¿Tlauel tlai moueue o mosiua? Tlaj kiampa kichiua, ni tlamachtili mitspaleuis xijmati tlake uelis tijchiuas.

Ipan ni tlamachtili tikitasej:

•  Tlaj teueue o tesiua tlauel tlai, amo kuali itstosej

•  ¿Ya timomatki tlauel titlais?

•  Tlaj amo tijneki ma mitspaleuikaj, más mitstlanauis

•  Tlen uelis tijchiuas

 Tlaj tlauel timotlailtis, uelis mitstlanauis. Kichiuas amo kuali ma tekiti moyolo, tijpias cirrosis uan cáncer. Amo san ta timotlanauis, nojkia kichiuas amo kuali xiitsto iuaya monamik, peuas inmoteuisej, amo inkipiasej tomij, inmomekatisej o inmokauasej.

 Biblia kiijtoua kema se akajya tlauel motlailtia, kikokoua “keja se kouatl mauilili tlen tetlankechia. Elis keja nopa kolotl tlen más temaka tlakuajkualokayotl kema tetsopinia” (Proverbios 23:32). ¿Tlake mitspaleuis xijmati tlaj ya timomatki tlauel titlais?

 Ni tlajtlanili mitspaleuis xijmati tlaj tlauel titlai:

•   Kema tikiji vino, ¿tijneki más tikijis?

•   ¿Nochipa timoiljuijtok tlake tonali uelis sampa titlais?

•   ¿Nojua titlai maske mitstlanauia o tijpia kuesoli ika monamik?

•   ¿Mitspano miak tlamantli kema tijneki tijkauas tlaili?

•   ¿Timokualania iuaya monamik kema titlai?

•   ¿Amo nima timoiuintia kema tikiji miak vino?

•   ¿Ichtakatsi timotlailtia, tijtlatia vino ipan mochaj o kampa titekiti?

 Tlaj tijnakilik kena se o más tlajtlanili tlen tikitak, uajka ya timomatki titlais.

 ¿Mitsiljuijtok moueue o mosiua kitekipachoua pampa titlai? Tlaj kena, uajka tikiljuia kenke titlai uan timotextia. Uelis tikintlajtlakoltia sekinok kej moueue o mosiua uan tikijtoua:

•   “Tlaj tijnextiskia tinechiknelia amo nitlaiskia”.

•   “Tlaj titekitiskia kampa nitekiti nojkia titlaiskia”.

•   “Nikinixmati miakej katli nojkia tlauel tlaij”.

 Tlaj kiampa tikijtoua uajka, ¿tikachtouitlalia titlais uan amo tijpatiita kuali tiitstos iuaya monamik? ¿Tlake tlauel tijpatiita?

 Tlen Biblia tetlajtolmaka: “Se tlakatl katli ya mosiuajtijtok, kitekipachoua tlen onka ipan Tlaltipaktli pampa kineki isiua kuali ma kiita” (1 Corintios 7:33).

•   Ma mitstekipacho tlen kipano monamik. Tlaj monamik kitekipachoua pampa titlai, uelis tijpatlas se keski tlamantli. Tlaj amo tiueli uan san tijneki titlaitos maske tlauel motekipachoua monamik, uajka nopa kiijtosneki ya timomatki titlais.

   Tlen Biblia tetlajtolmaka: “Amo aka ma kichiua san tlen ya kipaleuis, ma kichiua tlen kinpaleuis sekinok” (1 Corintios 10:24).

•   Xijtemo tlen uelis tijchiuas. Tlaj se soldado kineki kitlanis ikualankaitaka moneki kimatis kenijkatsa tlateuia. San se kej nopa soldado, tlaj tijneki tijkauas tlaili, moneki tijmatis se keski tlamantli uan kenke maseualmej momatij titlaij. Nojkia xikita tlake tlamantli mitspaleuis ayokmo titlais uan kema sampa tijnekis tikis tlaili.

   Tlen Biblia tetlajtolmaka: “Amo xijchiuakaj tlen axkuali tlen inkinekij inkichiuasej, pampa nopa tlamantli kitilana uan kiteuia inmoyolo” (1 Pedro 2:11).

•   Xijtemo tlapaleuili. Onka kampa uelis mitspaleuisej ayokmo xitlai, kej hospitales o sekinok tlamantli uan tepajtianij katli kinpaleuiaj katli tlauel tlaij. Nojkia xikiljui se mouampox katli kuali tlaneltoka ma mitspaleui tikitas kenke tlauel titlai. Uan kema tijnekis sampa titlais uelis tijnojnotsas.

   Tlen Biblia tetlajtolmaka: “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Proverbios 17:17).

 Tlauel ouij tijkauas tlaili yeka amo mitspaleuis tlaj san tijpouas se tlamachtili, yon amo mitspaleuis tlaj san tikijtos: “Ayokmo nitlais”. Xikilnamiki kema tijnekis tijkauas tlaili nojua más kitlanauis motlakayo uan nojkia monamik.

 Tlaj nojua tijneki tijmatis: Xijpoua sekinok tlamachtili kampa tikitas tlake kinpaleuijtok ma kikauaj tlaili.

 “Ya no soy ese hombre cruel”

 “Ya no me avergüenzo de mí mismo”

 “La calle se convirtió en mi hogar”

 Nojkia xikita nopa video “Ayokmo nechpaktik kej nimonejnemiltiyaya”.