•  Tlen ika peuas tlanechikoli 2

•  Tlen tlauel ipati katli Biblia tlamachtia 3-5

  •  Tlamachtili 3

  •  Xijpanti tlamachtili tlen tlauel ipati 4

  •  Tlen mopouas ipan Biblia 5

•  Kuali ma titlamachtikaj 6-14

  •  Kema tijpeualtis tijnojnotsas 7

  •  Sampa xikinpaxalo 8

  •  Xikinmachti 9

  •  Xikixtoma tlen tijneltoka 10

  •  Tlamachtili 11

  •  Tlen moneki tijchiuas 12

  •  Kampa uelis titenojnotsas 13

  •  Videos uan amatlajkuiloli 14

•  Kej timonejnemiltiaj 15, 16

  •  Kampa techmachtiaj ika Biblia 16

•  Tlen ika tlamis tlanechikoli 17

•  Teyolchikauasej uan tetlajtolmakasej 18

•  Keski uejkauas 19

•  Kema techpaxalos toikni katli tepaxaloua chijchikuasej metstli 20

•  Kema onkas ueyi tlanechikolistli 21

•  Kema moilnamikis Cristo imikilis 22

•  Katli kiita kenijkatsa mochiua tlanechikoli Kej Timonejnemiltiaj uan Titlajtolmoyauaj  23

•  Katli kiyakanas tlanechikoli 24

•  Seyok tetlajtolmakaketl 25

•  Kampa nojkia uelis mosentilisej 26

•  Videos 27

1. Ni amatlajkuiloli kiijtoua tlake moneki kichiuasej nochi katli panosej ipan tlanechikoli. Kema inkinekisej inkikualchijchiuasej se tlamachtili, achtoui moneki inkipouasej tlen kiijtoua ni amatlajkuiloli uan nojkia tlen kiijtoua nopa pilamatsi Tlen tijchiuasej ipan tlanechikoli Kej Timonejnemiltiaj uan Titlajtolmoyauaj. Nochi tlajtolmoyauanij moneki kinmakasej se tlamachtili ipan tlaxeloli “Kuali ma titlamachtikaj”. Maseualmej katli nochipa mosentiliaj touaya uan monejnemiltiaj kej Biblia kiijtoua, nojkia uelis kinmakasej se tlamachtili. Tlaj se akajya katli ayamo mochiua tlajtolmoyajketl kineki panos tlaixpa, toikni katli kiita kenijkatsa mochiua tlanechikoli Kej Timonejnemiltiaj uan Titlajtolmoyauaj moneki kamanaltis iuaya uan kiitas tlaj kena uelis panos, uan teipa kiiljuis tlaj kena uelis o amo. Kema kamanaltis iuaya, nojkia moneki itstos katli kimachtia ika Biblia (o se tlen itatauaj katli eli toikni). Katli kineki panos tlaixpa, kitlajtlaniaj sanse tlamantli kej se akajya katli kineki tlajtolmoyauas maske amo moatsonpoliuiltijtok (od-S tlamachtili 8 párr. 8).

2. Se minuto. Kema tlamis uikasej uan ya mochijki tlamaijtoli, katli kiyakanas tlanechikoli moneki kinyololinis katli monechikojtokej ma kinekikaj kitlakakilisej nochi tlen moixtomas. Uelis kiijtos san se keski tlamantli tlen tlauel ipati.

 3. Tlamachtili (10 minutos). Ipan pilamatsi Tlen tijchiuasej ipan tlanechikoli nesi itoka nopa tlamachtili uan kipia ome o eyi tlamantli tlen tlauel ipati. Ni tlamachtili kiixtomas se ueuejtlakatl o se tlapaleuijketl katli kuali tlamachtia. Kema peuas mopouas se yankuik pilamochtsi tlen Biblia, kitlalisej se video kampa moixtoma nopa pilamochtsi. Maske katli kiixtomas nopa tlamachtili uelis kiijtos se keski tlamantli tlen nopa video, moneki kiixtomas nochi tlen uala ipan pilamatsi Tlen tijchiuasej ipan tlanechikoli. Nopa tlaixkopinkayomej tlen nopaya uala kipaleuia nopa tlamachtili, yeka tlaj nojua kiaxilis, moneki kuali kitekiuisej. Nojkia uelis kitekiuis sekinok tlamantli tlaj nelia kipaleuia nopa tlamachtili tlen kiixtomas.

