Ipan julio 2022, ipan miak altepemej tlauel tlatotopotskej:

•    “Kimiktijkej se político tlen tlauel kiixmatij ipan Japón [katli elki primer ministro Shinzo Abe]. Nopa kichijki maseualmej tlen toaltepe uan sekinok altepemej tlauel ma mosentlachilikaj, pampa ipan Japón amo tlauel pano ni tlamantli. Nojkia pampa kitlalijtokej miak tlanauatili tlen kichiua maseualmej amo ma kipiakaj pistolas” (julio 10, 2022, The Japan Times).

•    “Ipan Dinamarca, se tlakatl tlauel tlatemajmatik kema kinmiktik eyij maseualmej ipan se centro comercial tlen altepetl Copenhague” (julio 4, 2022, Reuters).

•    “Sudáfrica: ipan altepetl Soweto, se keskij tlakamej pejkej tlatotopotsaj ipan se cantina uan kinmiktijkej 15 maseualmej” (julio 10, 2022, The Guardian).

•    “Kipano 220 maseualmej mijkej pampa tlatotopotskej ipan Estados Unidos kema kichijkej nopa iljuitl tlen julio 4, ni panok ome tonali achtoui” (julio 5, 2022, CBS News).

 ¿Asis se tonali kema tlamis nochi ni tlamantli? ¿Tlake kiijtoua Biblia?

 Biblia kiijtoua tiitstokej ipan “itlamia tonali”, yeka nama miakej maseualmej tlauel mosisiniaj uan kichiuaj miak tlamantli tlen nelia tlauel amo kuali (2 Timoteo 3:1, 3). Kema kichiuaj ni, miakej maseualmej tlauel momajmatiaj (Lucas 21:11). Biblia kiijtoua asis tonali kema ayokmo itstosej katli mosisiniaj, uan yeka maseualmej “itstosej ika kuali uan itstosej kampa onka tlaseuilistli. Nochi itstosej temachmej uan kampa ueli mosiajkauasej” (Isaías 32:18). Uan, ¿kenijkatsa tlamis tlasisinijkayotl?

 ToTeotsij kintsontlamiltis katli kichiuaj tlen amo kuali uan nochi tlen ika tlateuiaj.

•    “ToTeko kinkixtis [o kintsontlamiltis] tlakamej tlen axkitlepanitaj” (Proverbios 2:22).

•    “[ToTeotsij] kiketsas nochi tlateuijkayotl hasta kampa ontlantok nochi tlaltipaktli. Kipostektok nochi kuauitoli uan kixolejtok nochi tlamantli para ika tlateuisej tlakamej. Uan kintlatijtok nochi tlateuijka carrojmej” (Salmo 46:9).

 Toteotsij techmachtis ma tiitstokaj ika tlaseuilistli uan kitsontlamiltis tlasisinijkayotl.

•    “Axonkas niyon se tlamantli tlen mauilili o tlen tetlanauia ipan notlanauatijkayo tlen tlatsejtseloltik, pampa keja atl kitemitia nopa ueyi atl, nopa tlali temitos ika tlakamej tlen kiixmatij [Jehová]” (Isaías 11:9).

•    Ipan ni tonali toTeotsij kinmachtia maseualmej tlen nochi Tlaltipaktli amo ma mosisinikaj yon ma kitekiuikaj pistolas o sekinok tlamantli. Kinpaleuia ma kikauakaj “inintepos tlen ika tlateuiyayaj” (Miqueas 4:3).

 Tlaj tijneki tijmatis sekinok tlamantli kampa Biblia kiixtoma kenijkatsa teipa ayokmo aka momajmatis, xijpoua nopa tlamachtili “¿Es posible librarse del miedo?”.

 Tlaj tijneki tijmatis kenijkatsa toTeotsij kitsontlamiltis tlasisinijkayotl, xijpoua nopa tlamachtili “¡Por fin paz en la Tierra!”.