Miakej katli kinekij mosenkauasej achtoui itstokej sansejko. Sekij kiampa kichiuaj pampa kinekij kiitasej tlaj kuali itstosej uan moiljuiaj kema mosenkauasej itstosej ika pakilistli. ¿Tlen kichiuaj nelia kinpaleuis?

Ipan ni tlamachtili tikitasej:

•  ¿Tlake kiijtoua Biblia?

•  ¿Tiitstosej sansejko techpaleuis kema timosenkauasej?

•  ¿Tiitstosej sansejko techpaleuis tikajokuisej totomij?

•  Tlaj nijneki niyolpakis iuaya katli nimosenkauas, ¿achtoui moneki tiitstosej sansejko?

•  ¿Tlake mitspaleuis?

•   Biblia kiijtoua toTeotsij amo kineki ma motekakaj sansejko katli amo mosenkajtokej. Biblia kiijtoua: “Amo xiauilnemikaj” (1 Tesalonicenses 4:3; 1 Corintios 6:18). Nojkia kiijtosneki tlaj se tlakatl uan se siuatl motekaj sansejko maske amo mosenkajtokej uan teipa kinekij mosenkauasej. a Biblia kinpaleuia katli kinekij mosenkauasej amo ma kinpano tlen amo kuali kej kipiasej se ininkone maske amo kinekiyayaj.

•   ToTeotsij kichijki ma mosenkauakaj. Uan kiijtok “Se tlakatl kikauas itata uan inana para mosejkotilis iuaya isiua uan nopa omej mochiuasej san se inintlakayo” (Génesis 2:24). Kema se tlakatl uan se siuatl mosenkauaj kinpaleuia ma yolpakikaj uan kuali ma itstokaj.

 Se keskij kiijtoua kena. Moiljuiaj tlaj kinekij kuali moixmatisej moneki kichiuasej sansejko se keski tlamantli. Maske kiampa, katli mosenkajtokej kinpaleuis tlaj mosentlalisej nochipa itstosej sansejko.

 ¿Tlake kinpaleuis katli mosenkajtokej ma itstokaj sansejko maske kipiasej tlaouijkayotl? Maske ayamo mosenkauaj uan sansejko itstokej kema kiixnamikisej tlaouijkayotl nima kinekisej mokauasej. Katli inmosenkajtokej uelis inmechpaleuis kuali xiitstokaj, tlaj inmosentlalisej nochipa initstosej sansejko uan kema inkipiasej kuesoli sentik inmopaleuisej.

 Tlen tikitstokej: Kema se tlakatl uan se siuatl itstokej sansejko maske amo mosenkajtokej moiljuia kinpaleuis kema mosenkauasej, pero amo kiampa panos kema kipiasej tlaouijkayotl nima kinekisej mokauasej.

 Tlen Biblia tetlajtolmaka: “Tlen se akajya kitoka, ya nopa kipixkas”(Gálatas 6:7).

 Se keskij kiijtoua kena. Katli tlauel ixtlamatij Pew Research Center kiijtoua ipan Estados Unidos kintlajtlanilijkej matlaktli maseualmej uan nauij kiijtojkej kiampa kichiuaj pampa kinekij kiajokuisej inintomij. Maske kiampa, se keskij katli ya itstoyaj sansejko se keski xiuitl, kintlajtlanilijkej uan miakej kiijtojkej amo uelis mosenkauasej pampa amo kipiaj miak tomij.

 Katli itstokej sansejko uan amo mosenkajtokej kipiaj miak tlaouijkayotl uan más kinpano siuamej. Se neskayotl, kema se tlakatl uan se siuatl mokauaj, nopa siuatl iselti moneki kiniskaltis ikoneuaj.

 Tlen tikitstokej:Maske moiljuiaj itstosej sansejko kema ayamo mosenkauaj kinpaleuis nopa amo nelia.

 Tlen Biblia tetlajtolmaka:“Na niDios niinmoTeko [Jehová] tlen niinmechmachtia para inkimatisej tlen kuali para inkichiuasej” (Isaías 48:17).

 Se keskij kiijtoua kena. Maske kiampa, nopa amochtli Fighting for Your Marriage (Xijchiuakaj kampeka amo inmokauasej) kiijtoua: “katli itstokej sansejko maske ayamo mosenkauaj, teipa kimatij ouij mokauasej”. ¿Kenke? Pampa kiitaj amo kuali mouikaj yon amo yolpakij. Kema kiampa kinpano ayokmo uelij mokauaj pampa sansejko kichiuaj se keski tlamantli kej kinmokuitlauiaj se tlapiali, tlaxtlauaj kampa mokauaj o kipiaj se ininkone uan moneki kimokuitlauisej. Ixtlamatinij kiijtouaj maseualmej “momatij itstosej sansejko.” b Uelis tikijtosej, “miakej mosenkauaj pampa amo kinpaktia itstosej ininselti” kiampa kiijtoua nopa amochtli Fighting for Your Marriage.

 Tlen tikitstokej:Kema ayamo mosenkauaj uan itstokej sansejko tlauel ouij kimatij mokauasej.

 Tlen Biblia tetlajtolmaka:“Se tlakatl tlen tlalnamiki nimantsi momaka cuenta intla mauilili kampa yaui uan axpano, pero se tlen uiuitik axkichiua cuenta uan kipantia tlen axkuali” (Proverbios 22:3).

 Tlaj tijneki tiyolpakis kema timosenkauas, amo moneki tiitstos iuaya se akajya tlaj ayamo timosenkajtok. ¿Tlake uelis tijchiuas? Moneki tijneltokas tlen Biblia kintlajtolmakaj katli mosenkajtokej. Achtoui moneki kuali xikixmati katli tijneki iuaya timosenkauas. Kema tijtlapejpenis iuaya ajkia tijneki timosenkauas amo san ximoiljui ipan tlen tijyolmati. Tlauel ipati tikitas tlaj nojkia moyakana ika nopa kuajkuali tlamantli uan tlaj kineltoka tlen ta tijneltoka.

 Ipan Biblia tijpantis tlamachtili tlen mitspaleuis xiyolpaki iuaya mosiua o moueue. c Biblia uelis mitspaleuis...

•   amo xijtlauelkaua mosiua o moueue.

•   tijnextis nopa kuajkuali tlamantli mitspaleuis tielis se kuali tlakatl uan se kuali siuatl.

•   kuali inmoixmatisej kema ayamo inmosenkauaj.

 Tlaj tijneki tijmatis sekinok tlamachtili xikita kampa kiijtoua “Mochampoyouaj uan katli mosenkajtokej” ipan jw.org.

 Tlen Biblia tetlajtolmaka: “Nochi Tlajkuiloli moijkuilok pampa Dios ika ichikaualis kichijki ma moijkuilo uan techpaleuia para titlamachtisej” (2 Timoteo 3:16).