 4. Xijpanti tlamachtili tlen tlauel ipati (10 minutos). Katli kipanoltis san moneki kipouas nopa tlajtlanili uan toikniuaj tlanankilisej. Amo kinamiki kipeualtis yon kitlamiltis ika sekinok tlajtoli. Kiyakanas se ueuejtlakatl o se tlapaleuijketl katli kuali tlamachtia. Nopa toikni moneki kipouas nopa ome tlajtlanili. Ya kimati tlaj kena mopouas nopa textos o amo. Nochi moneki tlanankilisej san ipan 30 segundos.

 5. Tlen mopouas ipan Biblia (4 minutos). Moneki tlapouas se tlakatl. Amo kinamiki kipeualtis o kitlamiltis ika sekinok tlajtoli. Katli kiyakanas tlanechikoli moneki kipaleuis toikni ma kikuamachili tlen kipoua, ma tlapoua kej ijkuilijtok, kuali ma tlatenkixti uan ma kakisti kej kema kamanalti, yolik uan chikauak ma tlapoua, ma mokejketsti kampa kinamiki uan ma kipankixti kampa tlauel ipati. Kemantika se keski tlapoualistli tlauel uejueueyak, yeka katli kiita kenijkatsa mochiua tlanechikoli Kej Timonejnemiltiaj uan Titlajtolmoyauaj moneki kuali kiitas ajkia kiiljuis ma tlapoua.

6. Quince minutos. Ni tlaxeloli techpaleuis ma tijyekokaj kenijkatsa uelis nojua kuali tijchiuasej toteki kema titenojnotsasej, kema titlajtolmoyauasej uan kuali ma titlamachtikaj. Tlaj monekis, ueuejtlakamej nojkia uelis panosej ipan ni tlaxeloli. Katli panosej moneki momachtisej nopa tlamachtili tlen uala ipan pilamochtsi Kuali titlamachtis o ipan pilamochtsi Xikinikneli maseualmej, tlen nesi ika paréntesis ipan pilamatsi Tlen tijchiuasej ipan tlanechikoli. Ipan se keski semanas mopanoltis se tlamachtili tlen sansejko tikixtomasej uan monekis kiyakanas se ueuejtlakatl o se tlapaleuijketl katli kuali tlamachtia (xikita  párrafo 15, nopaya tikitas kenijkatsa moneki moyakanas se tlamachtili tlen kiijtoua “Tlen sansejko tikixtomasej”).

 7. Kema tijpeualtis tijnojnotsas. Kipanoltis se toikni o se tosiuaikni. Se tlakatl amo kinamiki panos iuaya se siuatl tlaj amo eli se tlen ichampoyouaj. Uelis moseuijtosej o ijkatosej. (Tlaj tijneki tijmatis tlen moneki mochiuas ipan ni tlaxeloli, xikita  párrafos 12 uan  13).

 8. Sampa xikinpaxalo. Kipanoltis se toikni o se tosiuaikni. Se tlakatl amo kinamiki panos iuaya se siuatl (km-S 5/97 iamayo 2). Uelis moseuijtosej o ijkatosej. Katli kipanoltis moneki kinextis tlake kiijtoskia kema sampa kipaxaloti se maseuali katli achtoui kuali tetlakakilik (tlaj tijneki tijmatis tlen moneki mochiuas ipan ni tlaxeloli, xikita  párrafos 12 uan  13).

