Ipan febrero 24, 2022, Rusia pejki kiteuia Ucrania, uan nopa kichijtok miakej maseualmej tlauel ma tlaijiyouikaj pampa monejki cholosej tlen nopa altepetl. a

 “Kitoponiyayaj miak bombas. Tlauel temajmatik tlen panok. Kema tijmatkej onkayaya se keski trenes tlen kinuikayaya maseualmej ipan sekinok altepemej, nojkia tiajkej. Monekiyaya nima tikisteuasej uan san tijuikakej se keski tlamantli ipan se mochila. San uelki tijuikaj amatl tlen tlauel ipati, pajtli, atl uan san se keski tlamantli tlen tijkuaskiaj. Tijkajtejkej nochi tlen tijpixtoyaj uan tiajkej kampa kisaskia tren pampa tlauel tlatotopotsayayaj” (Natalia, katli eua Járkov, Ucrania).

 “Timoiljuijkej amo mochiuaskia tlauilankayotl. Nijkajki sejkanok kenijkatsa toponiyaya bombas uan kioliniyaya ventanas. Yeka nima nikiski uan nijuikak san tlen tlauel moneki. Nikistej nochaj a las ocho ika ijnalok, nitlejkok ipan se tren tlen yaui ipan altepetl Lviv uan teipa niajki ipan se autobús tlen yaui Polonia” (Nadia, katli eua Járkov, Ucrania).

Ipan ni tlamachtili tikitasej ni tlamantli:

•  ¿Tlake tlamantli kichijtok maseualmej ma momanauitij ipan sekinok altepemej?

•  ¿Ipan tlake uelis motemachisej katli monejki momanauitij sejkanok?

•  ¿Uelis kinpaleuis Biblia katli momanauiaj sejkanok?

 ¿Tlake tlamantli kichijtok maseualmej ma momanauitij ipan sekinok altepemej?

 Maseualmej pejkej cholouaj tlen Ucrania pampa tlateuianij tlen Rusia kalajkej tlateuitoj ipan nopa altepetl. Biblia kiijtoua kenke nelia mochijtok ni kualantli:

•   Tekichiuanij amo kinpaleuijtokej maseualmej kej kinamiki. Amo kuali kitekiuijtokej nopa tlanauatili tlen kipiaj uan san kintlaijiyouiltijtokej sekinok (Eclesiastés 4:1; 8:9).

•   Satanás, katli kinauatia Tlaltipaktli, kichiua maseualmej ma kichiuakaj tlen tlauel amo kuali, yeka Biblia kiijtoua “mokauaj ipan ichikaualis Axkualtlakatl” (Juan 14:30; 1 Juan 5:19).

•   Maseualmej amo san kiixnamiktokej tlauel miak kuesoli, Biblia nojkia kiijtoua “kema ualas itlamia tonali elis nelia fiero” (2 Timoteo 3:1). Ipan ni tonali onka tlauilankayotl, tetlasosoljuilia miak tlamantli uan uejueyi kokolistli. Nochi ni kichiua maseualmej ma momanauitij sejkanok (Lucas 21:10, 11).

 ¿Ipan tlake uelis motemachisej katli monejki momanauitij sejkanok?

 Biblia kiijtoua Jehová, b katli techchijchijki, tlauel kiniknelia uan kintlasojtla maseualmej katli yauij momanauiaj ipan sekinok altepemej uan katli moneki kikajteuasej ininchaj pampa mochiua se tlauilankayotl (Deuteronomio 10:18). Ya kitenkajtok ika iTlanauatijkayo kitlamiltis nochi kuesoli tlen kiixnamikij maseualmej uan iTlanauatijkayo kintekipatlas nochi sekinok tlanauatianij (Daniel 2:44; Mateo 6:10). Nojkia, ika iTlanauatijkayo kitsontlamiltis Satanás uan nochi tlen kichijtok (Romanos 16:20). Ni Tlanauatijkayotl tlanauatis ipan nochi Tlaltipaktli uan kichiuas maseualmej ayokmo ma mochikoitakaj. Nochi maseualmej moiknelisej uan kuali mouikasej. Ayokmo aka monekis yas sejkanok momanauiti pampa Biblia kiijtoua: “Sejse tlakatl mosiyajkauas ika pakili itsala se ikuatlatok uan sejse ixokomekamil temakas hasta mokauas. Ayok aka kintemajmatis pampa toTeko Tlen Kinyakana Iiluikaejkauaj Ma Tlatlanitij keja nopa kiijtojtok” (Miqueas 4:4).

 San toTeotsij iTlanauatijkayo kitlamiltis tlen nama pano, kiampa maseualmej ayokmo monekis yasej sejkanok momanauitij. Jehová kitekiuis iTlanauatijkayo, kiampa kitlamiltis tlen kichiua maseualmej ma kikauakaj ininchaj. Ma tikitakaj se keski neskayotl:

•   Tlauilankayotl. “[Jehová] kiketsa nochi tlateuijkayotl hasta kampa ontlantok nochi Tlaltipaktli” (Salmo 46:9). Tlaj tijneki tijmatis kenijkatsa Jehová kitlamiltis tlauilankayotl, xijpoua tlamachtili “¿Cómo llegará a haber paz en la Tierra?”.

•   Tlaijiyouilistli uan tlasisinijkayotl. “[Jehová] kinmanauis para axkintlaijiyouiltisej uan para axkinteuisej. Pampa kiitas para ininyolis tlauel miak ipati iixpa” (Salmo 72:14). Tlaj tijneki tijmatis tlake kinpaleuis maseualmej ayokmo ma tekualankaitakaj, xijpoua tlamachtili “¿Tlake techpaleuis ayokmo titekualankaitasej?”.

•   Kema amo kipiaj tlen ika mopanoltisej. “[Jehová] kinmanauis nopa teikneltsitsij uan tlen axtleno kipiaj kema kitlajtlanisej tlapaleuili. Pampa inijuantij axkipiaj ajkeya kinpaleuis” (Salmo 72:12). Tlaj tijneki tijmatis kenijkatsa toTeotsij kinpaleuis katli amo kipiaj tlen ika mopanoltisej, xijpoua tlamachtili “¿Es realista esperar un sistema económico justo?”.

•   Kema amo onka tlakualistli. “Onkas miak trigo ipan nochi nopa tlali” (Salmo 72:16). Tlaj tijneki tijmatis kenijkatsa toTeotsij kichiuas maseualmej nochipa ma kipixtokaj tlen kikuasej, xikita tlamachtili “¿Un mundo sin hambre?”.

 ¿Uelis kinpaleuis Biblia katli momanauiaj sejkanok?

 Kena. Biblia kinpaleuia ma motemachikaj teipa kuali itstosej uan nojkia ma kiixnamikikaj tlaouijkayotl tlen kipiaj ipan ni tonali.

 Tlen Biblia tetlajtolmaka: “Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj para nochi tlen inmechchiuilijtok. Intla keja nopa inkichiuaj, toTeko inmechmakas tlaseuilistli ipan inmoyolo tlen tlakamej axuelis kimachilisej. Uan nopa tlaseuilistli kiyaualtsakuas inmoyolo uan inmotlalnamikilis toTeko pampa inmechtlatskiltijtok ipan Cristo” (Filipenses 4:6, 7).

 ¿Tlake kiijtosneki? Nochipa xikiljui toTeotsij ma mitspaleui tijpias tlaseuilistli ipan tlen ueli tlamantli tlen tikixnamiki. Xijpoua tlamachtili “Filipenses 4:6, 7 | ‘No se inquieten por nadaʼ ”.