¡KUALI XITLACHIXTOKAJ!

Tlauel timotekipachojkej uan titlaijiyouijkej ipan 2022 | ¿Tlake kiijtoua Biblia?

Ma kakisti ipan

Ipan xiuitl 2022, tikitstokej ipan noticias kenijkatsa panotok tlauilankayotl, maseualmej amo kipiaj tomij uan tetlasojsoljuilijtok miak tlamantli. Biblia xitlauak kiijtoua kenke panotok nochi ni.

¿Kenke panotok tlen amo kuali?

Tlen panotok ipan 2022 kinextia tiitstokej ipan “itlamia tonali”, uan Biblia kiijtoua ni pejki ipan 1914 (2 Timoteo 3:1). Xikita kenijkatsa tlen panotok ipan ni tonali eli sanse ika tlen Biblia kiijtok panoskia:

“Tlateuijkayotl” (Mateo 24:6).

“Ipan 2022, ipan Europa sampa kiitakej kenijkatsa tetlaijiyouiltia tlauilankayotl”. a

Xikita tlamachtili “Rusia kiteuia Ucrania”.

“Ueyi mayantli” (Mateo 24:7).

“Ipan 2022, kampa ueli tlauel onka mayantli”. b

Xikita tlamachtili “Nopa tlauilankayotl ipan Ucrania kichijtok nojua ma onka mayantli”.

“Uejueyi kokolistli” (Lucas 21:11).

“Kema nojua momoyajtoya nopa kokolistli viruela del mono uan nopa COVID-19, sampa pejki momoyaua nopa kokolistli poliomelitis. Ni kinextia kenijkatsa se kokolistli nima momoyaua uan maseualmej amo uelij momanauiaj”. c

Xikita tlamachtili “Chikuasej millones maseualmej mijkej ika COVID”.

“Tlamantli tlen kinmajmatis” (Lucas 21:11).

“Ipan ni tonali tlauel tlatotonia, tlauel tlauaki, tlatla kuatitlamitl uan tlatemi. Maseualmej tlauel kiilnamikisej xiuitl 2022 pampa miak tlamantli kintlasojsoljuilik, mijkej miakej maseualmej uan miakej mochololtijkej”. d

Xikita tlamachtili “Ipan nochi Tlaltipaktli tlauel tlatotonia”.

“Miakej tlauel mosisiniaj” (Lucas 21:9, Icamanal Toteco).

“Ipan 2022, maseualmej tlauel kualankej uan moajkomankej o kinijixnamijkej tekichiuanij pampa kiitakej kenijkatsa amo onkayaya tomij uan kenijkatsa tlauel tlapatiyojki”. e

Xikita tlamachtili “¿Tlake kiijtoua Biblia pampa tlauel tlapatiyoua?”.

¿Tlake panos ipan xiuitl 2023?

Maske amo tijmatij tlake panos ne se xiuitl, kena tijmatij toTeotsij iTlanauatijkayo nechka kitlamiltis tlen amo kuali tlen pano ipan ni Tlaltipaktli (Daniel 2:44). Nopa tlanauatijkayotl kitlamiltis tlen techtlaijiyouiltia, uan kiampa mochiuas tlen toTeotsij kineki (Mateo 6:9, 10).

Jesucristo kiijtok: “Xitlachixtokaj kuali” (Marcos 13:37). Yeka, kuali xikitakaj kenijkatsa ika tlen nama panotok moaxitia tlen Biblia kiijtok panoskia. Tlaj tijneki tijmatis kenijkatsa Biblia uelis mitspaleuis ximotemachi teipa kuali tiitstos ta uan mochampoyouaj, uajka xitechtemo uan tojuantij timitsmachtisej.

a AP News, “Ipan 2022, ipan Europa sampa kiitakej kenijkatsa tetlaijiyouiltia tlauilankayotl” (kiijkuilok Jill Lawless, diciembre 8, 2022).

b World Food Programme, “Kampa ueli tlauel onka mayantli”.

c JAMA Health Forum, “Tiitstokej kema onka miak kokolistli: COVID-19 uan viruela del mono, Poliomelistis uan kokolistli X” (kiijkuilok Lawrence O. Gostin, JD, septiembre 22, 2022).

d Earth.Org, “¿Kenke ipan 2022 tlauel tlatotonia, tlatemi uan san tlemach tetlasojsoljuilia?” (kiijkuilok Martina Igini, octubre 24, 2022).

e Carnegie Endowment for International Peace, “Ipan 2022 tlauel miakej tlaijixnamijkej pampa amo onka tomij” (kiijkuilok Thomas Carothers uan Benjamin Feldman, diciembre 8, 2022).