 9. Xikinmachti. Kipanoltis se toikni o se tosiuaikni. Se tlakatl amo kinamiki panos iuaya se siuatl (km-S 5/97 iamayo 2). Uelis moseuijtosej o ijkatosej. Moneki kinextis kenijkatsa kimachtia se akajya katli ya pejtok momachtia. Tlaj amo kiiljuijtokej kiampa ma kichiua, katli kipanoltis amo moneki kipiuilis se keski tlajtoli kema peuas yon kema tlamis. Uan maske kena uelis kichiuas, amo moneki kipouasej párrafos.

 10. Xikixtoma tlen tijneltoka. Tlaj mopanoltis kej se tlamachtili, uajka kinamiki kiixtomas se tlakatl. Tlaj san kiixnextisej se tlenijki, uajka uelis kipanoltis se toikni o se tosiuaikni. Se tlakatl amo kinamiki panos iuaya se siuatl tlaj amo eli se tlen ichampoyouaj. Katli kipanoltis moneki kuali kinankilis nopa tlajtlanili tlen ualas ipan ni tlamachtili o tlanextilili. Kinamiki kikixtis itlamachtil ipan amatlajkuiloli tlen nopaya kiijtos. Ya kitlapejpenis tlaj kiijtos kanke kikixtik nopa tlamachtili o amo.

 11. Tlamachtili. Moneki kiixtomas se tlakatl. Kema ni tlamachtili mokixtis ipan tlapaleuili 1 tlen pilamochtsi Xikinikneli maseualmej, katli kipanoltis moneki kinextis kenijkatsa uelis motekiuis nopa textos ipan tlajtolmoyaualistli. ¿Kenijkatsa uelis kichiuas? Ueliskia kiixtomas tlake kiijtosneki se texto, kema ueliskia motekiuis o kenijkatsa ika nopa texto tijchiuaskiaj se maseuali ma monejneuili ipan se tlamantli. Uan kema mokixtis ipan se tlamachtili tlen nopa pilamochtsi Xikinikneli maseualmej, katli kipanoltis moneki kinextis kenijkatsa tojuantij uelis kiampa tijchiuasej ipan tlajtolmoyaualistli. Tlaj kineki, ueliskia kiixtomas nopa neskayotl tlen uala ipan punto 1 tlen se tlamachtili o kiixtomas se keski textos tlen nopaya nesi.

   12. Tlen moneki tijchiuas. Tlen kiijtoua ipan ni párrafo uan ipan párrafo 13, mosentlalia ipan nopa tlanextilili “Kema tijpeualtis tijnojnotsas” uan “Sampa xikinpaxalo”. Tlaj amo kiiljuiaj seyok tlamantli, katli panos moneki kiiljuis se maseuali se tlamachtili tlen amo ouij uan kichiuas kampeka nojua ma kikaua kamanaltis iuaya seyok tonali. Katli kipanoltis moneki kitlapejpenis se tlamantli tlen kinpaleuis katli itstokej kampa ya tlajtolmoyaua. Ya uelis kitlapejpenis tlaj temakas se amatlajkuiloli o tlaj kinextis se video tlen tlauel tijtekiuiaj. Amo kinamiki kitsontekontlalis tlen kiijtos, tijnekij ma kiyeko kenijkatsa kuali tenojnotsas, kamanaltis kej ipa kichiua uan kinextis nelia kineki kinpaleuis maseualmej.

   13. Kampa uelis titenojnotsas. Katli panos moneki kinextis kenijkatsa kichiuaskia kampa tlajtolmoyaua kema kipanoltis se tlen ni tlen tlamantli:

1.  (1) Kajkalpa: Kiijtosneki kema titlajtolmoyauaj ininchaj maseualmej (uelis kema tiauij kajkalpa, kema titenojnotsaj ipan teléfono o ika carta). Uan nojkia eli kema sampa tikamanaltij iuaya se maseuali katli tijpantijkej ipan se tlen ni tlamantli tlen ya tikijtojkej.

2.  (2) Xitlajtolmoyaua kampa ueli: Kiijtosneki kema tijchiuaj kampeka tijkamanaljuisej akin ueli maseuali maske amo timoiljuijtoyaj titlajtolmoyauasej nopa tonali. Uan ni uelis tijchiuasej tlen ueli tonali o kema tijchijtokej tlen ueli tlamantli, kej kema tijpouiliaj se texto se akajya ipan toteki, kampa timomachtiaj, ipan autobús, ika tokalnechkauaj o sejkanok.

