan kuali kakistis. Uan nopa moita kema kitlapejpeniaj kanke mochiuas uejueyi tlanechikolistli. Katli tlatekipanouaj ipan Broadcasting kiitaj keskij maseualmej mosentilisej uan kanke moseuisej. Nojkia toikniuaj kiitaj kanke motlalis bocinas uan pantallas. Uan teipa kichiuaj se lista ika se keski tlamantli tlen motekiuis kiampa kuali kakistis uan kuali nesis.

 Tlauel ouij kimatij kema mopanoltia uejueyi tlanechikolistli ipan miak tlajtoli. Katli tlajtolkueptij kikaktia tlen tlamachtiaj uan tlen kitlajtolkuepa mopanoltia sanse kej nopa sekinok tlamachtili. Uan nopa ueli mochiua ika se programa tlen kiualika nopa computadora, tlen kichiua ma kakisti hasta ipan chikueyi tlajtoli kiampa nochi katli itstokej nopaya kuali kikakisej uan kiitasej. David kiijtoua: “Nopa programas tlen kiualika nopa computadoras tlauel ouij para kitekiuisej yeka, katli tlatekipanouaj ipan audio uan video moneki kuali momachtisej”.

 Sejse kali Betel kipia audio uan video tlen motekiuia sejse xiuitl. Nojkia toikniuaj kiitaj nochi tlen motekiuis uan ma motitlanis ipan sejse uejueyi tlanechikolistli. Kema kali Betel tlen Estados Unidos kititlani tlen motekiuis ipan audio uan video, sejse xiuitl motekiuia kipano se $200,000 dólares a. Tlaj mokouaskia audio uan video yajyankuik monekiskia ma mokualchijchiua uan nopa tlauel patiyo kisaskia. Steven, katli tlapaleuik kampa kitlaliaj audio uan video ipan se ueyi tlanechikolistli tlen Canada, kiijtoua: “Katli tlatekipanouaj nopaya kiitakej amo tleno ma poliui: kej se tuerca, tornillo uan cable... Nochi mopojki uan kuali moajojki kiampa sampa motekiuiskia ipan seyok uejueyi tlanechikolistli”.

 Tlauel patiyo kisa kema motlaneuij audio uan video uan kemantika amo kuali eltok yon amo kakisti. Yeka mokoua tlen motekiuia ipan audio uan video. Ipan ni tonali se ueyi pantalla LED tlen iuexka makuili metros iuejkapanka uan eyi metros ipatlajka ipati kipano se $24,000 dólares, uan se cable tlen iueueyaka se 15 metros ipati se $20 dólares. Yeka tikiniljuia toikniuaj Katli kiitaj tlen mokouas ma techpaleuikaj tikitasej “keski tomij monekis” tlaj mokouas (Lucas 14:28). Uan motlatsintokiaj, ¿keskij kitekiuisej? ¿Nelia moneki mokouas? ¿Kanke moajokuis? uan ¿itstokej toikniuaj katli uelis kikualchijchiuasej?

 Para amo nima ma sojsoliui nopa equipos de audio uan video moneki mokualchijchiuas se keski tlamantli, kiampa amo motekiuis miak tomij tlen temakaj. Nojkia tijtekiuiaj baúles kampa moajokui tlen motekiuia ipan audio uan videos kiampa amo nima sojsoliuis uan kemantika nojkia moneki mokualchijchiuas ni baúles.

 Se keskij maseualmej katli amo elij Jehová itlajtoltemakauaj mosentlachiliaj kema kiitaj ipan uejueyi tlanechikolistli kuali kakisti audios uan videos. Se neskayotl, se tlakatl katli tekiti ipan se empresa tlen radio uan televisión mosentlachilik kema kiitak kenijkatsa mochijchiua audios uan videos. Jonathan, katli tlapaleuia kampa kitlaliaj audio uan video ipan uejueyi tlanechikolistli kiijtoua: “Kema nopa tlakatl kimatki katli nopaya tekitij san tlapaleuiaj mosentlachilik uan kiijtok, tlen tijtlalijkej ipan se tonali uan tlajko inijuantij kitlalijtoskiaj ipan makuili tonali”. Ipan seyok uejueyi tlanechikolistli seyok tlakatl kiijtok: “Nikaj tekititokej miakej katli momachtijtokej kichiuasej audio uan video pero ¡inmojuantij kuali inkichiuaj inmoteki!”.

 ¿Kenijkatsa mitspaleuia audio uan video ipan uejueyi tlanechikolistli? Uelis tijyolmati kej David katli eua Inglaterra kiijtoua: “Nijpia 88 xiuitl uan nochipa niyajtok ipan uejueyi tlanechikolistli. Achtouia ouij nijmatiyaya kuali nijtlakakilis nochi tlamachtili, pero nama kuali nijkuamachilia nochi tlen mopanoltia pampa kipia yejyektsitsij videos”. Micheal katli eua Nigeria kiijtoua: “Toikniuaj san mosentlaliaj kikakisej nopa tlamachtili pampa kuali kakisti uan kuali nesi videos”.

 Kema tias ipan uejueyi tlanechikolistli tlen eyi tonali uan tlen san kemantika mochiua tlen ni xiuitl “¡Ma tijmoyauakaj nopa kuali tlamachtili!”, ximoiljui nochi tekitl tlen mochijki para kuali tijkakis uan kuali tikitas uejueyi tlanechikolistli. Tlauel tijtlaskamatij pampa intemakaj tlen inkipiaj uan nojkia pampa intemakaj tomij ika nochi inmoyolo ipan donate.pr418.com. Ika nopa tomij nojua uelis mochiuas uejueyi tlanechikolistli. ¡Tlaskamati miak!.