Ipan mayo 24, 2022 panok se tlamantli tlen tlauel amo kuali ipan Uvalde (Texas, Estados Unidos). Nopa periódico The New York Times kiijtok: “Se tlakatl kintotopotski uan kinmiktik 19 konemej uan omej maestras [...] ipan escuela primaria Robb”.

 Nochipa pano tlen tlauel amo kuali kampa ueli. Nopa periódico USA Today kiijtok: “Ipan xiuitl 1970 pejkej tlatotopotsaj ipan escuelas tlen Estados Unidos. Maske ipa kiampa kichiuayayaj, ipan xiuitl 2021 tlatotopotskej 249 imiakpa. Amo kema kiampa panotoya”.

 ¿Kenke pano ni tlamantli? ¿Tlake techpaleuis amo tlauel ma timokuesokaj kema pano tlen amo kuali? ¿Onka se tlamantli tlen techpaleuis ma timotemachikaj se tonali tlamis tlen amo kuali? Biblia kinankilia ni tlajtlanili.

•    Biblia kiijtoua tiitstokej ipan “itlamia tonali”, yeka maseualmej amo teikneliaj, tetlaijiyouiltiaj, tlauel mosisiniaj uan kichiuaj tlen amo kuali. Uan nojkia kiijtoua teipa nojua tlauel kiampa kichiuasej (2 Timoteo 3:1-5, 13). Tlaj tijneki tijmatis sekinok tlamantli, xikita tlamachtili “¿Kiijtok Biblia kenijkatsa eliskiaj maseualmej ipan ni tonali?”.

 Miakej maseualmej motlatsintokiaj kenke toTeotsij kikaua ma pano tlen amo kuali, kej kema tlatotopotsaj ipan escuelas. Tlaj tijneki tijmatis tlen kiijtoua Biblia, xijpoua tlamachtili “¿Por qué le pasan cosas malas a la gente buena?”.

•    “Nochi tlen kiijkuilojkej uejkajkia, kiijkuilojkej para techmachtis para uelis tikijiyouisej tlen techpanotiuala. [...] Para ma tijchiakaj nochi tlen techiljuia para tijselisej teipa” (Romanos 15:4).

 Tlen Biblia kiijtoua techpaleuis amo tlauel ma timokuesokaj kema pano tlen amo kuali. Tlaj tijneki tijmatis sekinok tlamantli xijpoua tlamachtili tlen itoka “¿Acabará algún día la violencia?” ipan pilamochtsi ¡Despertad!

 Kemantika ipan televisión o ipan radio konemej kikakij tlen kinmajmatia. Tlaj tikinpia mokoneuaj uan tijneki tikinpaleuis, xikita tlamachtili “El efecto de las noticias en los niños”.

•    “Kinmanauis para axkintlaijiyouiltisej uan para axkinteuisej” (Salmo 72:14).

•    “Tlakamej kitejtejtsonasej inintepos tlen ika tlateuiyayaj para ika kichiuasej azadones. Uan ininkuatlaminuaj kitejtejtsonasej para kichiuasej huingaros. Niyon se tlali ayok motlalanas para kiteuis seyok tlali, niyon ayok aka momachtis kejatsa tlateuis” (Miqueas 4:3).

 ToTeotsij kichiuas tlen maseualmej amo uelij kichiuaj. Uan ika iTlanauatijkayo tlen eltok iluikak, kitsontlamiltis nochi tlen ika tlateuiaj uan kichiuas kuali ma tiitstokaj. Tlaj tijneki tijmatis tlake kichiuas toTeotsij iTlanauatijkayo, xikita nopa tlamachtili “ToTeotsij iTlanauatijkayo kichiuas ma onka tlaseuilistli”.