3.  (3) Xitlajtolmoyaua kampa nemij miakej: Nikaj moneki kinextisej kenijkatsa tlajtolmoyauaj ika carritos, kampa tlanamakaj, ojteno, ipan parques, kampa kiketsaj carros o kanajya kampa maseualmej itstokej.

 14. Videos uan amatlajkuiloli. Katli kipanoltis uelis kitlapejpenis tlaj kinextis se video o se amatlajkuiloli. Tlaj kiiljuiaj ma kinexti se video, o tlaj katli kipanoltis kiijtoua kena kitekiuis se video, amo kinamiki kitlalis o nelia tenextilis, san moneki tlachiuas kejuak kinextia uan kiixtomas.

15. Ni tlaxeloli peua ika se uikatl. Ipan 15 minutos moixtomas se o ome tlamachtili tlen kinpaleuis toikniuaj ma kichiuakaj ipan ininnemilis tlen kiijtoua toTeotsij iTlajtol. Maske ni tlamachtili uelis kipanoltisej ueuejtlakamej o tlapaleuianij katli kuali tlamachtiaj, san ueuejtlakamej kinamiki kiixtomasej nopa tlamachtili kampa techiljuiaj tlen moneki tijchiuasej ipan tlanechikoli. Tlaj ipan se tlamachtili toikniuaj moneki tlanankilisej, nopa toikni katli kiixtomas uelis kichiuas sekinok tlajtlanili ipan nochi itlamachtil uan amo san tlen nopaya uala. Moneki kipeualtis san ika se keski tlajtoli uan amo tlauel kamanaltis, kiampa uelis kipankixtis tlen tlauel ipati ipan nopa minutos tlen kinamiki uan toikniuaj uelis tlanankilisej. Tlaj kitlatsintokisej se toikni tlen kipanotok, uan tlaj ueli, uajka moneki panos tlaixpa uan nopaya tlanankilis uan amo kampa moseuijtok.

  16. Kampa techmachtiaj ika Biblia (30 minutos). Moneki kiyakanas se ueuejtlakatl katli kuali tlamachtia (tlaj amo itstokej miakej ueuejtlakamej, nojkia uelis kiyakanasej tlapaleuianij katli kuali tlamachtiaj). Nochi ueuejtlakamej moneki kintlapejpenisej ajkia inijuantij uelis kipanoltisej ni tlamachtili. Katli kintlapejpenisej moneki yajatisej kitekiuisej san nopa minutos tlen kinamiki, kipankixtisej textos tlen tlauel ipati uan kinpaleuisej nochi ma kikuamachilikaj kenijkatsa kinpaleuia nopa tlamachtili. Uelis kiampa kichiuasej tlaj kuali momachtisej kenijkatsa moyakana se tlamachtili kampa onka tlajtlanili uan kampa toikniuaj tlanankiliaj (w23.04 iamayo 24, recuadro). Tlaj ya moixtonki nochi tlamachtili maske amo uejkajki 30 minutos, amo kinamiki kipiuilis sekinok tlamantli. Kualtiaskia sejse chikueyi ma mopajpatlatiakaj katli kiyakanasej ni tlamachtili uan katli tlapouasej. Tlaj toikni katli kiyakanas nopa tlanechikoli kiiljuis nima ma kitlamilti itlamachtil, uajka katli kiyakanas moneki kiitas tlake ueliskia kichiuas uan kiampa nima kitlamiltis. Kualtiaskia kiijtos amo°ma mopoua se keski párrafos.

