Kema kintlatsintokijkej miakej telpokamej, se 97% kiijtojkej kitekiuiyayaj redes sociales. Uan mokone, ¿nojkia kineki kitekiuis redes sociales? Tlaj kena, nika tikitas se keski tlamantli tlen moneki tijmatis.

Ipan ni tlamachtili tikitasej:

•  ¿Keski uejkauas mokone kitekiuijtos redes sociales?

•  ¿Tlake moiljuia mokone kiijtosneki kuali mouikas iuaya se akajya?

•  ¿Kenijkatsa kichiuas ma kiyolmati mokone?

•  ¿Tlake kichiuas mokone kema kitekiuis internet?

•  ¿Moneki tijtekiuisej redes sociales?

•  Tlen kiijtouaj sekinok tetajmej

 Nopa página tlen internet HelpGuide kiijtoua: “Redes sociales mochijchijtok pampa kinekij nochipa xijtlachilijto, nochipa xijtekiuijto uan nojkia pampa kinekij nochipa xijtlachili tlake tlamantli yankuik kitlalijtokej”.

 “Maske nijneki nijtlachilis redes sociales san se keski minutos, teipa niuejkaua miak horas pampa nijneki nijtlachilis nochi tlen sekinok kitlalijtokej. Tlauel ouij nijmati ayokmo nijtekiuis nocelular uan nijchiuas seyok tlamantli tlen kena techpaleuis” (Lynne, kipia 20 xiuitl).

 Ximotlatsintoki: ¿Uelis iselti monauatis nokone uan kichiuas tlen nikiljuia kema kitekiuis redes sociales? ¿Kuali tlalnamiktok uan amo tlauel uejkauas kitekiuis redes sociales?

 Texto tlen mitspaleuis: “Amo xinemikaj keja inijuantij tlen uiuitikej. Xinemikaj keja tlalnamikinij pampa inkiixmatij tlen melauak. Amo ximotonalpolokaj” (Efesios 5:15, 16).

 Kema miakej maseualmej kikakij nopa tlajtoli redes sociales moiljuiaj nopaya uelis monojnotsasej san ika ininuampoyouaj o ininuaya sekinok maseualmej katli kinixmatij. Maske kiampa moiljuiaj, nopa amo nelia pampa inijuantij amo nelnelia elij ininuampoyouaj.

 “Nikitstok miakej telpokamej moiljuiaj tlaj miakej maseualmej elij ininuampoyouaj ipan redes sociales o miakej kinpaktia tlen kitlejkoltiaj, uajka tlauel miakej kintekipachoua tlen kinpano maske amo kinixmatij. Nopa amo nelia” (Patricia, kipia 17 xiuitl).

 Ximotlatsintoki: ¿Moiljuia nokone amo tlauel ipati tlauel kiixmatisej ipan redes sociales? ¿Ueli mouampojchiua ininuaya sekinok maske amo kitekiuia redes sociales?

 Texto tlen mitspaleuis: “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Proverbios 17:17).

 Ixtlamatinij kiijtouaj kema se akajya tlauel kitekiuia redes sociales, kichiua ma moiljui iselti itstok, tlauel ma motekipacho uan ma mokueso miak tonali.

 “Amo kuali tijyolmatis kema tikitas tlaixkopinkayomej kampa nesij mouampoyouaj yajkej paxalotoj ininuaya sekinok mouampoyouaj uan ta amo mitstlanejkej” (Serena, kipia 19 xiuitl).

 Ximotlatsintoki: ¿Nokone uelis kitekiuis redes sociales kej kinamiki uan amo moueyimatis? ¿Amo tlauel moyolkokos kema kiitas tlen sekinok kitlejkoltiaj ipan redes sociales?

 Texto tlen mitspaleuis: “Ma ayok tijtemokaj ajkeya techueyimatis. Ma ayok timonajnankilikaj. Uan ma ayok tikixtokakaj tlen sekinok kipiaj” (Gálatas 5:26).

 Ipan redes sociales uelis tepinajtisej, motitlanilisej tlaixkopinkayomej tlen amo kinamiki, moiljuisej tlen sokiyo uan kiitasej pornografía. Maske mokone amo moiljuijtok kitlachilis nopa tlamantli, tlaj itstok ipan redes sociales, nopaya ueliskia kiitas.

 “Ipan redes sociales moijtoua tlajtoli tlen sokiyo uan onka uikatl tlen kiijtoua amo kuali tlajtoli. Nojkia nikitstok miakej kitlaliaj se keski tlamantli tlen nesi amo kenijki, uan teipa tikitas eli se tlamantli tlen sokiyo” (Linda, kipia 23 xiuitl).

 Ximotlatsintoki: ¿Nokone kinextia kuali tlalnamiki uan kuali kitekiuia internet? ¿Uan tlaj kipantia se tlamantli tlen amo kinamiki uelis monauatis uan amo kiitas?

 Texto tlen mitspaleuis: “Amo xijnekikaj para inmoaxkatisej más tlamantli mojmostla. Amo kema xijchiuakaj tlamantli ika se tlen axmonamik. [...] Amo xikijtokaj tlajtoli tlen fiero. Amo xiauilkamatikaj, niyon amo xikijtokaj tlen kinpinaualtia sekinok pampa axkinamiki para inmojuantij” (Efesios 5:3, 4).

 Tlaj tijneki kuali tiitstos uan tiyolpakis, amo moneki tijtekiuis redes sociales. Miakej telpokamej katli achtouia kitekiuiyayaj redes sociales, nama ayokmo kitekiuiaj uan tlauel yolpakij.

 “Nikitak tlauel amo kuali tlen kipanok nosiuaikni pampa kitekiuiyaya redes sociales, yeka nimosentlalik ayokmo nijtekiuis. Ipan nopa tonali pejki nijmati nojua tlauel niyolpaki” (Nathan, kipia 17 xiuitl).

 Uelis tikijtosej: Tlaj timoiljuijtok tijkauilis mokone ma kitekiui redes sociales, achtoui xikita tlaj uelis kuali kintlapejpenis iuampoyouaj, tlaj amo kitlachilis tlen amo kinamiki, uan tlaj amo tlauel uejkauas kitekiuijtos.

 Texto tlen mitspaleuis: “Se tlakatl tlen tlalnamiki moiljuia intla kuali para kichiuas se tlamantli o axtle” (Proverbios 14:15).