Ipan miak altepemej maseualmej moxelojtokej pampa amo sanse políticos kipaleuiaj. Nopa Pew Research Center kintlajtlanik se keskij maseualmej ipan 2022, uan “65% tlen nopa maseualmej kiijtojkej ipan 19 altepemej miakej maseualmej moxelouaj uan mokualaniaj pampa amo sanse políticos kipaleuiaj”.

 Kampa ta tiitstok, ¿maseualmej mokualaniaj pampa amo sanse políticos kipaleuiaj? ¿Kenke kiampa pano? ¿Uelis mosenkauas ni kuesoli? Xikita tlen Biblia kiijtoua.

 Biblia kiijtok ika tlen kichiuaskiaj maseualmej amo ueliskia itstosej sansejko, pampa ipan ni tonali tiitstokej ipan “itlamia tonali”.

•   “Kema ualas itlamia tonali elis nelia fiero. Tlakamej san moiknelisej ininseltitsitsij [...] uan yeka kichiuasej san tlen kinekisej” (2 Timoteo 3:1-3).

 Maske miakej maseualmej kichiuaj kampeka kinpaleuisej tekichiuanij kuali ma tekitikaj, inijuantij ouij kimatij kuali tlayakanasej. Miakej amo moiljuiaj sanse. Yeka, amo uelij mopaleuiaj ininuaya sekinok kema moneki kisenkauasej se kuesoli. Nopa kinextia moaxitijtok tlen Biblia kiijtok uejkajkia.

•   “Tlakamej tlauel kipiaj chikaualistli para mochiuilisej tlen axkuali se ika seyok” (Eclesiastés 8:9).

 Biblia kiijtoua ni tlamantli kisenkauas se tlanauatijkayotl tlen kiyakanas se akajya katli ueli kitlamiltis nochi tlen kintlaijiyouiltia maseualmej.

 Biblia kiijtoua onka se tlanauatijketl tlen uelis kisenkauas tlen nama panotok. Ya eli Jesús. Ya kipia chikaualistli, tlanauatili uan kineki maseualmej ma itstokaj ika tlaseuilistli.

•   “Uan nochi tlakamej tlen itstokej xitlauakej uan kuajkualmej, ma itstokaj ika yejyektsi kema yajaya tlanauatis.[...] Onkas miak tlaseuilistli” (Salmo 72:7).

•   “Nochi [...] moixtlapachosej iixpa uan kitekipanosej” (Salmo 72:11).

 Jesús tlauel kuali tlanauatis, pampa ya kitekipachoua tlen kinpano maseualmej uan kineki kinpaleuis, uan nojua tlauel katli kinchiuilijtokej tlen amo xitlauak.

•   “Yajaya kinmanauis nopa teikneltsitsij uan tlen axtleno kipiaj kema kitlajtlanisej tlapaleuili. Pampa inijuantij axkipiaj ajkeya kinpaleuis. Yajaya kintlasojtlas tlen axkipiaj chikaualistli uan tlen teikneltsitsij, uan kinmanauis. Kinmanauis para axkintlaijiyouiltisej uan para axkinteuisej” (Salmo 72:12-14).

 Xikita tlen kichiuas nopa tlanauatijkayotl tlen Jesús kiyakana, toTeotsij iTlanauatijkayo, uan xikita kenijkatsa uelis mitspaleuis uan tijpaleuis.

•   Xikita nopa video ¿Tlake nopa toTeotsij iTlanauatijkayo?

•   Xijpoua nopa tlamachtili “ToTeotsij iTlanauatijkayo: Kichiuas tlen xitlauak”.