17. Eyi minutos. Katli kiyakanas tlanechikoli kiompauis se keski tlamantli tlen tlauel ipati tlen moixtonki. Nojkia kiijtos se keski tlamachtili tlen moixtomas seyok chikueyi. Tlaj kiaxilis, uelis kiijtos ajkia kipouas Biblia se chikueyi uan ajkia inijuantij panosej ipan tlaxeloli “Kuali ma titlamachtikaj”. Nojkia, tlaj monekis kinmatiltis toikniuaj se keski tlamantli o kinpouilis amatlajkuiloli tlen tlauel ipati, kinamiki kichiuas ipan ni tlaxeloli. Amo kinamiki kinmatiltis kanke uan tlake hora tlajtolmoyauasej uan ajkia inijuantij tlachpanasej o sekinok tlamantli. Nochi ni moneki kitlalijtosej ipan tablero. Tlaj kiitas amo kiaxilis kinmatiltis o kinpouilis amatlajkuiloli, uajka kiniljuis katli tlamachtisej ipan tlaxeloli “Kej timonejnemiltiaj” nima ma kitlamiltikaj inintlamachtil (xikita  párrafos 16 uan  19). Tlanechikoli tlamis ika se uikatl uan tlamaijtoli.

18. Kema sejse tlen nopa toikniuaj kitlamiltisej inintlamachtil, san ipan se minuto toikni katli kiyakanas tlanechikoli kinyolchikauas uan kintlajtolmakas ika tlen kiijtoua nopa tlamachtili tlen kinmelajki. Kema kiijtos ajkia panos, amo kinamiki kiijtos tlake tlamachtili kitekiuia. Kema tlamis tlamachtia, katli kiyakana tlanechikoli moneki kiyolchikauas uan teipa kiijtos tlake tlamachtili kitekiuik uan kiiljuis kenke kuali kipanoltik o tlake nojua poliui kichiuas uan kenijkatsa kichiuas. Nojkia uelis kipankixtis sekinok tlamantli tlen tlauel ipati tlaj moiljuia kipaleuis katli tlamachtik o nochi toikniuaj. Kema tlamis tlanechikoli o seyok tonali, uelis nojua kitlajtolmakas toikni. Tlen kiiljuis moneki kikixtis ipan pilamochtsi Xikinikneli maseualmej, Kuali titlamachtis o amochtli Benefíciese. Uelis kiiljuisej tlake kiijtoua nopa tlamachtili tlen kitekiuik o seyok tlen nojkia kipaleuis (ipan  párrafos 19,  24 uan  25, kiijtoua tlake kichiua katli kiyakana tlanechikoli Kej Timonejnemiltiaj uan Titlajtolmoyauaj uan tlake kichiua seyok tetlajtolmakaketl).

19. Nochi tlamachtili moneki mopanoltis san ipan nopa minutos tlen motlalijtok (nojkia tlen kiijtos katli kiyakanas tlanechikoli). Maske nopa pilamatsi Tlen tijchiuasej ipan tlanechikoli kiijtoua keski minutos uejkauas sejse tlamachtili, tlaj ya kuali moixtonki nochi maske amo motekiuik nochi minutos, amo kinamiki kipiuilisej sekinok tlamantli. Tlaj se akajya tlauel uejkaua o kipano nopa minutos tlen kinamiki, uajka katli kiyakana tlanechikoli o nopa seyok tetlajtolmakaketl moneki kitlajtolmakasej nopa toikni kema itstos iselti (xikita  párrafos 24 uan  25). Nochi tlanechikoli, ika uikatl uan tlamaijtoli, moneki uejkauas se hora uan 45 minutos.

20. Maske tlanechikoli mochiuas kej kiijtoua pilamatsi Tlen tijchiuasej ipan tlanechikoli, mopatlas se keski tlamantli. “Kampa techmachtiaj ika Biblia” mopatlas ika seyok tlamachtili tlen kiixtomas toikni katli techpaxaloua uan uejkauas 30 minutos. Kema nechka peuas ni tlamachtili, toikni katli kiyakanas tlanechikoli kiompauis tlen timomachtijkej uan kiijtos se keski tlamantli tlen timomachtisej se chikueyi, tematiltis se keski tlamantli o kipouas amatlajkuiloli tlen nelia moneki, uan teipa kiijtos toikni katli techpaxaloua kiixtomas se tlamachtili. Kema tlamis tlamachtia, toikni katli tepaxaloua kitlamiltis tlanechikoli ika se uikatl tlen ya kitlapejpenik. Ya uelis kiiljuis se toikni ma kitlamilti tlanechikoli ika se tlamaijtoli. Nopa tonali, toikniuaj amo monechikosej ipan sekinok salas. Toikniuaj katli kichiuaj tlanechikoli ipan seyok tlajtoli uelis kipiasej inintlanechikol kej ipa kichiuaj. Teipa moneki moseuitij kampa itstokej nochi toikniuaj, kiampa kitlakakilisej tlamachtili tlen kiixtomas toikni katli techpaxaloua.

