Nopa Catholic News Service kiijtok ipan marzo 25, 2022 monechikojkej ipan Basílica de San Pedro. Nopaya nopa papa Francisco moketski iixmelak se teteyotl tlen María, moixuijtsonki uan momaijtok, kiiljuik María ma techpaleui ma onka tlaseuilistli ipan Tlaltipaktli. Ipan internet, nopa Vatican News kiijtok nopa papa momaijtok “ininpampa nochi maseualmej, uan kiiljuik María nojua ma kinpaleui katli itstokej Rusia uan Ucrania”.

 ¿Timoiljuia kinamiki tikiljuisej se teteyotl ma techpaleui o tijtekiuisej tlaixkopinkayomej kema titlaueyichiuaj? Ximoiljui ipan tlen kiijtoua ni textos:

•   “Amo xijchiuakaj itlachialis niyon se tlamantli para inkitlepanitasej. Amo xikixkopinakaj tlen eltok ipan iluikak, niyon tlen eltok ipan ni Tlaltipaktli, niyon tlen onka ipan atemitl para inkiueyichiuasej. Amo ximotlankuaketsakaj ininixpa tlaixkopinkayomej tlen tlamachijchiuali, niyon amo xikinueyichiuakaj, pampa na niDios, niinmoTeko [Jehová], uan niinmechtlasomati uan nijneki san na xinechueyimatikaj” (Éxodo 20:4, 5). a

•   “Tlakamej kinitaj keja inintekouaj nopa teteyomej tlen kinchijchijtokej ika oro uan plata. Kipiaj ininkamak, pero axkamatij. Kipiaj ininixtiyoljuaj, pero axtlachiaj. Kipiaj ininnakas, pero axtlakakij. Kipiaj ininyakatsol, pero axtlaijiyotilanaj. Kipiaj ininma, pero axueli kiitskiaj niyon se tlamantli. Kipiaj ininmets, pero axnejnemij. Axuelij kamatij. Uan nochi tlakamej tlen kinchijchijtokej nopa teotsitsij nelia uiuitikej keja nopa teteyomej, uan nojkia san se uiuitikej tlen kinueyichiuaj” (Salmo 115:4-8).

•   “Na niDios, niinmoTeko. Ya nopa notoka uan axaka seyok nijkauilis ma kipia noueyitilis. Niyon axniinmechkauilis intechueyimatisej na ininuaya teteyomej tlen kinmachijchijtokej tlakamej” (Isaías 42:8).

•   “Xijtlalkauikaj kampa tlakamej kinueyimatij toteotsitsij uan tlaixkopinkayomej” (1 Corintios 10:14).

•   “Ximotlachilikaj para amo xikintlepanitakaj tlaixkopinkayomej o tlamantli tlen tlakamej kinchijtokej ika ininma uan kinitaj keja eliskia Dios” (1 Juan 5:21).

 Tlaj nojua tijneki tijmatis tlaj Biblia kiijtoua kinamiki tikintekiuisej tlaixkopinkayomej kema tijueyichiuasej toTeotsij, xijpoua nopa tlamachtili “El punto de vista bíblico: Las imágenes” o nopa video ¿Kineki toTeotsij ma tijueyichiuakaj ika tlaixkopinkayomej?

 Uelis nojkia tijneki tijmatis tlen Biblia kiijtoua tlen ni tlamantli:

•   “¿Qué dice la Biblia sobre la virgen María?”.

•   “¿Debería usted rezarle a la virgen María?”.

•   “¿Son señales de Dios los milagros y apariciones?”.

•   “¿Cómo llegará a haber paz en la tierra?”.

Photo credit: Vincenzo Pinto/AFP via Getty Images