TLEN KINPALEUIS MOCHAMPOYOUAJ | KATLI MOSENKAJTOKEJ
Ximosentlali ipan kuajkuali tlamantli tlen kinextia monamik
Ta nima tijchijtikisa se tlamantli; monamik kikualchijchiua nochi para kuali ma kisa.
Ta amo más mitspaktia tikamanaltis; monamik tlauel kipaktia kamanaltis.
¿Onka se tlamantli tlen amo mitspaktia tlen kichiua moueue o mosiua? Tlaj san timoiljuijtos ipan nopa tlamantli, uelis mitstlanauis ta uan monamik. Biblia kiijtoua: “Aki ajachika tematiltia kiuejkatlalia iuampo” (Proverbios 17:9).
Amo xijkauakaj ma inmechkualanijto se tlamantli tlen amo inmechpaktia, uelis inkitemolisej tlamantli tlen ika inmechpaleuis.
Ipan ni tlamachtili tikitasej:
Xikita tlen kuali tlamantli kinextia uan amo tlen mitskualania
Maske monamik kinextia se keski tlamantli tlen mitskualania, uelis tijpatiitas tlen kuajkuali tlamantli kinextia. Ma tikitakaj eyi neskayotl:
“Noueue tlauel uejkaua kema kichiua se tlamantli o kema mokualchijchiua para yas kanajya. Pero nojkia eli se tlakatl katli amo nima kualani nouaya. Maske kemantika amo kuali nikita pampa ouijti, nopa nojkia eli se tlamantli tlen nechpaktia tlen ya” (Chelsea).
“Nosiua kuali kiita kenijkatsa kichiuas se tlamantli; moneki kiitas amo tleno ma kipolo, uan nopa amo nechpaktia. Pero pampa kuali kiita tlake kichiuas, nopa kinextia amo san kej ueli kichiua se tlamantli” (Christopher).
“Kemantika nikita noueue amo tlauel kipatiita se keski tlamantli uan nopa kichiua amo kuali ma nimomachili. Kema kichiua se tlenijki amo motetsopa uan kichiua ika yolik , nopa nechpaktik tlen ya kema nikixmatki. Nijpatiita pampa kema techtetsopa se tlamantli ya amo nima motekipachoua” (Danielle).
Tlen kiyekokej Chelsea, Christopher uan Danielle, maske ininnamik kinextiaj se keski tlamantli tlen amo kinpaktia, nojkia kiitstokej tlen kuajkuali tlamantli kinextiaj uan nopa kichiua tlauel ma kipatiitakaj. Maske kiampa pano, amo uelis tijkixtisej se tlamantli uan se tijkauasej,moneki eltos sansejko, sanse kej se tomi tlen kipia ome iixayak uan amo uelis moxelos.
Kemantika se keski tlamantli tlen tijnextiaj ipan tonemilis amo kuali eli. Se neskayotl, ipan Biblia kiijtoua “Se tlen yolkentsi kipeualtia kualantli” (Proverbios 29:22). Tlaj kiampa inkinextiaj, uelis inkichiuasej kampeka “Ayok ximoyolkuitlamakakaj. Ayok ximochiuakaj inyolkentsitsij. Ayok xikualanikaj. Ayok xikualankatlauejchiuakaj. Ayok xitetlaijiljuikaj” (Efesios 4:31). a
¿Uan tlaj eli se tlamantli tlen mitskualania? Biblia kiijtoua: “Uajka xijpiakaj inmoyolo ika tlen inmechchiuiliaj tlen axkuali [...]. Intla se kiteiljuia seyok ika se tlenijki, ma kitlapojpoljui” (Colosenses 3:13).
Nojkia xijtemoli tlen kuajkuali tlamantli kinextia kema se tlenijki amo mitspaktia. Uelis kema tikixmatki monamik, mitspaktik tlen kichijki o kiijtok. Joseph katli kipia inamik kiijtok: “Timosentlalis ipan tlamantli tlen amo mitspaktia tlen mosiua, eliskia kej se diamante tlen san tikitas itejteno uan amo nochi iyejyejka”.
Tlen uelis inkipouasej sansejko
Achtoui, sejse tlen inmojuantij ximoiljuikaj ni tlajtlanili uan teipa sansejko ximokanaljuikaj.
¿Tikita moueue o mosiua kinextia se tlamantli tlen kichiua amo kuali xiitstokaj? Tlaj kena, ¿tlake eli?
¿Eli se tlamantli tlen tlauel mauilili o san amo mitspaktia?
¿Tikita kinextia se kuali tlamantli ipan inemilis? Tlaj kena, ¿tlake eli uan kenke tlauel tijpatiita?
a Xikita nopa tlamachtili “Cómo controlar la ira”, “Cómo hablar sin herir” uan “Cómo dejar de discutir”.