21. Kema onkas se ueyi tlanechikolistli amo mochiuas yon se tlanechikoli. Moneki kinilnamikilisej toikniuaj nopa tlamachtili tlen moixtomaskia kinamiki momachtisej ininselti o ika ininchampoyouaj.

22. Tlaj Cristo imikilis moilnamikis ipan semana, amo mochiuas tlanechikoli Kej Timonejnemiltiaj uan Titlajtolmoyauaj ipan nopa semana.

23. Nochi ueuejtlakamej moneki kitlapejpenisej se ueuejtlakatl katli kichiuas ni tekitl. Ni toikni kiitas nopa tlanechikoli ma mochiua kej kinamiki uan kej nikaj ijkuilijtok. Ya uan nopa tetlajtolmakaketl moneki sansejko tekitisej. Kema kisas se yankuik pilamatsi Tlen tijchiuasej ipan tlanechikoli, nima kintlapejpenis katli kipanoltisej sejse tlamachtili tlen nopa ome metstli: tlen kipanoltisej katli momachtiaj kenijkatsa tlajtolmoyauasej, tlen kipanoltiaj ueuejtlakamej uan tlapaleuianij uan katli kiyakanasej tlanechikoli sejse chikueyi. Kema elis se tlamachtili tlen kipanoltiaj ueuejtlakamej uan tlapaleuianij uan katli kiyakanasej tlanechikoli, moneki san kintekiuis toikniuaj katli nochi ueuejtlakamej ipa ya kintlapejpenijtokej (xikita  párrafos 3-16 uan  24). Kema kiitas ajkia inijuantij kipanoltisej tlamachtili, tlaj momachtiaj tlajtolmoyauasej o amo, moneki kiitas keski xiuitl kipia nopa toikni, tlaj kuali tlamachtia uan tlaj amo kenijki kiitasej toikniuaj tlaj kiixtomas se tlamachtili. Sejse toikni moneki kimatiltisej kipanoltis se tlamachtili kema nojua poliui miak semanas, tlaj amo ueli, uajka maske san poliui eyi semanas. Kema kinmatiltisej katli momachtiaj kenijkatsa tlajtolmoyauasej tlake tlamachtili kipanoltisej, moneki kinmakasej nopa pilamatsi Katli tlamachtis ipan tlanechikoli Kej Timonejnemiltiaj uan Titlajtolmoyauaj (S-89). Nojkia moneki kitlalis ipan tablero nopa amatl kampa nesi ajkia inijuantij tlamachtisej sejse chikueyi ipan tlanechikoli. Maske ueuejtlakamej uelis kiiljuisej seyok ueuejtlakatl o tlapaleuijketl ma kipaleui, san ueuejtlakamej moneki kitlapejpenisej ajkia kiixtomas se tlamachtili katli san kinamiki kiixtomasej ueuejtlakamej o tlapaleuianij.

