Ipan domingo noviembre 20, 2022 tlanki nopa Conferencia de las Naciones Unidas sobre el Cambio Climático (COP27). Tekichiuanij kiijtojkej temakasej tomij uan kiampa kinpaleuisej sekinok altepemej kema kintlasojsoljuilia se tlenijki. Maske ni tlamantli tlauel pankiski, miakej moiljuiaj ni amo tlauel tlapaleuis.

•   “Kuali nikita tlen kitlapejpenijtokej uan kiampa tikinpaleuisej katli kintlasojsoljuilia se tlenijki [...]. Nojua moneki ma tijchiuakaj sekinok tlamantli [...]. Pampa Tlaltipaktli nojua tlauel kisojsolouaj” (António Guterres, secretario general de las Naciones Unidas; noviembre 19, 2022).

•   “Nojua tlauel kisojsolosej Tlaltipaktli” (Mary Robinson, ex presidenta de Irlanda y ex alta comisionada de la ONU para los Derechos Humanos; noviembre 20, 2022).

 Telpokamej kintekipachoua tlen kipanos Tlaltipaktli. ¿Uelis tekichiuanij tekitisej sansejko uan kichiuasej ayokmo tlauel ma tlatotonia yon tlauel ma tlaseseya? ¿Tlake kiijtoua Biblia?

 Maske miakej maseualmej kichiuaj kampeka uan kinekij kichiuasej ayokmo ma techtlasojsoljuili se tlenijki, Biblia kiijtoua maske kiampa kichiuaj amo uelis kisenkauasej. Ma tikitakaj kenke kiampa tikijtouaj:

•    “Se tlamantli tlen uijkoltik axueli tijchiuas xitlauak” (Eclesiastés 1:15).

   Tlen kiijtosneki: Tekichiuanij amo uelis kisenkauasej pampa maseualmej amo uelij moyakanaj ininselti (Jeremías 10:23). Maske tekichiuanij kichiuasej kampeka sansejko tekitisej, amo uelis kisenkauasej tlen pano ipan Tlaltipaktli.

•   “Tlakamej san moiknelisej ininseltitsitsij uan tlauel kinekisej miak tomij [...]. Ayok uelis monauatisej uan yeka kichiuasej san tlen kinekisej” (2 Timoteo 3:2, 3).

   Tlen kiijtosneki: Biblia kiijtoua maseualmej mosentlalisej san ipan tlen inijuantij kinekij uan amo kinekisej tekitisej sansejko yon kinpaleuisej sekinok. ¡Uan nelia kiampa pano!

 Tekichiuanij amo uelis kipatlasej Tlaltipaktli. Yeka, toTeotsij kitekimakatok se tlanauatijketl katli tlanauatis ipan Tlaltipaktli: Jesucristo. Biblia kiijtoua tlen ni Tlanauatijketl:

•   “Yajaya kipias nochi tekiuejkayotl para tlanauatis. Uan kitokaxtisej: Tlasentlachiyaltijketl, Tetlalnamiktijketl, TOTEKO Tlen más kipia Chikaualistli, Totata tlen itstok para Nochipa, Tlanauatijketl tlen temaka Tlaseuilistli” (Isaías 9:6).

 Jesús tlanauatis ipan toTeotsij iTlanauatijkayo tlen eltok iluikak (Mateo 6:10). Ya kipia chikaualistli, tlalnamikilistli uan kineki kimokuitlauis Tlaltipaktli uan katli nopaya itstosej (Salmo 72:12, 16). Kema tlanauatis ipan nopa Tlanauatijkayotl, ya kintsontlamiltis katli tlanempolouaj uan kikualchijchiuas Tlaltipaktli (Apocalipsis 11:18; Isaías 35:1, 7).

 Tlaj tijneki tijmatis kenijkatsa teipa kuali tiitstosej kema ayokmo tlauel tlatotonias yon tlauel tlaseseyas, xijpoua nopa tlamachtili “¿Qué dice la Biblia sobre el cambio climático y nuestro futuro?”.