¿Tlake kiijtoua Biblia panos pampa ayokmo tijpiaj miak atl para tikisej uan tijtekiuisej?
Ipan nochi Tlaltipaktli timonekiliaj kuali atl para tijtekiuisej uan tiitstosej. Maske kiampa amo nochi tijpiaj, kej kiijtok nopa secretario general de la ONU António Guterres, “ipan ni tonali amo tijpiaj miak atl para tikisej uan mojmostla momiakiliaj maseualmej katli amo kipiaj kuali atl”.
Strdel/AFP via Getty Images
¿Asis se tonali kema nochi tijpiasej kuali atl, o ayokmo kema tijpiasej atl? ¿Tlake kiijtoua Biblia?
Tlen Biblia techtenkauilia
Biblia kiijtoua asis se tonali kema onkas miak atl. Tlen uelis tikisej, tijtekiuisej uan ayokmo tiauakisej.
“Uan ipan nopa uaktok tlali onkas miak pilueyatsitsij tlen kipiasej atl. Nopa ipan uaktok tlali momanas atl. Uan kampa más tlauaktok meyas atl tlen mochiuas miak atlajtli” (Isaías 35:6, 7).
¿Nelia uelis tijneltokasej tlen Biblia kiijtoua? Ximoiljui kenijkatsa Biblia kiijtoua kichijchijtokej Tlaltipaktli.
Biblia kiijtoua kenijkatsa kichijchijtokej Tlaltipaktli uan kenke amo kema tlami atl
“Pampa TOTEKO tlen kichijchijki iluikaktli uan tlaltipaktli [...] axkichijchijki para eltos kaktok. Kichijchijki uan kikualtlalik para ipan ma itstokaj tlakamej” (Isaías 45:18).
Dios kichijchijki Tlaltipaktli para ma onka nemilistli uan ma tiitstokaj, yeka kichijchijki miak tlamantli para ma yoli atl.
“Toteko [...] kichiua ma tlejko nopa apoktli uan teipa kichiua ma uetsi atl ipan tlaltipaktli. Tlen nopa mixtli, Toteko kichiua ma uetsi atl tlen kuali para ma atlikaj nochi tlakamej” (Job 36:26-28).
Ni textos amo ouij kiixtomaj kenijkatsa Dios kuali kichijchijki se keski tlamantli katli tlapaleuia ma onka uan ma amo tlami atl ipan Tlaltipaktli. Nopa atl tlen onka ipan tlali uan ueyi atl tlejko kej apoktli, mochiua mixtli uan teipa tlakiaui uan kiampa onka atl tlen uelis kiisej maseualmej uan tlapialmej (Eclesiastés 1:7; Amós 5:8).
“Uajka nijchiuas para ma uetsis atl ipan inmotlal kema moneki uetsis atl. Uan nopa tlali temakas miak pixkistli, uan nopa kuatinij temakasej miak itlajka hasta mokauas” (Levítico 26:4).
Dios kiniljuik israeleuanij katli motlatojtokiyayaj, kinmakaskia atl uan kiampa pixkaskiaj miak. Jehová kimati moneki uetsis atl kema moneki uan kiampa onkas tlakualistli.
Dios kichijki tlen kiniljuik uan nechka kiaxitis ipan nochi Tlaltipaktli tlen techtenkauilijtok (Isaías 30:23). Ipan ni tonali ayamo moaxitia ni tlajtoli, ipan nochi Tlaltipaktli amo onka atl yon uetsi yeka tlauel ouij tiitstokej. Uajka ¿tlake kiijtoua Biblia panos?
¿Tlake techpaleuis sampa ma onka atl?
Biblia kiijtoua san toTeotsij uelis kikualchijchiuas Tlaltipaktli uan ma onka atl. Ya kipia ipan iluikak se tlanauatijkayotl uan kitokaxtia iTlanauatijkayo Dios (Daniel 2:44; Mateo 6:9, 10; Apocalipsis 11:15). Dios uelis kichiuas tlen yon se tlanauatijketl amo ueltok kichiua uan ya kichiuas ma tijpiakaj miak atl.
Tlen pano: Tlauel tlatotonia yeka amo kuali tiitstokej, kanajya chikauak tlakiaui, kampa ueli amo onka atl, kanajya tlatemi uan moueyilia mar.