24. Sejse chikueyi, se ueuejtlakatl kiyakanas nopa tlanechikoli Kej Timonejnemiltiaj uan Titlajtolmoyauaj (kampa amo itstokej miakej ueuejtlakamej, uelis kintekiuisej tlapaleuianij katli kuali tlamachtiaj). Katli kiyakanas moneki kuali moiljuis tlake kiijtos kema kipeualtis uan kema kitlamiltis tlanechikoli. Moneki kiijtos ajkia inijuantij tlamachtijtiasej, uan tlaj amo itstokej miakej ueuejtlakamej, uajka ya nojkia uelis kiixtomas se keski tlamachtili. Kema toikniuaj kitlamiltisej inintlamachtil, katli kiyakana tlanechikoli amo kinamiki kiijtos miak tlamantli, moneki nima kiijtos ajkia seyok panos. Nochi ueuejtlakamej moneki kintlapejpenisej ajkia inijuantij uelis kiyakanasej tlanechikoli. Sejse chikueyi mopajpatlatiasej katli tlayakanasej. Uelis toikni katli kiita kenijkatsa mochiuas tlanechikoli Kej Timonejnemiltiaj uan Titlajtolmoyauaj miakpa kiyakanas tlanechikoli uan sekinok ueuejtlakamej amo tlauel. Tlaj se ueuejtlakatl kiyakana nopa tlamachtili “Kampa techmachtiaj ika Biblia”, uajka nojkia uelis kitlapejpenisej ma kiyakana tlanechikoli. Moneki kiilnamikisej katli kitlapejpenisej moneki kinyolchikauas katli panoj tlaixpa, uan kema monekis, kintlajtolmakas ika tlaiknelili. Nojkia, moneki kiitas tlanechikoli ma tlami ipan hora tlen kinamiki uan amo ma kipano se hora uan 45 minutos (xikita  párrafos 17 uan  19). Tlaj tlauexka uan katli kiyakanas tlanechikoli kinekis, uajka uelis kitlalisej seyok micrófono uan ijkatos, kiampa kema kiijtojtias ajkia panosej, katli tlamachtisej uelis panotiasej tlaixpa. Nojkia uelis kitlalisej se mesa uan se silla kampa moseuis kema panos katli kipouas Biblia uan katli panosej ipan tlaxeloli “Kuali ma titlamachtikaj”, kiampa amo tlauel uejkauas.

25. Tlaj uelis, ni tekitl moneki kichiuas se ueuejtlakatl katli nelia tlauel kuali tlamachtia. Kema monekis, ni toikni kintlajtolmakas ueuejtlakamej uan tlapaleuianij katli panosej ipan tlanechikoli Kej Timonejnemiltiaj uan Titlajtolmoyauaj, katli kiixtomaj tlamachtili ika Biblia, katli kiyakanaj Tlen Tematiltia, “Kampa techmachtiaj ika Biblia”, o katli kipouaj párrafos. Moneki kintlajtolmakas kampa amo kinkakisej sekinok (xikita  párrafo 19). Tlaj itstokej miakej ueuejtlakamej katli nelia kuali tlamachtiaj, sejse xiuitl uelis mopajpatlatiasej. Amo moneki nochipa kintlajtolmakatos kema kipanoltisej se tlamachtili.

26. Tlaj itstokej tlauel miakej toikniuaj katli panoj tlaixpa, uajka se keskij uelis mosentilisej ipan sala auxiliar. Katli kiyakanas kualtiaskia elis se ueuejtlakatl katli kuali tlamachtia. Tlaj nelia monekis, uelis kitekimakasej se tlapaleuijketl katli kuali tlamachtia. Nochi ueuejtlakamej kintlapejpenisej ajkia inijuantij kichiuasej ni tekitl uan tlaj monekis mopajpatlatiasej. Katli kichiuas ni tekitl moneki moyakanas ika tlen kiijtoua  párrafo 18. Nochi katli panosej ipan sala auxiliar kiniljuisej ma yakaj nopaya kema tlamis nopa tlamachtili “Xijpanti tlamachtili tlen tlauel ipati”, tlen tlaxeloli “Tlen tlauel ipati katli Biblia tlamachtia”. Kema tlamipanosej, sampa tlakuepilisej kampa nochi itstokej.

27. Ipan tlanechikoli tikitasej se keski videos tlen nochi uelis kipantisej ipan JW Library^®.

© 2023 Watch Tower Bible and Tract Society of Pennsylvania

S-38-NHH 11/23