Tlen panos teipa: ITlanauatijkayo Dios kichiuas nochi tlen onka ipan Tlaltipaktli kuali ma elto. Dios kiijtok: “Xikita, na nijchijchiuas yankuik nochi tlen onka” (Apocalipsis 21:5). Onkas miak atl ipan uaktok tlali uan hasta kampa amo timoiljuijtoya, uelis itstosej (Isaías 41:17-20). Jesús katli tlanauatia ipan iTlanauatijkayo Dios kikualtlalis Tlaltipaktli.
Kema Jesús itstoya ipan Tlaltipaktli kitlakaualtik ajakatl. Nopa kinextik sanse kentsi tlen nopa chikaualistli tlen Dios kimakak (Marcos 4:39, 41). Kema Jesús tekichiuas ipan Tlaltipaktli, maseualmej itstosej ika tlaseuilistli uan amo majmauisej, pampa ayokmo tleno kintlasojsoljuilis.
Tlen pano: Miak fábricas uan maseualmej kisokiuijtokej ueyatl, akomoli, kampa meya atl uan nopa kichiua amo ma tijpiakaj kuali atl.
Tlen panos teipa: Dios kichiuas kuali ma elto ueyatl, akomoli uan mar. Kiixpolos nochi tlen kisojsoloua Tlaltipaktli uan kichiuas ma eli se xochimili. Biblia kiijtoua: “Ipan nopa tonali elis keja pakis nopa uaktok tlali uan kampa tlatsitsika pampa xochiouasej keja se yejyektsi xochitl” (Isaías 35:1).
¿Tlake kinpanos katli kisojsolouaj Tlaltipaktli uan amo kintekipachoua tlen kinpano maseualmej? Dios kiijtojtok kintsontlamiltis “katli tlaxoleuayayaj ipan Tlaltipaktli” (Apocalipsis 11:18; Proverbios 2:21, 22).
Tlen pano: Miakej maseualmej amo kimaljuia uan kitekiuiaj miak atl uan tlaltipaktli amo kiaxilia techmakas miak atl.
Tlen panos teipa: Ipan Tlaltipaktli mochiuas iTlanauatijkayo Dios uan amo tlen kinekisej maseualmej katli moueyimatij (Mateo 6:9, 10). ITlanauatijkayo Dios kinmachtis nochi maseualmej. Isaías 11:9 kiijtoua: “Nopa tlali temitos ika tlakamej tlen kiixmatij [Jehová]”. a Nopa kuali tlamachtili kinpaleuis maseualmej kuali ma kimokuitlauikaj nopa yejyektsi xochimili, pampa kiiknelisej Jehová uan nochi tlen kichijchijtok ipan Tlaltipaktli.
Tlaj nojua tijneki tijmatis tlen kichiuas iTlanauatijkayo Dios xijpoua ni tlamachtili “¿Tlake kichiuas toTeotsij iTlanauatijkayo?”
¿Tijneki tijmatis kenijkatsa mochiuas se xochimili ipan Tlaltipaktli? Xijpoua ipan Biblia Isaías capítulo, 35.
Tlaj tijneki tijmatis kenijkatsa Dios kichiuas tlen mosentlalijtok ipan Tlaltipaktli, xikita nopa video ¿Kenke toTeotsij kichijchijki Tlaltipaktli?
a Dios itoka Jehová (Salmo 83:18, TNM). Xikita nopa tlamachtili “¿Ajkia eli Jehová?”
Tlen nojkia mitspaktis tikitas
¡KUALI XITLACHIXTOKAJ!
Kampa ueli tlauel tlauaki | ¿Tlake kiijtoua Biblia?
¿Uelis se tonali ayokmo tlauakis? ¿Uelis timotemachisej teipa kuali tiitstosej?
TLEN BIBLIA KINANKILIA
¿Tlake kiijtoua Biblia kema tetlasojsoljuilia se tlenijki?
¿Techtlatsakuiltia Dios? ¿Kinpaleuia Dios katli kintlasojsoljuilia se tlenijki?
TLAMACHTILI TLEN TLAUEL IPATI
¿Tlake nopa toTeotsij iTlanauatijkayo?
Kema Jesús itstoya ipan Tlaltipaktli, nelia tlauel tlamachtik tlen ToTeotsij iTlanauatijkayo. Uejkajtok miak xiuitl maseualmej momaijtojtokej pampa kinekij ma asi nopa Tlanauatijkayotl.
TLEN TIJCHIUAJ
Xitlajtlani ma mitspaxalokaj
Xijyeko tlake tlamachtia Biblia o kuali xikinixmati Jehová itlajtoltemakauaj.
